Baş infeksionist: “Proses belə davam edərsə, qapanma qaçılmaz olacaq”

Təyyar Eyvazov deyir ki, daha təhlükəli vəziyyətlə üzləşməmək üçün insanlar təcili peyvənd olunmalıdır

Son vaxtlar Azərbaycanda koronavirusa yoluxma və bununla bağlı ölüm halları artır. Respublikanın baş infeksionisti Təyyar Eyvazov Reyting.az-a müsahibəsindən yoluxma hallarının artımasının əsas səbəblərindən danışıb və virusdan qorunmaq üçün təkliflərini səsləndirib:

- Bir neçə gündür ki, mən bu barədə danışıram. Söhbət ondan gedir ki, insanlarımız təmasları artırıblar.

Ölkəmizdə böyük tədbirlər keçirilir və bir sıra yerlərin fəaliyyətinə icazə verilib. Ticarət mərkəzləri işləyir, toy məclisləri təşkil olunur. Sözsüz ki, bütün bunlar həm də insanlar arasında təmasları artırır.

Həmçinin əvvəlki günlərdə yoluxma sayının aşağı olması insanlarımız arasında müəyyən rahatlıq və arxayınlıq yaradıb. Yəni bir çox hallarda insanlar virusdan qorunmaq üçün bəyan olunan tədbirlərə əməl etmirlər. Bu kimi faktorlar sözsüz ki, yoluxma hallarının artmasına təsir edir.

- Dünyada, xüsusilə region ölkələrində - Rusiya, İran və Gürcüstanda COVİD-19-a yoluxma hallarında kəskin artım müşahidə olunur. Bu da ölkəmizdə yoluxma sayına təsir edirmi və bununla bağlı nələri tövsiyə edirsiniz?

- Aydındır ki, Azərbaycan dünyadan izolyasiya olunmuş ölkə deyil. Sərhədlərin bağlı, ölkələr arasında münasibətlərin minimum səviyyədə olmasına baxmayaraq, bunun qarşısını almaq mümkün deyil. Yəni başqa ölkələrdə müşahidə olunan yeni ştammlar gec-tez bizə də gəlib çıxır.

Üstəlik, dünyanın fərqli ölkələrində digər ştammlarda yaranır. Amma biz İran, Gürcüstan və Rusiya ilə öz vəziyyətimizi müqayisə edəndə görürük ki, bizdə durum daha yaxşıdır. Bu isə arxayınlığa səbəb olmamalıdır. Əksinə, indi bizdə də durum pisləşməyə doğru gedir.

- Siz daha nələri tövsiyə edirsiniz?

- Universal qaydalar var. Burada əsas iki məsələdir. “Qızıl qaydalar” dediyimiz karantin qaydalarına ciddi şəkildə əməl olunmalıdır. Ortada insan məsuliyyəti olmalıdır. Bu, insanların həm virusa yoluxmasının qarşısını alar, həm də ətrafını yoluxdurmağa imkan verməz. Yəni insanlar bu qaydalara qətiyyətlə əməl etməlidir.

İkincisi vaksinasiya prosesidir ki, insanlar buna da ciddi şəkildə meyl etməli, vaksinasiya olunmalıdır. Başqa yol yoxdur. Hansı ştammın olmasına baxmayaraq peyvənd vacibdir. Daha üçüncü yolumuz yoxdur.

- Bəzi ölkələrin mütəxəssisləri sərtləşmənin vacibliyindən danışır, hətta bu istiqamətdə qərar verən dövlətlər də var. Azərbaycanda da sərt qaydaların tətbiqi haqda ekspert çevrəsinin fikirlərini necə qiymətləndirirsiniz?

- Sərtləşmə bir dəfəyə olmur. Aydındır ki, bu, mərhələli formada həyata keçirilir. Hər dövrdə bu barədə qərarlar real vəziyyətə uyğun olaraq qəbul edilir. İndi məsələ ondadır ki, yoluxma sayında artım var. Baxmayaraq məsələ lap kritik də deyil. Biz bu mərhələni əvvəlki dövrlərdə yaşamışıq. Üstəlik, xəstəxanalarımızda o qədər də xəstə yoxdur. Məncə, sərt karantin qaydalarına keçid zamanı bu faktorların hər biri nəzərə alınır. Operativ Qərargah bu tənzimləmələri sözsüz ki, həyata keçirir. Mütəxəssislərin fikrincə, əgər proses belə davam edərsə, yəqin ki, qapanma qaçılmaz olacaq. Hazırda bu məsələ mütəxəssislər tərəfindən müzakirə olunur. Amma nəzərə almaq lazımdır ki, konkret qərarların qəbulu Operativ Qərargahın səlahiyyətinə aiddir.

- Virusa yoluxma hallarının artdığı müşahidə edildiyi dövrdə insanlarımızın davranışını necə qiymətləndirirsiniz?

- O yerdəki xəstələnmə halları çoxdur, insanlar öz şəxsi təcrübəsindən, ətrafında, qohum-əqrəbada xəstələri görür və istər-istəməz ehtiyatlı olmağa, qayda-qanunlara əməl etməyə çalışır. Elə ki vəziyyət nisbətən yaxşılaşır, insanlarda unutqanlıq yaranır. Biz də insanlara deyirik ki, qaydalara əməl etmək üçün durumun pisləşməsini gözləmək lazım deyil. Elə bu başdan qaydalara əməl etmək lazımdır. Eyni zamanda peyvənd prosesində aktiv iştirak etmək lazımdır.

- Azərbaycanda vaksinasiya prosesini necə qiymətləndirirsiniz, arzuedilən səviyyədə aparılırmı?

- Vaksinasiya prosesi bizdə yanvarın 18-dən başlayıb. Bu günə qədər də müxtəlif vaxtlarda müxtəlif sürətlə davam edib. İlk günlərdə ola bilsin ki, vaksinasiya prosesinin sürəti zəif olub. İndi hər gün təxminən 40-60 min insan peyvənd olunur. Hesab edirəm ki, bunun da çox olması arzuediləndir. Çünki bizim qurumların verdiyi məlumata görə, gün ərzində daha çox insanın peyvənd olunmasına şərait yaradılıb. Peyvənd prosesini nə qədər tez keçsək, peyvənd daha çox əhatə etsə, bir o qədər onun effektini görəcəyik. Ona görə də, fürsətdən istifadə etmək lazımdır. Nə qədər ki, vəziyyət kritik deyil, insanlar peyvənd prosesindən keçməlidir ki, kritik ssenarilərdən uzaqlaşaq.

- Təklif edirsiniz ki, insanlar hərəkətə keçməli, daha tez peyvənd olunmalıdır...

- Bəli, mümkün qədər vaksinasiya prosesinin sürətlənməsi arzuediləndir. Bu, bizi daha pis ssenarilərdən qoruya bilər.

Reyting.az

Ana səhifəyə dön