Azər Qaraçənli: "İşğaldan azad olunduqdan sonra Laçını görməmişəm"

"Ay Laçın"ın müəllifi: “İnanıram ki, işğaldan azad edilmiş torpaqlarımızı görmək mənə də qismət olacaq”

Çağdaş Azərbaycan jurnalistikasının nəhəng ismi, dillərə dastan "Ay Laçın" məqaləsinin müəllifi, gözəl insan, intellektual və vətənpərvər qələm dostumuz Azər Qaraçənlinin 50 yaşı tamam olur.

Reyting.az saytı AzNews.az-ın yubilyarla müsahibəsini təqdim edir:

- Azər bəy, bu gün 50 illik yibileyinizdir, təbrik edirik. Hansı hisslər keçirirsiniz?

- Minlərlə şəhidi, itkini, yaralısı olan vətəndə özümü xoşbəxt, Tanrı kimi yiyəsi olan kainatda özümü bədbəxt hiss eləyə bilmirəm. Çalışıram göylə yer arasında tarazlıq tapım.

- Yubileyinizi qeyd edəcəksinizmi?

- Heç bir yubiley planım yoxdur, amma dostlarımın-doğmalarımın planlarına mane olmaq fikrində də deyiləm.

- Qardaşınız Fəxri Uğurlu sosial şəbəkədə yubiley münasibəti ilə sizin haqqınızda paylaşım edib. Sizi "ata əvəzi" adlandırıb. Özünüzdən böyük qardaşınız sizə niyə "ata əvəzi" desin, ailənin yükü sizin çiyninizdədir?

- Bu, Fəxrinin məni ucaltmaq cəhdidir. Ailəmizdə ata əvəzi Fəxridir.

- Siz Azərbaycanın görkəmli ziyalısı, mərhum Ağa Laçınlının ailəsində dünyaya gəlmisiniz. Ziyalı mühitində böyümüsüz. Bu mühit sizin xarakterinizin formalaşmasına necə təsir edib?

- Deyirlər xarakter iki əsas amil üzərində formalaşır: gen və mühit. Bəxtimdən mənim genimlə mühitim eyni tərkibdədir. Mən mənəvi irslə bioloji irs arasında ziddiyyət yaşamamışam. Bu, xarakterimin formalaşmasında çox ciddi rol oynayıb.

- Siz çağdaş Azərbaycan jurnalistikasında publisistikanın ən gözəl örnəklərindən sayılan “Ay Laçın” məqaləsinin müəllifisiniz. 50 illik yubiley gününüzdə Laçın artıq azaddır. İşğaldan azad Laçın haqqında nəsə yazmaq istəyirsinizmi?

- “Ay Laçın” yazısı haqqında dedikləriniz məni sevindirir. Ancaq bundan da çox məni sevindirən odur ki, siz məndən işğaldan azad Laçın haqqında yazı gözləyirsiniz. İnanıram ki, işğaldan azad edilmiş torpaqlarımızı görmək mənə də qismət olacaq. Tək Laçından yox, azad edilmiş hər rayonumuzdan, şəhərimizdən yazmaq istərdim.

- Necə yəni, işğal dövründə Laçın barədə ən unudulmaz məqalənin müəllifi hələ ata yurdunda, Laçında olmayıb?

- Xeyr, olmamışam. Ümumiyyətlə, işğaldan azad olunan rayonlarımızın heç birinə getməmişəm.

- Hazırda yaradıcılığınızı harada davam etdirirsiniz?

- Novator.az saytında.

- Adətən sizi savadlı, peşəkar, eyni zamanda təvazökar insan kimi xarakterizə edirlər. 50 illik yubileyinizin olmasına baxmayaraq jurnalist təşkilatları sizi təbrik etməyib. Hər halda belə paylaşımlara rast gəlmədik. Bu onun göstəricisi deyilmi ki, təvazökarlıqla öz haqqınıza girmiş olmusunuz?

- Böyük hind şairi, yazıçısı Rabindranat Taqorun bir sözü var: “Təriflənmək məni utandırır, çünki gizlində onu arzulayıram”. Bu baxımdan barəmdə dediyiniz xoş sözlərlə siz mənim gizli arzularımı ifşa edirsiniz. Sağ olun.

Jurnalist təşkilatlarına gəlincə, onların məni ifşa etməsinə ehtiyac yoxdur. Sizin ifşanız yetər. Təvazökarlığın insanın öz haqqından imtinasına gətirdiyi haqda söylədikləriniz isə məndən ötrü yenilik oldu. Bu haqda heç düşünməmişdim. Tam da olmasa bu fikirlə qismən razılaşmaq lazım gələcək. Gördüyünüz kimi hər yaşda öyrənməli nəsə var. Allah bilir, mən daha nələri bilmirəm.

Ayan RZAYEVA

Ana səhifəyə dön