Aqil Abbas: “Ortada Zəngəzur söhbəti var...”

Deputat: “Xankəndi, Ağdərə və Xocavəndin bəzi hissələrində idarəetməmiz tam oturuşmayıb. Meşələrdə terrorçu qruplar, əmrə tabe olmayan silahlı dəstələr var”

Milli Məclisin deputatı, yazıçı Aqil Abbas Reyting.az-a müsahibə verib.

Həmin müsahibəni təqdim edirik:

- Aqil bəy, dekabrın 10-da Azərbaycan qələbə paradı keçirdi, dost və düşmənə öz qüdrətini nümayiş etdirdi. Ziyalı və Qarabağ probleminin tarixi köklərini bilən şəxs kimi bu haqda nə düşünürsünüz: biz kimlərə və hansı mesaj verdik?

- Əvvəla, hərbi paradın keçirilməsini çox yüksək qiymətləndirirəm. Açığı, bu, həyatımda gördüyüm ən gözəl və sevincli qələbə paradıdır.

Əlbəttə, bundan əvvəl də keçirdiyimiz paradlar gözəl olub. Xatırlayıram, müstəqillik əldə etdikdən sonra da hərbi paradımız olub, amma belə möhtəşəm deyildi.

Adətən biz, daha çox Böyük Vətən müharibəsi ilə bağlı Moskvanın keçirdiyi paradları görmüşük. Bildiyiniz kimi, o paradı heç bu il də keçirə bilmədilər. Bizim paradımız ondan da gözəl idi, həm də bizim qələbə paradımız idi.

İkincisi, həm cənab prezident İlham Əliyev, həm də qardaş dövlətin rəhbəri hörmətli Rəcəb Tayyib Ərdoğan paraddakı çıxışları zamanı ciddi mesajlar verdilər. Mən bu mesajları xırdalamaq istəmirəm. Bu addım həm də dünyaya görk oldu ki, Azərbaycan tək deyil. O mənada ki, Azərbaycanın belə qüdrətli ordusu var.

Açığı, biz silahlarımızın hamısını paradda göstərmədik. Çünki elə silahlarımız var ki, onu paradda nümayiş etdirmək lazım deyil. Məsələn, indiyə qədər nadir hallarda pilotsuz uçuş aparatlarını nümayiş etdirirdik, amma son parad zamanı kifayət qədər bu modern silahlar nümayiş etdirildi. Baxmayaraq ki, bu silahlar bizdə əvvəl də var idi. Bir sözlə, bu paradda ordumuzun nə qədər möhtəşəm və qüdrətli olduğunu nümayiş etdirdik.

Üçüncüsü, sözsüz ki, müharibə zamanı, elə indi də qardaş Türkiyə bizim yanımızda idi. Amma vuruşan Azərbaycan əsgəri idi. Əlbəttə, Türkiyə texnika və siyasi dəstək baxımından arxamızda idi, yəni arxadan bizi vura bilməzdilər, kürəyimizi qardaş kürəyinə söykəmişdik. Eyni zamanda döyüşən kim idi? Qəhrəman Azərbaycan əsgəri!

Bəzən ermənilər iddia edirlər ki, guya türk xüsusi təyinatları da Qarabağda döyüşüblər, guya Bin Ladenin dəstəsi də gəlmişdi və daha nələr. Amma şəhid olanlara baxın. Əgər onlardan da döyüşən olsaydı, bilinərdi. Türkiyə öz şəhidlərini gizlədə bilməzdi. Amma görürsünüz ki, belə hallar yoxdur.

- Yeri gəlmişkən, paradda Rəcəb Tayyib Ərdoğan çıxışı zamanı bildirdi ki, qalib gəlsək də, bu proses bitməyib...

- Əlbəttə, bitməyib. Hələ Qarabağda idarəetmə tam təmin edilməyib. Xankəndi, Ağdərə və Xocavəndin bəzi hissələrində idarəetməmiz tam oturuşmayıb. Digər tərəfdən, ortada Zəngəzur söhbəti var. O cümlədən Azərbaycanla Naxçıvan arasında əlaqəni təmin edəcək yolun açılması məsələsi var.

Təbii ki, bizim başqasının torpağında gözümüz yoxdur. Amma cənab prezident çıxışı zamanı nə dedi? Zəngəzur, Göyçə və İrəvan bizim torpaqdır! Əgər Ermənistan bir də bizə qarşı baş qaldırarsa...

Yeri gəlmişkən, ermənilərin həm Gürcüstana, həm də Türkiyəyə əsassız ərazi iddiaları var. Ermənistan bir daha başını qaldırıb bizə qarşı hansısa söhbətlər etməyə çalışsa, yəqin ki, bizim olmuş digər ərazilərin də taleyi həll oluna bilər. Onsuz da Ermənistan bir dövlət kimi varlığını itirib.

- Yeni müharibə ehtimallarını nə dərəcədə real sayırsınız?

- Mən yeni müharibə gözləmirəm. Çünki ermənilərin başı yüz ildən bir çönür. Bu, xronologiyaya baxdıqda da görünür. Ermənistan anladı ki, bir daha müharibəyə cəhd etsə, dövlətçiliyini itirəcək.

- Amma Ermənistanda bu gün də revanşist qüvvələr var...

- Revanşist qüvvələr sözsüz ki, var. Yeri gəlmişkən, belə qüvvələr Dağlıq Qarbağda da mövcuddur. Meşələrdə terrorçu qrupları, əmrə tabe olmayan silahlı dəstələri var. Amma belə revanşist qüvvələr heç nəyə nail ola bilməzlər. Ermənistanda sadə ermənilər də anlayır ki, onların uşaqlarını aparıb onlara məxsus olmayan torpaqlarda öldürüblər.

Sonuncu müharibədə ermənilər 10 mindən çox itki verib. Ölənlərin də mütləq əksəriyyəti gənclərdir. Bunların ailə üzvləri, yaxınları yuxarı-aşağı 500 min adam deməkdir. Onun qarşısında erməni hökuməti dura bilməz. Həm də revanş etmək istəsələr, bu dəfə “Dəmir yumruq”un səsi İrəvandan gələr.

- Qarabağdakı ermənilərin, xüsusilə separatçıların vəziyyəti necə olacaq?

- Separatçılar gedəcək və yəqin ki, gedirlər də. Əgər Qarabağdakı ermənilər Azərbaycan qanunlarına tabe olacaqsa, qanunlarımızın, konstitusiyamızın tələblərini qəbul edəcəksə, Azərbaycan dövlətinin pasportunu daşıyacaqsa, buyurub yaşasınlar. Azərbaycanda etnik qruplar yaşayır, onlar hansı hüquqlara malikdirsə, ermənilər də həmin hüquqa malik ola bilərlər. Burada qeyri-adi məsələ yoxdur.

- Amma müşahidə edirik ki, Ermənistanın Müdafiə naziri Xankəndinə gəlir, orada hansısa ordu quruculuğunu müzakirə edir, sülhməramlıların rəhbərləri ilə fotolar çəkdirirlər...

- Ermənistan Müdafiə naziri bəlkə gəlib oradakı cinayətkarlara xəbərdarlıq etməyə? Biz bunu dəqiq bilmirik. Digər tərəfdən, separatçılarla sülhməramlılar görüşməlidir. Çünki onlarla kontakt qurulur, başa salınırlar.

Amma siz də görmüsünüz ki, bizim hərbçi generallarımız, habelə Dövlət Təhlükəsizliyi Xidmətinin rəhbəri Əli Nağıyev də sülhməramlı kontingentin komandanı ilə Laçında, Kəlbəcərdə görüşdülər, müzakirələr apardılar. Yəni gələcəkdə nələrin olacağı planlaşdırılır. Biz yüz faiz o ərazilərimizdə də idarəçiliyi bərpa edəcəyik.

- Aqil bəy, bizim ərazimizin təxminən 20 faizi işğal edilmişdi. Hazırda ermənilərin nəzarətində neçə faiz ərazimiz qalır?

- Ermənilərin nəzarətində təxminən 3 min kvadrat kilometr ərazi qalır, əslində bundan da azdı. Çünki Xocavənd rayonun Hadrut qəsəbəsi, eləcə çoxlu sayda kəndi bizdədir. O cümlədən Ağdərənin bir sıra kəndləri -Umudlu, Sırxavənd, Narışlar və digərlərini qaytarmalıdırlar. Bu mənada düşünürəm ki, ermənilərin əlində əslində çox az ərazi qalıb. Bu da mülki ermənilərin yaşaması üçün yetərlidir. Yəni Azərbaycan qanunlarını qəbul edib yaşaya bilərlər.

- Ortada Xocalı hava limanının işə salınmasına dair fikirlər də var...

- Xocalı hava limanı Azərbaycanın razılığı və nəzarəti ilə işləyə bilər. Yeri gəlmişkən, hazırda Ağdam hava limanı da təmizlənir. O cümlədən Füzuli hava limanı. Əslində bunlar gələcəyin məsələsidir.

Reyting.az

Ana səhifəyə dön