Tofiq Zülfüqarov: “Ermənistan Mehrini ciddi təhlükə altına salıb”

Sabiq nazir: “Azərbaycana sanki kart-blanş veriblər. Nəinki Azərbaycanın ərazi bütövlüyünün tam şəkildə bəpa edilməsini, hətta Naxçıvan və Azərbaycan arasında qalan Mehrini neytrallaşdırmaq baxımından bəlkə də bizə imkan yaradıblar”

İşğal olunmuş Dağlıq Qarabağ bölgəsi və ətraf rayonlarda Ermənistanın törətdiyi hərbi cinayətlər və Azərbaycanın əks-hücumu dünyanın əsas mövzularından birinə çevrilib. Artıq işğalçı Ermənistan beynəlxalq hüququn tələblərinə məhəl qoymadan dinc insanların yaşadığı Gəncə şəhəri də daxil olmaqla Azərbaycanın digər yaşayış məntəqələrini raket atəşinə tutmaqdan çəkinmir.

Azərbaycanın keçmiş xarici işlər naziri Tofiq Zülfüqarov Reyting.az-a müsahibəsində deyib ki, Ermənistan dinc insanları, eləcə də Gəncə və digər şəhərləri atəşə tutmaqla kiminsə dəstəyini qazanmağa çalışır:

- Hesab edirəm ki, ermənilər bizim gözlədiyimiz yolu seçiblər. Onlar çalışacaqlar ki, hərbi əməliyyatları Dağlıq Qarabağla yanaşı, həm də Azərbaycan-Ermənistan sərhədlərinə keçirsinlər. Bu, bəlli taktikadır. Çalışırlar ki, bu yolla kiminsə dəstəyini əldə etsinlər və ya onları hərbi əməliyyatlara qoşsunlar. Əsas ümidləri isə Rusiya və Kollektiv Təhlükəsizlik Müqaviləsi Təşkilatının üzvlərinədir. Təbii ki, bu qeyri-ciddi istək olsa da, özlərini ifşa etmək üçün təxribatçı siyasətin nəticəsi kimi ortaya çıxıb.

- Erməni tərəfinin Cenevrə Konvensiyasının tələblərinə məhəl qoymadan mülki əhaliyə raket zərbələri endirməsi beynəlxalq ictimaiyyətdə hansı reaksiyaya səbəb ola bilər?

- Məni beynəlxalq aləmin reaksiyası maraqlandırmır. Hesab edirəm ki, biz öz reaksiyamızı daha güclü şəkildə müzakirə edib, davam etdirməliyik. Əslində qalsa, biz toplum və dövlət olaraq bu məsələ ilə bağlı ciddi ölçü götürməliyik. Əgər onlar qarşıdurmanın səviyyəsini artırmaq istəyirlərsə, bu imkanı onlara yaratmalı, sonra isə cavablarını verməliyik.

- Sizcə, erməni tərəfi məğlubiyyətdən qaçmaq üçün daha hansı addımlara gedə bilər?

- Onlar indi raket zərbələri endirilməsinin guya “Dağlıq Qarabağ Respublikası prezidentinin əmri əsasında” baş verdiyini göstərmək istəyirlər. Ancaq onlar Dağlıq Qarabağın harasında raket istehsal olunduğunu göstərsələr və ya rəsmi sazişə əsasən aldıqlarını ortaya çıxarsalar, biz inanarıq ki, bunlar həqiqətən Dağlıq Qarabağın raketləridir. Sözsüz ki, bu, Ermənistanın raketləridir və bu yolla çalışırlar vəziyyəti gərginləşdirsinlər. Hiss olunur ki, onların vəziyyəti doğurdan da pisdir və bunun nəticəsi olaraq belə addımlar atırlar. Bu mənada, bəlkə də onlara bir-iki gün cavab vermək lazım deyil, daha çox ifşalarına şərait yaratmaq lazımdır. Nəzərə alın ki, onların əllərində olan silahlar qeyri-dəqiqdir və onu real hərbi struktura gətirə bilərlər. Əlbəttə, bu, əhalimiz üçün təhlükə yaradır, amma biz başa düşməliyik ki, müharibə aparırıq. İndi onlar Gəncəyə zərbə endirdikdən sonra gözləyirlər ki, cavabı necə olacaq. Mən qərar qəbul edən insan deyiləm, amma fikrimcə, ikinci zərbələrinin haradan gələcəyini gözləmək lazımdır.

- Siz hesab edirsiniz ki, Ermənistanın mülki obyektlərə ikinci zərbəsi də ola bilər?

- Təbii. Hesab edirəm ki, onlar daha ağır sistemləri istifadə edəcəklər. Onların imkanları mövcuddur. Hələ Boris Yeltsinin vaxtında onlara “R-17” raketləri verilib. Bu raketlərin çoxu istifadə üçün yararlı olmasa da, bir qismi qalıb. Bunu istifadə edəcəklərini istisna etmirəm.

İkincisi, onların “İsgəndər” raketləri ilə bağlı nağılları var. Ola bilsin ki, ermənipərəst rusiyalı qüvvələr onlara bu raketləri buraxmağa imkan verə bilərlər. Amma bir məqamı nəzərə alın ki, hərbi mütəxəssislər bu cür silahların texniki xüsusiyyətlərini insanlara çatdırmalıdırlar. Deyilməlidir ki, bu əsasən nüvə silahlarının daşıyıcısı kimi SSRİ dövründə istehsal edilib. Onun adi partlayıcı maddəni daşıması çox nisbidir.

“R-17” və “İsgəndər” raketlərinin hərbi partlayıcı hissəsi təxminən 450 kiloqramdır. Amma bizim “Qasırğa” raketlərinin partlayıcı gücü 670 kiloqram həcmindədir. Bu baxımdan Gəncəyə raket zərbəsi hərbi gedişatdan daha çox təbliğati xarakter daşıyan həmlədir.

- Azərbaycan əks-hücuma başlayanda belə təhlükələri hesablayıb, yoxsa Gəncəyə qarşı belə təxribat ağlagəlməzdir?

- Sözsüz ki, hesablanıb. Mən hesab edirəm ki, bundan sonra sərhəddin hansısa hissəsində yeni təxribat olacaq. Digər bir mərhələ də Naxçıvana qarşı ola bilər. Əlbəttə, Naxçıvana qarşı həmlə zamanı cavab zərbəsi aldıqdan sonra onlar iddia edəcəklər ki, Türkiyə birbaşa müdaxilə edib. Bu onu göstərir ki, düşmən prosesi işğal altında qalan ərazilərimizdə deyil, digər istiqamətlərdə də genişləndirməyə meyl edir. Şəxsən mən hesab edirəm ki, Gəncəyə iki raket zərbəsinin endirilməsi ilə Ermənistan özünün Mehri hissəsini ciddi təhlükə altına salıb.

- Siz, Mehri rayonu dedikdə həm də İran-Ermənistan sərhəddini nəzərdə tutursunuz...

- Bəli, artıq Azərbaycana sanki kart-blanş veriblər. Nəinki Azərbaycanın ərazi bütövlüyünün tam şəkildə bəpa edilməsini, hətta Naxçıvan və Azərbaycan arasında qalan Mehrinin neytrallaşdırmaq baxımından bəlkə də bizə imkan yaradıblar.

- Hazırda Serj Sarkisyan, Robert Köçəryan, Arkadi Qukasyan, Bako Saakyan və digər cinayətkarlar Xankəndinə toplaşıb. Sizcə, Gəncə təxribatı Paşinyanın əməlidir, yoxsa Xankəndinin?

- Adını çəkdiyiniz şəxslərin bir çoxu ilə şəxsən tanışam. Onlar Qarabağ münaqişəsinin əsasını qoyanlardır. Və bu münaqişə nəticəsində həddən artıq varlanmış şəxslərdir. Amma onların bünövrəsini qoyub indiki səviyyəyə çatdırdığı bu problemin hesabını 19-20 yaşlı erməni gəncləri ödəyir. Bu adamlar Xankəndinə ona görə toplaşmayıblar ki, nəsə edəcəklər. Onlar anlayırlar ki, əllərində heç bir imkan yoxdur. Həm də anlayırlar ki, Azərbaycan XXI, onlar isə XX əsrin müharibəsini aparırlar. Onlar sadəcə, Ermənistandan qaçıb Xankəndinə toplaşıblar ki, məsuliyyətdən yayınsınlar. Onlar gözəl anlayırlar ki, hansısa mərhələdə erməni xalqı onları məsuliyyətə cəlb edib sual verəcək ki, “myatsum” dediyiniz sizin milyardlar toplamağınız üçün bizim uşaqlarımızın 30 ildən sonra özlərini qurban verməsi imiş? Bu təhlükəni onlar görürlər. Sizi əmin edirəm ki, ermənilərin daxili haqq-hesabı hələ qarşıdadır. Həm də uzaq gələcəkdə deyil.

- Ermənilərin Gəncəyə raket hücumu onların özfəaliyyətidir, yoxsa ruslarla anlaşması?

- Hesab edirəm ki, özfəaliyyətin nəticəsidir.

- Bu qərarı kim verib?

- İndi Ermənistanda vəziyyət gərgindir. Belə bir qərarın kim tərəfindən verilməsini demək çətindir. Qarabağdakı saxta rejimin rəhbəri deyib ki, qərarı onun özü verib. Məsələn, diqqət etsəniz görərsiniz ki, Rusiyanın bəzi mütəxəssisləri artıq Paşinyanı “idiot” adlandırırlar. Mən istisna etmirəm ki, artıq ermənilərin daxili toqquşmasının baş verəcəyi gün yaxınlaşır. Çünki bir qrup erməninin Xankəndinə toplaşması, ikincisi, onlardan ehtiyat edən Arayik Arutunyanın qaçıb hansısa hərbi hissədə gizlənməsi... Bu şəxs Paşinyana yaxın adamlarından sayılır. Köçəryan-Sarkisyan cütlüyü isə tamam başqa dəstədir. Gələcəkdə bunlar bir-birinə daha çox irad tutacaqlar. Fikrimcə, Gəncəyə raket atmaları da elə bunların arasında olan çəkişmənin nəticəsidir. Səbr edib prosesləri diqqətlə müşahidə edək. Onları qarşıda fəlakət gözləyir.

Reyting.az

Ana səhifəyə dön