Hərbi ekspert: “Ermənistan başa düşür ki, təkbaşına müharibəyə başlasa uduzacaq”

Azad İsazadə: “Ermənilər Rusiyaya əvvəlki qədər arxalanmır. Məncə, Nikol Paşinyan hökuməti anlayır ki, Rusiya bir şərtlə Ermənistanın arxasında dayana bilər. Bunun üçün Ermənistan birmənalı olaraq Qərb və Avropadan üz döndərməlidir”

Həm Azərbaycan-Ermənistan sərhədində, həm də işğal olunmuş Qarabağ cəbhəsində hərbi vəziyyət getdikcə gərginləşir. Ermənistanın hərbi cinayətlərini intesivləşdirməsi tez-tez silahlı qarşıdurma ilə nəticələnir.

Hərbi ekspert Azad İsazadə Reyting.az-a müsahibəsində cəbhədəki mövcud durumdan, Ermənistanın məkrli məqsəd və planlarından da söz açıb:

- Atəşkəs razılığı olduqdan bu yana hər an müharibənin başlaması riski mövcud idi. Sadəcə, söhbət bu riskin faizindən gedirdi. Yəni, müharibə riski çoxdur, ya az? İndi bu riskin faizi həddən artıq yüksəkdir.

Ermənistan requlyar ordu ilə paralel olaraq yerli əhalidən özünümüdafiə dəstələri yaradır. Hətta qadınlara hərbi hazırlıq keçirlər. Sözsüz ki, ordu birlikləri də sərhəddə yaxın ərazilərdə təlimlər keçir.

Azərbaycanda ehtiyatda olan hərbçiləri müvəqqəti təlim toplantılarına dəvət edirlər. İstər Azərbaycan, istərsə də Ermənistan gücünün olduğunu nümayiş etdirir. Sözsüz ki, danışıqlar prosesi olmadıqda müharibənin başlama riski yüksək olur. Hazırda biz belə vəziyyəti müşahidə edirik.

Onu da qeyd edim ki, beynəlxalq qurumlar hər iki tərəfi nəzarətdə saxlayır və ya buna cəhd edirlər. Həmçinin tərəfləri sülhə çağırırlar. Ancaq Ermənistan danışıqlar aparmaq niyyətində olmadığı üçün biz də buna razılıq vermədik. Bu faktdır ki, rəsmi Yerevan danışıqlar prosesinə qatılmaq istəmir.

- Dediniz ki, əlamətlərə görə, hər iki tərəfin müharibəyə hazırlaşdığını demək olar. Bu halda tərəflərdən hansı hücuma, hansı müdafiə olunmağa hazırlaşır?

- Müharibəyə hazırlaşmaqdan daha çox müharibəyə hazırlıq nümayiş etdirilir. Ermənistan bunu daha çox nümayiş etdirir, amma özü müharibəyə başlamaq istəmir.

- Niyə?

- Ehtimal edirəm ki, Ermənistan çalışır Azərbaycana qarşı təxribatlar həyata keçirsin və sabah müharibəyə görə Azərbaycanı ittiham etsin. Ermənistanın gördüyü tədbirlər əslində real müharibə deyil, müharibəyə hazırlığın nümayişidir. Ermənistan başa düşür ki, təkbaşına müharibəyə başlasa uduzacaq. Belə nümayişlərlə öz müttəfiqlərini və beynəlxalq güc mərkəzlərini tərəfinə cəlb edərək özünü qurban kimi göstərməyə çalışır. Amma Ermənistanın özü təkbətək müharibəyə girməyəcək. Çünki Ermənistan belə bir müharibədən qorxur. İstər insan resursu, istər silah-sursat baxımından geri olduğunu anlayır, habelə Türkiyənin Azərbaycanın yanında dayanması istər-istəməz onları narahat edir. Görürlər ki, real hərbi əməkdaşlıq, birgə təlimlər var.

Digər məqam odur ki, ermənilər Rusiyaya əvvəlki qədər arxalanmır. Məncə, Nikol Paşinyan hökuməti anlayır ki, Rusiya bir şərtlə Ermənistanın arxasında dayana bilər. Bunun üçün Ermənistan birmənalı olaraq Qərb və Avropadan üz döndərməlidir. Ehtimal edirəm ki, indiki erməni hökuməti də buna getmək, Rusiyanın bu şərtini qəbul etmək istəmir. Amma sabah necə olacağı daha çox vəziyyətdən asılı ola bilər. Ermənistan məh bu səbəbdən də real müharibədən qorxur, amma nüfuzunu itirməmək üçün əhalinin fikrini də daxili problemlərdən yayındırır. Üsətlik, beynəlxalq səviyyədə özünə müttəfiq axtarır.

- Ermənistanda real daxili ictimai-siyasi vəziyyəti necə qiymətləndirmək olar, bu ölkədəki əhali və siyasi qruplar arasında münasibətlər sistemi ilə bağlı məlumatınız varmı?

- Bu, ciddi məsələdir və biz ancaq mətbuat vasitəsilə əldə etdiyimiz məlumatları açıqlaya bilərik. Ermənistanın müxalifət mətbuatı Nikol Paşinyanı tənqid edir, Paşinyanı müdafiə edən mətbuat isə köhnə hakimiyyəti korrupsiyada, ölkəni dağıtmaqda ittiham edir.

Aydındır ki, Ermənistanda əvvəlki hökumətdə təmsil olunanlar indi əsas müxalifəti təmsil edirlər və onlar maliyyə baxımından güclü hesab olunurlar. Bununla yanaşı bəllidir ki, indi Ermənistanda əsas problem koronavirus pandemiyası və iqtisadi vəziyyətdir. Birmənalı olaraq iqtisadi vəziyyət yaxşı deyil, koronavirusun cilovlanması ilə bağlı tədbirlər isə nəticə vermir. Ermənistanda real durum bundan ibarətdir.

- Cənubi Qafqazda böyük müharibənin başlaması üçün real beynəlxalq zəmin mövcuddurmu?

- Məncə, bu il real müharibənin başlanması real görünmür. Ancaq unutmayaq ki, proseslər sürətlə gedir. Yəni hər gün vəziyyət dəyişə bilər. Mənim qənaətim belədir ki, indi müharibə riski o qədər də yüksək deyil.

- İraq və Suriyada olan PKK terrorçularının Dağlıq Qarabağ ərazisinə keçdiyi haqda xəbərlər dolaşır, həmçinin Livandan erməni əsilli şəxslərin işğal altında olan ərazilərə köçürüldüyü bildirilir. Bu, Azərbaycan üçün hansı təhlükələr yaradır?

- Ermənistan tərəfi də məlumat yayıb ki, guya Türkiyə Suriyada olan döyüşçüləri Azərbaycana gətirib. Guya gətirilən döyüşçülərin sayı 500 ətrafındadır. Amma iş ondadır ki, Azərbaycanın vəziyyəti Ermənistanla müqayisədə daha yaxşıdır. Bu fonda 500 suriyalı döyüşçü on minlərdən ibarət olan Azərbaycan Ordusuna hansı yardım edə bilər? Bu, heç fərli bir batalyon da deyil. Ancaq nəzərə alın ki, bizdə cəbhə boyunca korpuslar dayanır. 500 nəfərin gəlməsi hətta real olsa belə, bunun ordumuza hər hansı yardımı dəyə bilməz. Hesab edirəm ki, Ermənistan tərəfindən belə məlumatların yayılması təbliğat və təxribat xarakterlidir.

Həmçinin hesab edirəm ki, o tərəfdən də Liviya, İraq və ya Suriyadan döyüşçü-terrorçuları gətirsələr, bu onların ordusuna hər hansı bir keyfiyyət qata bilməz. Məncə, belə terrorçuların onlar tərəfindən Qarabağa və ya Ermənistana gətirilməsi daha çox təxribat işlərinə yaraya bilər. Amma real döyüşlər olsa Qarabağa gətirilən bu terrorçular o qədər də ciddi qüvvə kimi qəbul edilməyəcək. Bizə həm də o aydındır ki, Ermənistana real köməklik edə biləcək yeganə qüvvə Rusiyadır.

Reyting.az

Ana səhifəyə dön