Qabil Hüseynli: “Minsk Qrupunun davranışı ermənilərin çörəyinə yağ sürtməyə bənzəyir”

Politoloqun fikrincə, 2016-cı ilin aprelində olduğu kimi, lokal və qəfil zərbələr endirməklə erməniləri sülhə məcbur etmək olar

Ermənistanın Dağlıq Qarabağ münaqişəsi ilə bağlı aparılan danışıqları pozması, üstəlik, işğalçılıq siyasətini davam etdirərək separatçı rejimin “rəhbəri” üçün Şuşada saxta inaqurasiya mərasimi təşkil etməsi Minsk Qrupunun vasitəçiliyi ilə aparılan danışıqların əhəmiyyətsiz olduğunu bir daha göstərdi.

Azərbaycanın sabiq dövlət müşaviri, politoloq Qabil Hüseynli Reyting.az-a müsahibəsində deyib ki, Ermənistan tərəfi münasibətləri korlamaqda davam edirsə və həm də daima təxribatlar törədirsə, deməli, əslində danışıqlar prosesini pozmaq istəyir:

- Hətta danışıqlar masası arxasına gəlmələri də, əslində vaxt udmaq üçün istifadə etdikləri taktika kimi ortaya çıxır. Onların bu addımlarını hərbi yolla əldə etdiklərini praktikaya çevirmək taktikası kimi dəyərləndirmək lazım gəlir. Bu baxımdan Azərbaycan tərəfi Ermənistanın hərəkətlərini dəqiqləşdirməli və buna uyğun olaraq özünün taktiki addımlarını müəyyənləşdirməlidir.

- Yeni erməni strategiyasının mahiyyətində nə durur?

- Əslində bu, çox qorxulu strategiya və ondan irəli gələn taktiki addımlardır. Bu strategiya və ona uyğun atılacaq addımları anlamaq üçün elə də böyük düşüncə lazım deyil. Onlar status-kvonun dəyişməməsi üçün işləyirlər. Erməni tərəfi həm beynəlxalq ictimai rəyə, həm də Azərbaycan dövlətinə meydan oxuyur. Faktiki olaraq qarşıdurmanı tətikləyən addımlar atır. Bu da, bizim uyğun taktiki addımlar atmağımızı qaçılmaz edir.

- Bu halda Azərbaycanın Ermənistana təsir etməsi üçün əlində hansı alətləri qalır?

- Hələlik ermənilər özlərinin köhnə ritorikasından istifadə edərək danışıqlar prosesinin mövcud olması və davam etməsini təkid edəcəklər. Danışıqlar fomatı, Minsk Qrupu onlar üçün sadəcə görüntüdür. Vasitəçilər onların əlaltından işləyib həyata keçirdikləri təxribatları ört-basdır etmək üçün bir vasitədir. Ona görə də, danışıqlar prosesi bərpa olunsa belə, Azərbaycan tərəfi məsələni qəti qoymalıdır. Yəni Qarabağdakı son qondarma seçkiləri, Şuşada keçirilən və Azərbaycanın tarixi əhəmiyyətli günləri ilə eyni günə salınan saxta inaqurasiya məsələsini masaya qoymalı, açıq şəkildə bildirməlidir ki, ermənilər Cənubi Qafqazı çalxalamaq, müharibəni yenidən başlatmaq istəyirlər. Bu cür qeyri-səmimi və riyakar addımların rəsmi Bakı tərəfindən qəbul edilmədiyi vurğulanmalı, bu başdan ATƏT, BMT və dünya ictimaiyyətinə xəbərdarlıq olunmalıdır ki, Azərbaycanı zorla müharibəyə cəlb etmək istəyirlər. Faktiki Azərbaycanın işğal olunan ərazilərini BMT qətnamələrinə rəğmən qaytarmaq istəmirlər, XXI əsrdə orta əsirlərin təfəkkürü ilə işğal və torpaqları mənimsəmə siyasətinə çalışırlar. Azərbaycan belə hiyləgər münasibətlərə dözməyəcək və buna adekvat addımlar atacaq. Belə bir vəziyyətin yaranmasının məsuliyyəti Ermənistanın üzərinə düşəcək. Hesab edirəm ki, Azərbaycan bu mövqeyi danışıqlar prosesində və diplomatik kanallar vasitəsilə maraqlı tərəflərə çatdırmalıdır.

- İndiki situasiyada həmsədr adlandırdığımız ABŞ, Rusiya və Fransadan olan diplomatların, ümumilikdə Minsk Qrupunun üzərinə hansı məsuliyyət düşür?

- Həmsədrlər indiyə qədər qeyd edirdilər ki, onlar vasitəçilik, sülhyaratma missiyasını həyata keçirirlər. Yəni danışıqlar baş tutursa və tərəflər danışıqlarda iştirak edirlərsə onlar da öz missiyasını həyata keçirdiklərini düşünürlər. Və danışıqlar masası üzərinə hansı məsələlərin çıxarılmasına qarışmırlar və deyirlər ki, onların işi bundan ibarətdir.

Azərbaycan tərəfi indiyə qədər həmsədrlərdən tələb edirdi ki, Ermənistana təzyiqlər göstərsin, amma həmsədrlər təzyiq göstərmək ixtiyarları olmadığını qeyd edirdilər. Həmçinin, Ermənistanı sülhə məcburetmə addımları atmağa məcbur edilməsinə dair tələblər qarşısında həmsədrlər belə bir səlahiyyətlərinin olmadığı kimi qeyri-populyar cavablar verirdilər. Ancaq söhbət sülhyaratma prosesindən və münaqişənin doğurduğu nəticələri hərtərəfli aradan qaldırmaqdan gedirsə, həmsədrlər indiyə qədər ermənilərin tətbiq etdikləri taktikanın hiyləgər mahiyyətini anlamalıdırlar. Yəqin ki, anlayırlar, sadəcə, münasibətləri sadəlöhv şəkildə olur. Bu səbəbdən də Azərbaycan Minsk Qrupu həmsədrləri qarşısında məsələni konkret qoymalıdır ki, nəticə verən danışıqlar prosesini ya təmin edin, ya da bu formatın işləmədiyini etiraf edin. Bu məsələdə həm də kimin güahkar olduğunu və qeyri-konstruktuv rol oynadığını məyyənləşdirməli və həmin tərəfi ittiham etməlidirlər. Onlar indiyə qədər təcavüzdən, işğaldan danışır, amma işğalçının kim olduğunun adını çəkmək istəmirlər. Minsk Qrupunun özü də son dərəcə primitivdir, loyal davranış sərgiləyir və bu da ermənilərin çörəyinə yağ sürtməyə bənzəyir.

- Belə situasiyada Azərbaycan hərbi alətdən istifadə etməlidirmi və ya bu addım məcburi gündəmə gələcəkmi?

- Fikrimcə, başqa yolu yoxdur. İri miqyaslı müharibəyə getmək məsələsi hələ ölçülüb biçilməlidir. Ancaq 2016-cı ilin aprelində olduğu kimi, lokal və qəfil zərbələr endirmək taktikasından istifadə edərək ermənilərə aman verməməliyik. Özü də bu, ardıcıl xarakter daşımalıdır. Ermənilər hər gün onlara qarşı sarsıdıcı zərbə ola biləcəyini düşünməlidirlər. Yalnız belə sarsıdıcı və çəkindirici addımların köməyi ilə erməniləri sülhə məcbur etmək olar. Və ya başımızı aşağı salaraq yavaş-yavaş torpaqlarımızın işğaldan azad edilməsi prosesinə qoşulmalıyıq. Düzdür, bununla bağlı cəmiyyətdə müharibə ovqatının köklənməsi də lazımdır və bu da ayrı mövzudur. Cəmiyyət ciddi sürətdə erməni təcavüzünün ləğv edilməsi prosesinə köklənməlidir.

Reyting.az

Ana səhifəyə dön