Deputatlığa namizəd: “Mənim üçün Qarabağsız Azərbaycan yoxdur”

Zaur Əhməd deyir ki, seçkiyə haram qatılmasa, 120 saylı Cəbrayıl-Qubadlı dairəsində qalib olacaq

120 saylı Cəbrayıl-Qubadlı Seçki Dairəsindən deputatlığa namizəd, jurnalist Zaur Əhməd oğlu Məmmədov (Zaur Əhməd) Reyting.az-ın suallarını cavablandırır.

Həmin müsahibəni təqdim edirik:

- Zaur bəy, Sumqayıtda yaşasanız da, deputatlığa namizədliyinizi 120 saylı Cəbrayıl-Qubadlı Seçki Dairəsini vermisiniz. Niyə məhz bu dairə?

- Mən əslən Cəbrayıl rayonundanam, atam da, anam da Cəbrayılın Hacılı kəndində anadan olublar. Doğum haqqında şəhadətnaməmdə Sumqayıt yazılsa da, mən özüm də Cəbrayılda dünyaya gəlmişəm. Sumqayıtda böyüsəm də, ürəyim hər zaman Cəbrayılda olub. Hətta uşaqlıq arzularım, gələcək iş yerimi də Cəbrayılda düşünürdüm.

Mən bu dairədən bir dəfə də deputatlığa namizədliyimi irəli sürmüşdüm. 2010-cu ildə keçirilən parlament seçkilərində iştirak üçün namizədliyimi irəli sürsəm də, o vaxtkı deputatla rayon rəhbərliyi mənim namizədliyimin qeydə alınmasına imkan vermədilər. Yəni, bu dairə mənə yad deyil, eyni zamanda, mən də onlar üçün yad deyiləm.

Cəbrayıl adı olan tədbirlərin əksəriyyətində iştirak eləmişəm. Hansısa problem olanda da jurnalist kimi özümü kənarda qoymamışam.

- Artıq seçicilərlə görüşlərə başlamısınız. Onları narahat edən başlıca problemlər nədir və Sizin bu problemləri aradan qaldırmaq üçün hansı layihə və ya proqramlarınız var?

- Təbliğat-təşviqat kampaniyasına start veriləndən bəri görüşlərimiz başlayıb. Əslində imzatoplama kampaniyası dövründə seçicilərlə təmaslarım başlamışdı. Onlara millət vəkili olmaq istədiyimi bəyan edəndə ilk sözləri bu olurdu ki, bizim heç vaxt deputatımız olmayıb, bizə deputat nə edəcək ki? Mən isə ilk növbədə onlara Milli Məclisin funksiyaları, deputatın səlahiyyətləri və vəzifələrinin nədən ibarət olduğunu dedim. Üstəlik, onlara əsl deputatın necə olmasını izah elədim və inandırmağa çalışdım ki, millət vəkili sizin sözünüzü deməlidir. Əgər siz seçkiyə getməsəniz, sizin adınızla kimlərsə saxta yolla deputat seçilsə, o zaman həmin adam onu seçdirənlərə xidmət edəcək, sizə yox.

Mənə elə gəlir ki, söhbət edə bildiyim insanları inandıra bilmişəm. Ən azı onların seçkiyə gələcəyinə inanıram. Öncə insanlarda seçkiyə inamı bərpa etmək lazımdır. Seçici onun səsinin nəyisə dəyişmədiyini düşünür.

Mən bu yola inanaraq çıxmışam. Öncə özüm inandım. Sonra ətrafımdakıları inandıra bildim, artıq görüşdüyüm insanlarda inam yarada bilmişəm.

Doğrudur, hələ də seçkiyə inanmayanlar var, amma onlar da 9 fevraldakı qələbəmdən sonra seçkiyə inanacaq. Çünki bu dairənin qalibi mənəm.

- Bu qədər əminlik hardandır?

- Cəbrayılda kifayət qədər nüfuza sahib olan şəxslər məni dəstəklədiklərini bildiriblər. İstər fərdi görüşlərdə, istər kütləvi tədbirlərimizdə, istərsə də sosial şəbəkələrdə aldığım mesajlar, çağırışlar, dəstək müraciətləri o dairədəki seçkidən qalib çıxacağıma əminlik yaradır. Məncə, seçkiyə haram qatılmasa, inandığımız insanlar məntəqələrə gəlsə, qələbə bizim olacaq.

- Atanız Əhməd Məmmədov Azərbaycanın bütövlüyü uğrunda döyüşlərdə şəhid olub. Bu gün şəhid ailələrinin əhəmiyyətli hissəsi sosial-iqtisadi problemlər məngəsində sıxılır. Deputat seçicələyiniz təqdirdə bununla bağlı hansı addımlar atmaq fikriniz var?

- Bu məsələ hər zaman mənim üçün prioritet olub. Şəhid ailələri, Qarabağ qaziləri, müharibə veteranları hər zaman diqqətimdə olublar. Jurnalist fəaliyyətimi izləyənlər bilirlər ki, bu kateqoriyadan olanların problemini, dərdini öz dərdim kimi qəbul edib ictimailəşməsinə və problemin həllinə çalışmışam. Hesab etmişəm ki, şəhid ailələrinin, qazilərin vəkiliyəm. Və bu vəkilliyi borcum hesab eləmişəm. İndiyə kimi yüzlərlə şəhid ailəsinin, qazinin, döyüşçünün problemlərinin həllinə nail olmuşam. Dövlətin bu kateqoriyadan olan şəxslərə diqqəti və qayğısı var. Amma bu, yetərlidirmi? Məncə, yox. Zaman-zaman deputatları bu məsələlərə görə qınamışam. Düşünürəm ki, Milli Məclisdə oturan hər bir kəs şəhid, qazi adına həssaslıqla yanaşmalıdır. Mən özüm bu ailələrdən birinin üzvüyəm. Onların hansı problemlər yaşadıqlarını çox yaxşı bilirəm. Əgər mənə etimad göstərilərsə, millət vəkili seçilərəmsə, hər şeydən öncə şəhid ailələri və qazilərin problemlərinin həllini ön planda saxlayacağam. Çünki bu millət şəhidlərə, qazilərə, döyüşçülərə borcludur. Onların haqqını tanımayanlar heç bir haqqı tanımaz.

Mən boğazdan yuxarı danışanları çox görmüşəm, amma sözdən əmələ keçəndə hamısı öz cibini düşünüb. Millət vəkili cibini düşünməməlidir. Kimə cib maraqlıdırsa, getsin alverini eləsin, Milli Məclisdə nə işi var?

Jurnalist kimi bacardığımı eləmişəm, amma daha böyük işlər üçün böyük meydan, hündür tribuna lazımdır.

Mən bir rayonun deyil, millətin vəkilli olmağı hədəfləmişəm. Qarşımıza daş itələməsələr, o haqq bizimdir. Haqqı demək üçün söz haqqını xalqdan alacağıq.

- Seçiciləriniz məcburi köçkünlərdir. Onlarla bağlı nə düşünürsünüz?

- Mənim bütün qohum-əqrəbam məcburi köçkündür. Onların hansı həyat yaşadıqlarını çox yaxşı bilirəm. İllərlə hansı məhrumiyyətlərdən keçdiklərini görmüşəm, o əzabı hiss etmişəm. Təbii ki, son illər köşkünlərin sosial problemlərinin həlli, mənzillə təminatı sahəsində çox böyük işlər görülüb. Minlərlə insan yeni mənzillərlə təmin olunub. Bu, müsbət haldır, lakin hər bir köçkün üçün daha vacib bir məslə var – öz doğma yurduna qayıtmaq.

Son illər sosial şəbəkələrədə “qarabağlılar Qarabağı istəmir” kimi təbliğat aparanlar var. Qətiyyən belə deyil. Kimlərsə sosial problemlərin ağırlığından başqa istəklərdə çıxış edə, hətta kimlərsə Qarabağı unuda bilər. Amma əmin ola bilərsiniz ki, bütün köçkünlər özünü hər yerdə qonaq kimi hiss edir. Hamı inanır ki, yaxın müddətdə öz elinə, obasına, doğma Qarabağına qayıdacaq. Bunu istər ölkə daxilində, istərsə də beynəlxalq miqyasda hər kəs bilsin.

Biz Qarabağsız Azərbaycan təsəvvür eləmirik. Mənim üçün Şuşasız, Laçınsız Qarabağ ola bilməz, eləcə də Qarabağsız Azərbaycan yoxdur. Odur ki, bir millət vəkili kimi köçkün camaatın problemlərinin həlli üçün çalışacağam. Amma hər şeydən öncə biz Qarabağ problemini həll etməliyik. Bütün problemlərin başında Qarabağ dayanır. Bu problem həllini tapsa, bizim camaatın problemi öz yoluna düşəcək. Hesab edirəm ki, namizəd olduğum dairənin seçicilərinin mütləq əksəriyyətin bu düşüncədədir. Elə buna görə də 9 fevralda seçimlərim bizdən yana edəcəklər.

Ana səhifəyə dön