Deputat: “Siyasətə o adamlar gələcək ki...”

Araz Əlizadə: “Parlamentdə Siyavuş Novruzov YAP-ın parlamenti buraxmaqla bağlı müraciətini oxudu. Sonra əlavə etdi ki, digər partiyalar və bitərəflər də öz fikirlərini desinlər. Ancaq mənə, Tahir Kərimliyə, Fərəc Quliyevə növbə çatmadı”

Milli Məclisin buraxılması, növbədənkənar parlament seçkiləri, siyasi partiyaların seçkidə iştirakı məsələsi Azərbaycanın ictimai-siyasi həyatında əsas müzakirə mövzularından biridir.

Azərbaycan Sosial Demokrat Partiyasının sədri, deputat Araz Əlizadə Reyting.az-a müsahibəsində həm növbəti seçkilərdən, həm parlamentin yeni tərkibinin gəncləşmə ehtimalından, həm də yeni təyinatlardan danışıb.

- Araz bəy, Milli Məclis buaxıldı, yeni seçkilər keçiriləcək. Sizin yeni seçkilərlə bağlı mövqeyiniz necə olacaq?

- Seçkilərə normal baxıram. Qeyd edim ki, biz noyabr ayında faktiki büdcə ilə məşğul olmağa başladıq. Büdcə müzakirələrinə uzun müddət hazırlaşmaq lazımdır. Demək olar, vaxtımızın əsas hissəsi bu işə sərf olundu. Yazda seçiləcək parlamentin isə vaxtı olacaq ki, hər şeyi götür-qoy etsin və işləsin. Bir var, gəlirsən, büdcəni verirlər və bir həftə vaxtın olur, bir də var ki, sən büdcə üzərində sakit və rahat məşğul olursan...

- Açıq deyilməsə də, bəzi deputatlar Milli Məclisin buraxılmasını elə də xoş qarşılamadılar. Sizin də narazılığınız varmı?

- Yox, mənim heç bir etirazım yoxdur. Həm də yeni seçkilərlə bağlı zəhməti əvvəl-axır çəkməliyik. Yeddi ay gec və ya tez olmasına baxmayaraq.

- Yenidən namizəd olmaq, deputat mandatı əldə etmək niyyətiniz varmı?

- Seçkidə iştirak məsələsinə partiyamızın Mərkəzi Komitəsi qərar verəcək. Namizədliyimi irəli sürərlərsə, mən də seçkidə iştirak edərəm.

- Ölkədə həm kadr, həm də struktur islahatları aparılır. Vəzifəyə nisbətən gənclər gətirilir. Buna münasibətiniz necədir?

- Sizin fikrinizcə, indiki parlament yaşlı idi? Siz bizim parlamentin orta yaşını bilirsinizmi? Jurnalistlər yazır ki, qocalardır, getsinlər və s. Ancaq bir jurnalist tənbəlliyindən parlamentin orta yaşını hesablamayıb. Azərbaycan paramentində orta yaş 59-dur. 59 yaş qocadır? İnsafınız olsun da... Təsəvvür edin, gəlsinlər 28-35 yaşlılar. Onlar həyatda nəyə nail olub, nəyi bilirlər ki, nə də etsinlər?

Əgər parlamentə yaxşı karyera quran adamlar gəlsəydi, mən bunu başa düşərdim. Görərdim ki, sənayedə, biznesdə, elmdə böyük uğurlar qazanıblar. Kimlər gələcək, Əli Kərimli və ya oğlu?

- Əli Kərimli və oğlunun məsələyə bir aidiyyəti varmı?

- Deyirsiniz cavanlar, mən də cavanlardan danışıram. Əli Kərimlinin oğlu İngiltərədə pul xərcləməkdən əldən düşüb.

- Son məlumatlara görə, Kərimlinin oğlu İngiltərədə deyil, ABŞ-da işləyir...

- Lap yaxşı, bu məni maraqlandırmır. Mən tələbə vaxtı olan hadisələrdən, xərclədiyi pullardan danışıram.

- Amma bizim bəzi məmurların övladları da Avropada az oyunlardan çıxmayıblar...

- Mən demirəm ki, xaricdə təhsil almaq olmaz. Oxumaq lazımdır, səhərdən axşama qədər restoran və barlarda əylənmək yox. Yəni kimliyindən asılı olmayaraq xaricə oxumaq adı ilə gedib restoralarda məcarə axtaranlar avaralardır.

- Sonradan da gəlib karyera qura, hətta deputat mandatı da qazana bilirlər...

- Bu halda ondan xalqa nə xeyir gələcək?

Mənim imkanım var idi ki, oğlumu hansısa fondun sayəsində xaricə göndərim. Amma mənim imkanım olmayacaqdır ki, sonradan ona pul göndərim.

Həm də düşündüm ki, mən burada təhsl almışam və özümü axmaq hesab etmirəm. Oğlum da burada oxuyub peşəkar ola bilər. Burada təhsil aldı və hazırda peşəkardır.

- Oğlunuz həm də sədri olduğunuz partiyanın funksioneridir?

- Funksioner maaş alar? Oğlum ictimai əsaslarla partiyada müavindir.

- Növbədənkənar seçkilərdə onun da namizədliyi irəli sürüləcək?

- Hər şey ola bilər. Buna partiyanın Plenumu qərar verə bilər.

- Normalda partiya seçkilərə gedirsə, onun əsas siması olan sədr və müavinləri, eləcədə Məclis üzvlərinin namizədliyi irəli sürülür. Elə deyilmi?

- Bizim partiya seçkidə eyni vaxtda 15 namizədlə çətin iştirak edər. Çünki maddi imkanlarımız yoxdur.

- Parlamentə gənclər gəlməlidir?

- Gəlməlidir, amma həyatda nəyəsə nail olduqdan sonra. Əslində gələcəkdə partiyaların əhəmiyyəti bir az da aşağı düşəcək. Siyasətə o adamlar gələcək ki, yaxşı təhsil alıblar, peşə kayerası qurublar.

- Bəs maliyyə?

- Sözsüz ki, yaxşı maliyyə olmalıdır. Əslində insan yaxşı mütəxəssisdirsə və yaxşı karyera qurubsa, yaxşı da pulu olacaq.

- Dövlət idarəçiliyinə gənclər gətirilir. Bununa paralel olaraq sanki “qocalar getməlidir, gənclər gəlməlidir”,- formatında bir kampaniya da aparılır. Hətta Prezident də belə kampaniyaya etirazını bildirdi və bunun yolverilməz olduğunu ifadə etdi. Siz, gənclərin idarəçiliyə gətirilməsinə necə baxırsınız?

- Məncə, belə kampaniya doğru deyil. Məsələn, düşünmürəm ki, gənclər arasında Xoşbəxt Yusifzadəni (ARDNŞ-in vitse-prezidentin nəzərdə tutur-red.) əvəz edəcək şəxs yoxdur.

- Amma Ramiz Mehdiyevi əvəz edəcək nisbətən gənc tapıldı...

- Mən sizə kimdən misal çəkirəm, siz mənə kimdən danışırsınız. Ramiz Mehdiyev çox gözəl aparat işçisi idi və böyük məktəb keçmişdi. Komsomolda, partiyada...

Gəldilər də, bəylər. Nəticəsini gördünüz. Çünki heç bir məktəb keçməmişdilər. İsa Qəmbər 12 il tenis oynadı. Mən 12 il hər gün tenis oynasaydım dünya çempionu olardım.

- Açığı, parlamentin plenar iclaslarında əsasən 5-6 deputat çıxış edir, məsələlər qaldırırdı. Sizcə, Milli Məclisdə çoxmu deputat xalqın problemlərini qaldırır, təkliflər irəli sürürdü?

- Siz jurnalistlər parlamentin işindən baş çıxara bilməmisiniz...

- Demək istəyirsiniz ki, bütün deputatlar komitələrdə məsələlər qaldırır və plenar iclasda susurlar?

- Plenar iclaslara diqqətlə qulaq asırsınız, amma orada heç nə həll edilmir. Komitələrdə müzakirələr aparılır, təkliflər irəli sürülür, qanun layihəsi plenar iclasa tövsiyə olunur. Plenar iclasa düymə basmağa gəlirlər. Plenar iclaslarda əsasən eyni adamlar fəallıq göstərir və onlar jurnalistlər üçün çıxış edirlər.

- Proqnozunuz necədir, parlamentin tərkibi çox dəyişəcək?

- Mən bunu deyə bilmərəm. Parlamentdə üstünlük YAP-dadır. Bu da YAP-ın daxili işidir. YAP namizədlər irəli sürəndə bu hiss ediləcək.

- Qəribədir, Milli Məclisdə hamı çıxış edib deyir ki, parlament gəncləşməli, ora yeni enerji və ab-hava gəlməlidir. Bunu necə izah edə bilərsiniz?

- Hamısı çıxışında yeniləşmə fikrini işlədirdi. Mənə maraqlıdır, onlar özləri namizədliyini irəli sürəcək, ya sürməyəcək. “İndiki parlament getməli, yerinə gənclər gəlməlidir”,- sözünü o adamlar deməlidir ki, həmin şəxslər namizədliklərini irəli sürməsinlər.

Müzakirələr zamanı məni gülmək tutdu. Niyə? YAP Siyasi Şurası qərar qəbul edib, deputatlar toplaşıb bu qərarı dəstəklədi. Parlamentdə Siyavuş Novruzov YAP-ın parlamenti buraxmaqla bağlı müraciətini oxudu. Sonra əlavə etdi ki, digər partiyalar və bitərəflər də öz fikirlərini desinlər. Ancaq tabloda çıxışa əsasən YAP-dan olan deputatlar yazılmışdı. Məsələn, mənə, Tahir Kərimliyə, Fərəc Quliyevə növbə çatmadı.

- Növbə çatsaydı qeyri-adi nəsə deyəcəkdiniz?

- Deyəcəkdim ki, yeni parlamentdə plenar iclaslarda çıxışlar zamanı irəli sürülən təkliflər səsverməyə çıxarılsın. Bu plenar iclasın fəaliyyətini canlandırardı. Təkliflərimdən biri bu idi. Hamısı təriflədi, dedilər ki, əladır, parlament buraxılsın.

Reyting.az

Ana səhifəyə dön