Mələk xalanın qazları » arxiv.reytingaz.info

Akif ABBASOV

(hekayə)

Şabranın dağ kəndlərinin birində Meybulla adlı bir kişi yaşayırdı. Mələk adlı arvadı, Beydulla adlı oğulları vardı. Kənd yeridir. Yəqin ki, bir uşaqla kifayətlənməzdilər. Başqa oğul-uşaqları da olmamış olmazdı.

Bu Mələk xalanın 50 qazı vardı. Bu qazların üstündə əsirdi.

Kənd yeridir. Həyət-baca itsiz olmaz. Meybulla da vaxtilə bir küçük gətirib həyətə atmış, o da böyüyüb it olmuşdu. İt deyirəm, ha! Allah eləməsin zəncirindən açıla. Aləmi bir-birə qatardı.

Günlərin birində Meybulla rayon mərkəzinə getməli oldu. Vacib işi vardı. Ləngiməli olsaydı, orda gecələyəcəkdi. Hər şey də o gedəndən sonra başladı.

Alabaş zəncirindən açılmışdı. Yaxşı ki, həyət qapısı bağlı idi. Amma evin heyvanlarına, quşlarına da ziyan vura bilərdi. Mələk xalanın əli Meybullaya çatmırdı, mobil telefona da cavab vermirdi. Bir də ki, bu Alabaş dinc durmasaydı, Meybulla gələnə kimi onsuz da bildiyini edəcəkdi. Mələk xala təcili bir tədbir görməli idi. Gördü də.

Kənd yerində qoyun-quzu, toyuq, qaz, ördək, hindquşu olduğundan qəfil qonaq gələndə adam “nə edim, necə edim?” - dilemması qarşısında qalmırdı. Amma bu kişilərin qarşısına dünyanın ən ləzizi xörəklərinin, tamlarının, mer-meyvəsinin hamısını düzəsən, xeyri olmayacaq, bildirməsə də, əgər süfrədə spirtli içki olmasa, narazı qalacaq.

Qonaq gələndə mağazaya qaçmağı xoşlamayan Meybulla həmişə evdə ehtiyatda 4-5 şüşə araq saxlayardı.

Mələk xala tez araqlardan bir neçəsini götürüb həyətin bir küncündəki ləyənə boşaldı. Diqqəti onda olan Alabaş yaxın gəlib başladı içməyə. Bayaqdan həyəti dörd dolanan, nə isə bir ziyan vermək barədə fikirləşən it sanki sakitləşmişdi və çox keçmədi ki, başını yerə qoydu. Mələk xala tez gəlib onu zəncirlədi.

Mələk xanım dərindən nəfəs alıb evə keçdi. Az sonra ləyənə qazlar daraşdılar. İçdiklərini içib hinlərinə girdilər.

Yadulla dərsdən gəlmişdi. Mələk xala ona müraciətlə:

- Qazlar gözümə dəymir, a bala. Bax gör hindədirlər.

Yadulla gedib baxdı, başı alovlu anasının yanına qayıtdı:

- Ay ana, qazların hamısı ölüb.

Mələk xala saçlarını yoldu:

- Nə danışırsan, ay oğul? Hamısı? Əllisi də?

Yadulla da qanı qara:

- Hə, ana, əllisi də, - dedi. - Zəhərləniblər yəqin. İki daşın arasında kim zəhərlədi bunları?

Mələk xala dinmədi. Özünü hinə saldı. Qazlar döşənmişdilər.

- Vay, vay! Bunlar üçün nə qədər zəhmət çəkmiş, dəninə nə qədər pul xərcləmişdim. Bütün zəhmətim hədər getdi. 50 qaz bilirsən, ay oğul, nə qədər pul deməkdir?

Mələk xala göz yaşlarını tökdü.

- Meybulla öldürəcək məni. Hamısı o çər dəymiş Alabaşın ucbatından oldu.

Yadulla təəccüblə anasına baxdı:

- Alabaşın bura nə dəxli? Bunlar harada belə zəhərləniblər?

Mələk xala dinmədi. Az keçmiş:

- Oğul, o qazlar daha heç nəyə yaramaz, - dedi. - Peyinliyə apar. Gecdir, sabah basdırarıq.

Beydulla Mələk xalanın dediklərini elədi.

Həmin gecə Mələk xala necə yatdığını bilmədi. Qanı it qanına dönmüşdü. Bir təhər səhəri açdı. Həyətə düşəndə gördü nə? 50 qaz həyətdə özləri üçün gəzib-dolanır. Mələk xanıma elə bil dünyanı bağışladılar. Qazlar hərəkətsiz qaldıqlarından, nəfəs belə almadıqlarından Mələk xala ilə Yadulla elə biliblərmiş ki, onlar ölüblər. Sən demə kefləniblərmiş.

Müəllifin bütün yazıları - Akif ABBASOV

Bütün yazarlar

Ana səhifəyə dön