Şalvar məsələsi » arxiv.reytingaz.info

Akif ABBASOV

(hekayə)

Tikinti idarələrinin birində iclas idi. Nazir müavini də gəlmişdi. Rəyasət heyəti iki nəfərdən ibarət idi. Yuxarı başda nazir müavini ilə direktor əyləşmişdi. Direktorun illik hesabatından sonra nazir müavini söz aldı. O, müəssisənin müsbət fəaliyyətini qeyd etməklə yanaşı görülməsi vacib olan məsələlərin üzərində də dayandı.

İşçilər sakitcə dinləyir, hərə öz payını götürürdü. Baş mühəndisin müavini Teymur da qabaq cərgədə oturmuşdu. Onun 70-ə yaxın yaşı vardı, iclasla heç arası yox idi. İclasların əleyhinə deyildi, amma xoşu da gəlmirdi. Ona görə ki, bir az oturandan sonra mürgüləyirdi. Bu isə yaxşı əlamət deyildi. Həm iclasa, həm də çıxış edən şəxsə hörmətsizlik sayıla bilərdi. Üstəlik, çəkiliş olurdusa, yuxulu vəziyyətdə ekrana düşərdi. Bu lap pis.

Nazir müavini hələ sözünü qurtarmamışdı:

- Əziz yoldaşlar, siz tənqiddən nəticə çıxarmalı, fəaliyyətinizdə dönüş yaratmalısınız...

Birdən iclas zalında canlanma yarandı. Nazir müavini çıxışını kəsdi. Teymur kişi ayağa qalxmışdı. Direktor öz-özünə: “Bu kişi niyə ayaq üstə dayanıb? İcazə almadan çıxış etmək istəyir? Bu, ən azı hörmətsizlik, özbaşnalıqdır! Axı nazir müavini hələ sözünü bitirməyib. Onun sözünü kəsmək nə deməkdir?”

Hamı diqqət kəsilmişdi. Nazir müavini də baxırdı. Teymur kişi köynəyini çıxarıb bayaq əyləşdiyi stulun üstünə tulladı. Sonra əlini belindəki kəmərə atdı. Onu açmağa başladı. Hamının gözü dörd olmuşdu. Şalvarını çıxarmaq istəyəndə tez onun başının üstünü kəsdirdilər. Onu qucaqlarında qonşu otağa apardılar.

Nazir müavini başını bulayıb sözünə davam etdi və çıxışını yekunlaşdırdı. Tezliklə iclas bitdi. Direktor nazir müavinini yola salıb baş mühəndisi çağırdı:

- Bu nə oyun idi Teymur kişi çıxardı?! Hələ Allah üzümüzə baxdı ki, şalvarını əynindən çıxarmamış onu otağa apardılar. Nazir müavininin, qadınların, qızların yanında bu nə axmaq hərəkət idi.

Baş mühəndisin güldüyünü görüb:

- Niyə gülürsən? Düz demirəm? Yoxsa Teymurun hərəkəti xoşuna gəlib?!

Baş mühəndis cavabında:

- Maraqlandıq, - dedi. - Bilirsiniz nə söylədi?

- Nə?

- Dedi ki, yuxulamışdım. Yuxuda arvadım gəlib məni oyadaraq, dedi ki, a kişi, pallı-paltarlı niyə yatırsan. Dur, əynini soyun, rahat yat. Mən də iclasda olduğumun fərqinə varmadan qeyri-ixtiyari, yarım yuxulu onun sözünə əməl etdim. Bağışlayın. Xəcalətimdən özünə yer tapmıram. Axırıncı dəfə olsun.

Direktoru da gülmək tutdu:

- Bəh, bəh. İşimizə bax. Nazir müavininin yanında biabır olduq. Gedib nazirə də deyəcək.

Baş mühəndis sözünə davam etdi:

- Hə, amma, Teymur pis adam deyil. Bir az xəstəliyi də var. Üzr istədi. Məsləhətdirsə, dəyib-dolaşmayaq, həm də bu məsələyə bir daha qayıtmayaq. Onsuz da utanır.

Direktor:

- Yaxşı, - dedi. - Bundan sonra gedib arxa cərgələrin birində əyləşsin, kimsə ona nəzarət etsin. Yaxşımı?

- Yaxşı.

Bakı şəhəri, 21 mart 2024-cü il

Müəllifin bütün yazıları - Akif ABBASOV

Bütün yazarlar

Ana səhifəyə dön