Ən yaxşı antilop » arxiv.reytingaz.info

Akif ABBASOV

(Nağıl - İngilis dilindən tərcümə edəni Akif ABBASOV)

Antiloplar meşədə bir yerə yığışmışdılar. Onlar iclas keçirməyə hazırlaşırdılar. Antiloplardan hansının daha yaxşı olduğunu öyrənmək istəyirdilər. Eland nizam-intizam yaradana qədər onlar dil boğaza qoymadan, bir-birinə aman vermədən danışırdılar. Eland antilopların ən böyüyü idi. O dedi:

- Biz toplaşmışıq ki, çox mühüm bir məsələni həll edək. Bizdən kimin ən yaxşısı antilop olduğunu bilək. Danışmaq istəyən söz ala bilər. Sonra biz səs verəcəyik. Əlbəttə, fikirləşmirəm ki, kimsə danışacaq. Çünki gün kimi aydındır ki, ən yaxşı antilop ən böyük olandır. Deməli, mənəm.

Səslər ucaldı. Antiloplardan biri ayağa qalxdı:

- Mən Elandla razılaşmıram. Birisinin yekəpər olması bir elə əhəmiyyət daşımır. Belə fikirləşirəm ki, ən yaxşı antilop yaxşı buynuzları olan və daha sürətli qaça biləndir. Demək, hər biriniz mənimlə razılaşar ki, mən ən yaxşısıyam.

Sonra dörd buynuzu olan kiçik antilop ayağa qalxdı. Onun iki buynuzunun qarşısında çox kiçik iki buynuzu da vardı. O dilləndi:

- Belə fikirləşirəm ki, buynuzun çox böyük əhəmiyyəti var. Ona görə yaxşı olar ki, buynuzların olsun. Lakin ən qəşəng və zərif olan və özünü gözə soxmayan antilop ən yaxşı antilopdur.

Başqa bir antilop söhbətə qoşuldu:

- Sən səhv edirsən. Bu barədə heç nə bilmirsən. Hər şey antilopun adından asılıdır. Mənim adım kimi heç kimin gözəl adı yoxdur. Bir fikir verin - Kudu! Odur ki, aydındır, mən ən yaxşı antilopam.

Antiloplardan biri dedi ki, ad çox da böyük əhəmiyyətə malik deyil. Antilopun balaca və gözəl, yaraşıqlı buynuzları, iri gözləri olmalıdır. Buynuzlar həm də çox uzun yox, lazım gələn uzunluqda olmalıdır. Daha bundan savayı nə istəyirsiniz?

Sonra yenə hərə bir tərəfdən danışmağa başladı və ağız deyəni qulaq eşitmədi. Axır ki, hamı sakitləşdi və Eland yenə ayağa qalxdı:

- Belə fikirləşirəm ki, səsvermənin vaxtıdır.

Beləliklə, antiloplar növbə ilə səslərini verməyə başladılar. Onlar qumun üstündə hamar yer tapıb, ayağı ilə ən yaxşı hesab etdikləri antilopun adını yazırdılar. İş tamama yetəndə Eland və Kudu səsləri hesabladılar. İclasda çoxlu antilop iştirak etdiyi üçün səsvermə uzun çəkdi. Onlar öz işlərini tamama yetirəndə gülməkdən uğunub getdilər. Göz yaşları yanaqlarından axırdı. Nəhayət, Eland özünü ələ alıb sözə başladı:

- Xanımlar və cənablar! Təəssüf hissi ilə deyirəm ki, məsələ hələ də həll edilməmiş qalıb. Hamı özünə səs verib və heç kim bir səsdən artıq səs toplaya bilməyib. Beləliklə, xanımlar və cənablar, sizin hər biriniz ən yaxşı antilopdur!

Müəllifin bütün yazıları - Akif ABBASOV

Bütün yazarlar

Ana səhifəyə dön