Xanım Tviddlin qızılı » arxiv.reytingaz.info

Akif ABBASOV

(İngilis nağılı - Tərcümə edəni Akif ABBASOV)

Biri vardı, biri yoxdu. Xanım Tviddl adında yaşlı bir qadın vardı. Onun mətbəxindəki baca elə gündə idi ki, əməlli-başlı təmizlənməyə ehtiyacı vardı. Qarı süpürgəsini götürüb, bacaya dürtdü və qurumla birlikdə on dənə qızıl pul aşağı düşdü. Xanım Tviddlin heyrətinin və sevincinin həddi-hüdudu olmadı. O dedi:

- Gedib qonşularıma əhvalatı danışacağam.

Xanım Tviddl qızıl pulları stolun üstünə qoydu. Qaçaraq bu barədə rəfiqələrinə deməyə getdi. Kənd qadınlarının su götürdükləri və dayanıb söhbət etdikləri quyunun yanına gəlib çıxdı və ucadan dedi:

- Bir mənə qulaq asın. Mən daxmamın bacasından on dənə qızıl tapmışam. Dedim sizinlə məsləhətləşim. Deyin görüm, indi mən nə etməliyəm?

Hamı bir ağızdan:

- Yaxşı, çox yaxşı, - dedilər. - Bu sənin üçün gözəl sərvətdir. Onu yaxşıca qorumalısan. Ətrafda çoxlu qaçaq-quldur var. Onu hara qoymusan?

Xanım Tviddl dedi:

- Onu mətbəxdəki stolun üstünə qoymuşam.

Rəfiqələri onu danladılar:

- Sən nə axmaqsan! Bizimlə gedək. Kənd mağazasındakı etibarlı çantanı sənə göstərərik. Onu alar, pullarını orada saxlayarsan.

Xanım Tviddl mağazaya gedib çantaya baxdı və dedi:

- Onu alıram. Pullarımı bu çantada saxlayacağam.

Satıcı:

- Əgər oğrular gəlməli olsalar, çantanı asanlıqla götürüb aparacaqlar. Pullarını çantaya qoy, sonra da yaxşı və möhkəm bir qutu al, çantanı onun içərisinə qoy. Quldur ağır qutunu apara bilməz. Bu barədə nə fikirləşirsən? Məndə lap bir ağırı var.

Xanım Tviddl dedi:

- Bu, yaxşı qutudur. Onu alıram. Əminəm ki, heç bir quldur onu götürüb apara bilməz. Mən özüm onun bir tərəfini güclə qaldıra bilərəm. Qızıllarım orada təhlükəsiz olacaq.

Rəfiqələri soruşdular:

- Evdən çıxıb bir yerə gedəndə daxmanın qapısını qıfıllayırsan? Yəni kilidin var? Əgər qapını qıfıllamasan, sən olmayanda quldurlar evə girər. İki nəfər əziyyətsiz o qutunu qaldırar. Yaxşısı budur, qapı üçün təzə kilid və açar al. Belə etsən, pulların üçün təhlükə olmaz.

Satıcı:

- Məndə təzə kilid və açar var, - dedi və qadına kilidin təzəsini və parıldayanını göstərdi. - Bu kilid qapının üstündə olanda quldurlar evə girə bilməzlər.

Xanım Tviddl dedi:

- Kilidlə açarı alıram. Alsam, qızıllarımın təhlükəsiz olduğunu bilərəm.

Satıcı:

- Lazım olan bütün şeyləri sənin daxmana gətirərəm, - dedi. O, oğlu ilə qutunu qadının evinə apardı. Xanım Tviddl möhkəm çantanı aparırdı. Onun içərisinə kilidlə açarı qoymuşdu. Onlar evə çatanda satıcı qapıya kilid vurdu. Sonra alınan şeylərin pulunu ödəməyi tələb etdi:

- Çantaya görə iki funt, böyük qutuya görə 6 funt, kilidlə açara görə 1 funt verəcəksiniz. Bir funt da göstərdiyim xidmətə görə ödəməlisiniz.

Xanım Tviddl onları ödədi. Satıcı yoluna düzəldi. Xanım Tviddl fikirləşdi ki, gərək qızıllarını çantaya, çantanı qutuya qoysun ki, onlar təhlükəsiz yerdə olsun. Lakin o, qızıllarından əsər-əlamət görmədi.

Bəlkə siz bilirsiniz: o qızılları neylədi?

Müəllifin bütün yazıları - Akif ABBASOV

Bütün yazarlar

Ana səhifəyə dön