Marya İvanovna » arxiv.reytingaz.info

Akif ABBASOV

Marya İvanovna

Vladimir Sviridov
Rusiya Federasiyasi

Səhər erkən mağazaların birində bayram təntənəsi hökm sürməkdə idi. Satıcılar döşəməni yumuş, pəncərələri silmiş, piştaxtaların çirkini qaşıyıb təmizləmişdilər. Bir həftə olardı xəbər-xəbər dalınca gəlirdi ki, bəs Marya İvanovna məhz bu gün təşrif gətirir. Qastronomun bütün rəhbərliyi direktorun kabinetinə yığılmışdı. Dekabr ayı olmasına baxmayaraq stolun üstündə yaraşıqlı hindgülü nəzərləri oxşayırdı.

Kassir Veranın «kəşfiyyat» işində əla səriştəsi vardı. O, direktorun sərəncamı ilə iki daşın arasında lazımi məlumatı toplaya bilirdi. Qastronom işçiləri narahatlıq hissi keçirsələr də, əhval-ruhiyyələri yüksək idi. Bir də axı qonaq gözləyən hansı ev sahibi nigarançılıq keçirmir. Təşviş hissi ilə saatına baxan direktor axır dözə bilmədi. Şübhəsini boğmaq üçün müavini sorğu-suala tutdu. Müavini onu sakitləşdirdi:

- Siz heç narahat olmayın. Hər şey öz qaydasındadır. Hər yan tər-təmizdir, par-par yanır. Əyani təşviqatı təzələyiblər. Filatelistlərin müsabiqəsinə yekun vurulub.

Birdən qəssab Konkin direktorun kabinetinə soxulub, var gücü ilə bağırdı:

- Gəlir, gəlir!!!

Direktor güzgüdə özünə baxıb qalstukunu düzəltdi, saçına tumar verdi. Sonra isə:

- Nə var, nə hay-küy salmısan? Səni SƏDM-ə çağırırlar nədir? Səsin bütün mağazanı başına götürüb, - deyə Konkinə acıqlandı. Kabinetə sükut çökdü. O qədər keçmədi ki, qapının ağzında təxminən əlli yaşlarında, dodaqları açıq yerkökü rəngində boyanmış bir qadın göründü. Başının hərəkəti ilə onlarla salamlaşdı. İçəridəkilər xorla cavab verdilər:

- Salam, Marya İvanovna!

- İvan Petroviç, - deyə Borzova sözə başladı. - Mağazaya baxdım. Ümumiyyətlə, pis təsir bağışlamır. Sanitariya normalarına əməl olunur, təmizlik gözlənilir. Görünür, ictimai işlə aranız yaxşıdır.

Direktorun baxışlarından minnətdarlıq ifadəsi oxundu. Marya İvanovna isə sualı-suala calayırdı:

- İşçilər asudə vaxtlarını necə keçirirlər? Sizdə mükafat fondu necədir? İşçiləri təqaüdə necə yola salırsınız? Bununla əlaqədar tədbir-filan görürsünüzmü? Yubilyarın şərəfinə ziyafət verilirmi? Və nəhayət, sizdə belə tədbirlər tez-tez keçirilir? Bütün bunlar məni çox maraqlandırır.

O, çantasını açıb qeyd dəftərçəsini çıxartdı. Direktor dərsini yaxşı öyrənməyə adət etmiş çalışqan şagird kimi dürüst cavablar verirdi.

- İvan Petroviç, hər şey aydındır. Mağazanız rayonda nümunəvi mağazalardan biridir. Güman edirəm, sizinlə dil tapıb işləmək olar.

Qadın təskinedici tərzdə onun əlini sığalladı və stolun üstünə bir vərəq kağız qoydu:

- Hər şey burada yazılıb… Hə, yadıma düşmüşkən, özünə xidmət üzrə bir qrafik tutun. Mağazanı yığışdıracaq şəxslərin adlarını orada qeyd edin… Ey, bura baxın, bəlkə siz elə yalnız bayram günlərində yır-yığış edirsiniz, - dedi və zarafatla barmağını silkələyib qapıya sarı getdi. Ayrılarkən:

- Bir həftə sonra gələcəyəm, - dedi və getdi.

Uşaq təki sevinən adamlar direktoru atıb-tutmaq üçün irəli yeridilər. O isə xoşbəxt və məğrur bir tərzdə Borzovanın qoyub getdiyi kağızı götürüb televizor diktoru kimi təntənəli şəkildə oxumağa başladı:

“Xahiş edirəm, məni xadimə vəzifəsinə qəbul edəsiniz”…

Müəllifin bütün yazıları - Akif ABBASOV

Bütün yazarlar

Ana səhifəyə dön