Kamran Həsənli-Samir Piriyev qalmaqalı böyüyür

Kamran Həsənli-Samir Piriyev qalmaqalında adı çəkilən Ərhan adlı Türkiyə vətəndaşı saxlanılıb.
Reyting.az saytının xəbərinə görə, bu barədə ölkə.az-a Samir Piriyevin hüquqi nümayəndəsi Ruslan Əhmədoğlu məlumat verib:
"Kamran Həsənli iddia edirdi ki, Samir Piriyev pulu guya ona yox, Ərhan adlı Türkiyə vətəndaşına verib. İstintaq zərurət yarandığı üçün bununla bağlı Türkiyə prokurorluğuna Ərhan adlı şəxsin izahatının alınması üçün beynəlxalq tapşırıq göndərib. Əslində, Kamran Həsənlinin dələduzluğu çoxdan sübut olunmuşdu. Lakin havadarları onun həbs edilməsinə icazə vermirdi.
Ərhan adlı şəxs Turkiyədə polis tərəfindən həbs edilərək prokurorluğa gətirilib və izahatı Azərbaycan hüquq mühafizə orqanlarının verdiyi beynəlxalq tapşırığa uyğun olaraq Bakıya göndərilib. İzahatda Ərhan hər şeyi etiraf edərək bildirib ki, Kamran Həsənlinin danışdığı hər şey ağ yalandır, Samir Piriyevi cəmi bir dəfə görüb və həmin söhbətdə də mübahisələri düşüb.
Mübahisə zamanı Ərhan Samirə deyib ki, pulu Kamrana vermisən və ondan da istəyə bilərsən. Bu ifadəylə artıq aylardır bizim sübut eləyə bilmədiyimiz bütün hallar sübut olunur. Demək ki, Nərimanov Rayon Prokurorluğu doğrudan da düz qərar qəbul edib və faktla bağlı cinayət işi başladıb”.
S.Piriyevin hüquqi nümayəndəsi bildirib ki, sonradan Ərhan Kamran Həsənliyə zəng edərək, onu bu ifadə barədə xəbərdar edib: “Ən maraqlısı odur ki, ilyarımdır Türkiyə polisinin tapa bilmədiyi Ərhan adlı şəxs Kamran Həsənli və istintaqın köməkliyi ilə Bakıya gətirilir! İndi hər kəsə aydın olur ki, Kamran Həsənli bunu əvvəlcədən əlbir olduğu adamlarla necə həyata keçirib. Nərimanov Rayon Polis İdarəsində yenidən Ərhanla Samir üzləşir və üzləşmədə Ərhan deyir ki, özü bilərəkdən Türkiyədə prokurorluğuna səhv izahat verib. Guya pulu Samir Ərhana iki dəfəyə-(bir dəfə 30, bir dəfə 80 min) Türkiyədə verib. Ərhana sual verilir ki, bəs izahatında deyirsən ki, Samiri cəmi bir dəfə görmüşəm. Bəs pulu iki dəfəyə necə verdin? Cavab verir ki, "öyle söylemişimmi abi?" Əgər istintaqa beynəlxalq tapşırığın cavabı lazım idisə, bu cavab artıq istintaqda var və Kamran Həsənlinin dələduzduğunu sübut edir. Yox əgər istintaq türk həmkarlarına şübhə ilə yanaşırdısa, niyə bu beynəlxalq tapşırığı göndərirdi? Əgər yox, şübhəsi yoxdursa, Ərhan Azərbaycana niyə gətirilib yenidən izahat alınır və aylardır tapılmayan bu şəxs 2 günə Bakıda tapılır! İstintaq Ərhanın Türkiyə prokurorluğuna verdiyi izahatı rəhbər tutmalıdır, Nərimanov Rayon Polis İdarəsində verdiyi ifadəni yox. Çünki Türkiyə vətəndaşı Türkiyə qanunvericiliyinə görə yalan ifadə verdiyinə görə məsuliyyəti bilib deyə, doğru izahat verib. Amma Azərbaycanda onu hər hansısa məsuliyyət gözləmir deyə, burada fərqli izahat verir! Mən Samirin hüquqşünası kimi istintaqa nə lazım idisə kömək etdim. Və haqlı olduğumuzu sübut etdik. Gerisi qaldı hüquq-mühafizə orqanlarının verəcəyi ədalətli qərara!"
Qeyd edək ki, Kamran Həsənlinin Samir Piriyevə 85 min manat borcunun olduğu bildirilir və bu çəkişmə xeyli müddətdir davam edir.

Ana səhifəyə dön