Xalq adamı ilə xalqın arasına girənlər…

Hər şeyin bir qaydası, üsulu, yolu-yolağası var. Əgər bir adama "sən filan vaxt filan sözü demisən",- ittihamı irəli sürülürsə və o adam belə bir ifadə işlətmədiyi cavabını verirsə, ona "yox, yalan deyirsən, demisən", - söyləmək ən azı mədəniyyətsizlik, səviyyəsizlikdir. Bu, küçə, tin səviyyəsidir, üzr istəyirəm, bazar adamlarının söhbətidir. Mədəni adam dərhal başa düşür ki, bu adama böhtan atılıb. Yaxud söyləyibsə də, bilmədən ağzından qaçırıbsa da, təkzib edirsə, deməli, həmin mövqedə israr etmir. O, israr etmirsə, sənin ona israrla "yox, deyibsən",- söyləməyinin adı nədir? Əlbəttə, səviyyəsizlik və mədəni gerilik...

Hörmətli millət vəkilimiz Etibar Əliyev xeyli müddətdir tanıyıram. Onunla əyani tanışlığımızdan bir 15 il qabaq qəzetlərdən məqalələrini, açıqlamalarını oxumuşam və necə qətiyyətli, prinsipial, üsyankar bir ziyalı olduğunu görmüşəm. O həmişə təhsilimizin problemlərini dəqiqliklə göstərib, günahkarların adını çəkinmədən söyləyib. Nazirlər onun adı gələndə istər-istəməz qurcuxublar. Elə bir ad çıxarıb ki, Azərbaycan təhsilnin problemlərindən söz düşəndə ilk yada düşən ziyalı olub.

Onun maarifçilik fəaliyyəti də təqdirəlayiqdir. Etibar Əliyev Azərbaycanın ən bilikli və fəal bukinistlərindəndir. Bəlkə də, dünyada elə bir kitab yoxdur ki, Etibar müəllimin ondan xəbəri olmasın. Özü də o, bu kitabların əksəriyyətini pul verib alır və oxuyur, bununla kifayətlənməyib, tərcümə edir, paylaşır, haqqında yazır, bağışlayır. Onun Nobel mükafatçıları haqqında araşdırmaları və yazdığı kitablar Azərbaycan təhsilinə, ədəbiyyatına və mədəniyyətinə böyük töhfədir.

Etibar müəllimlə tanış olarkən onun çox səmimi, gülərüz, zarafatcıl, sözü üzə deyən bir insan olduğunu da bildim. Sonralar feysbuk profili açanda yuxarıda sadaladığım keyfiyyətlərinə virtual məkanın əksər sakinləri şahid oldular. O, yenə təhsil problemləri, dünya səviyyəli korifey yazıçılar, sənətkarlar, alimlər haqqında yazır, inkişafımıza mane olan neqativləri, konkret şəxsləri sərt tənqid edir, zarafatından da qalmırdı.

E. Əliyev

Etibar Əliyev millət vəkili seçildikdən sonra mənə elə gəldi ki, bir çoxları kimi, o da dəyişəcək. Bir qədər lovğa, təkəbbürlü olacaq, əvvəlki qədər əlçatan olmayacaq, elmi, pulisistik yazılarına, tənqidlərinə ara verəcək. Ancaq bunlar olmadı. O yenə həmişəki kimi sadə, səmimi, sözünü çəkinmədən açıq söyləyən Etibar Əliyevdir.

Əgər o, hər hansı sözü demiş olsaydı, ya sözünün arxasında durar, fikrini əsaslandırar, ya da kişi kimi etiraf edib, üzr istəyərdi. “Deməmişəm” söyləyirsə, deməli, yüz faiz belə bir söz, ifadə, cümlə işlətməyib. Sadəcə, kimlərsə ona qarşı qəsdən qarayaxma kampaniyası aparır, onu nüfuzdan salmağa çalışır, əsgərlərlə millət vəkilinin arasını vurmaq istəyir, saxta vətənpərvərlik, daha doğrusu, vətənşüvənlik edirlər. Xüsusilə də, heç bir fakt ortaya qoymadan.

Məndə olan məlumata görə, Etibar Əliyevin seçildiyi dairədən 10 il deputat olmuş şəxs onun millət vəkili olmasını heç cür sinirə bilmir. Odur ki, sosial şəbəkələrdə saxladığı saxta profillər vasitəsilə ona böhtan yağdırır, nüfuzdan salmağa çalışır, təhqir etdirir. Adama deyərlər ki, ay qardaş, birincisi on il deputat olub bu xalqa nə vermisən? Sənin bu xalq qarşısında Etibar Əliyevin etdiklərinin yüzdə biri qədər xidmətin varmı?

İkincisi, uzun illərin təcrübəsinə rəğmən, seçki kampaniyasında sərgilədiyin növbəti yanlış, naşı, spekulyant davranışına görə, MSK qeydiyyatını ləğv edib. İndi bunun acığını Etibar Əliyevdən çıxmağın nə adı var. Elə bilirsən ki, Etibar Əliyevi nüfuzdan salmağa çalışmaqla gələn seçkilərdə ondan daha çox səs toplaya biləcəksən. Yenə də səhv edir və naşı taktika yürüdürsən.

Etibar Əliyev öz xidmətləri, davranışları, sadəliyi və səmimiyyəti ilə xalq adamı olduğunu çoxdan sübut edib. Odur ki, belə avantüralara vaxt, enerji, vəsait sərf etməyə dəyməz. Özünüzü boş yerə yorub, rüsvay etməyin.

Ana səhifəyə dön