Ağıllı xalq » arxiv.reytingaz.info

Mən həmişə demişəm və yazmışam: Azərbaycan xalqının ağıl problemi yoxdur. O hətta lazım olduğundan da ağıllıdır və A. Qriboyedov "Ağıldan bəla" əsərini bəlkə də elə bizdən ilhamlanaraq yazıb. Çünki o, Təbriz konsulu idi...

Odur ki, Azərbaycan xalqını aldatmaq çətindir. Əlbəttə, bizdə axmaq adamlar da az deyil. Amma mənim müşahidələrimə görə, səfehlər oxumuş adamlar arasında üstünlük təşkil edir. Səbəb də odur ki, hansısa səfeh ideyalar aşılayan kitablar, ideologiyalar, nəzəriyyələr, "izm"lər bizi öz təbii yolumuzdan sapdıraraq yanlış istiqamətlərə aparır və ağlımız başımıza gələndə gec olur...

Məsələn, şəhərdə böyümüş mədəni bir adam oxuduğu hansısa romanın təsiri altında kəndə üz tutur. Məqsədi oradakı savadsız insanları maarifləndirmək, onlara yazı-pozu, elm öyrətmək, orada təsərrüfatla məşğul olmaq, yer əkmək, heyvan saxlamaq, saf bir kəndli qızı ilə evlənmək, sağlam uşaqlar dünyaya gətirməkdir. O bu yolla getsə də, arzularını həyata keçirə bilmir. Çünki reallıqda bunları etmək çox çətin, hətta mümkünsüzdür. O kənddə onun başına elə bir oyun açırlar ki, canını götürüb qaçmağına sevinir...

Ancaq kitab oxumayan, "cahil" dediyimiz adamlar bunu qabaqcadan bilirlər. Yəni şəhər adamının kənddə təkbaşına, arxasız-köməksiz, pulsuz-pənəsiz baş çıxara bilməyəcəyini...

İndi bizim Avropada, orda-burda ingilis-mingilis dilində oxumuş savadlılarımız Azərbaycan xalqını bəyənməyərək ona ağıl öyrədir, demokratiya dərsi keçir, nələrəsə inandırmağa çalışırlar. Amma xalq onlara inanmır və haqlı olaraq inanmır.

Tutaq ki, cavan bir oğlan deputatlığa namizəd olur. Çıxır xalqın qarşısına ki, ay filan yerdə oxumuşam, filan adamlarla görüşmüşəm, filan qədər kitab vərəqləmişəm, filan qədərini yazmışam və s. Xalq ona sakitcə qulaq asır və səs vermir. Məncə, xalq haqlıdır. Çünki o cavan oğlanın heç nə edə bilməyəcəyini, yalnız özü üçün çalışacağını əla bilir. Ondansa nağd olaraq nəsə təklif edənə səs verir. Çünki qazancının bu olduğunu yaxşı bilir.

Bizim xalq öz maraqlarını çox yaxşı bilir və lazım olanda seçkiyə də gedir, səs də verir. 1993-cü ildə o, yekdilliklə Heydər Əliyevə səs verdi. Çünki real təhlükəni və Xilaskarı hiss etdi. Amma çox böyük təbliğata, Türkiyənin, ABŞ-ın hərtərəfli köməyinə rəğmən Əbülfəz Elçibəyi seçdirmək çox çətin olmuşdu. Saxlamaq da mümkün olmadı. Çünki Azərbaycan xalqı onu dəstəkləmirdi. Biz o zaman buna əsəbləşirdik, mən Elçibəyə görə neçə-neçə insanla mübahisə etmiş, hətta dalaşmışam. Bəli, o insanlar fikirlərini tam izah edə bilmirdilər. Sadəcə deyirdilər ki, bu adamdan Prezident olmaz. Olmadı da...

Odur ki, Azərbaycan xalqını aldatmağa yönəlik bütün cəhdlər iflasa məhkumdur, bunu hər kəs bilməlidir...

Azərbaycan xalqının öz mentaliteti, öz dünyaduyumu, öz mədəni-mənəvi dəyərləri, ənənələri, özünəməxsus maraqları, öz inkişaf tempi var. O, çörəkverəni də yaxşı tanıyır, yetimə gəl-gəl deyəni də. O, işgörəni də tanıyır, ortada yeyib, ucda gəzəni də. Ona şüar demək olar, hətta dedizdirmək də olar, ona yalan danışmaq, danışdırmaq da olar, ancaq onu öz bildiyi, düz bildiyi, haqq bildiyi yoldan heç kəs sapdıra bilməz...

Yüz illərdir bu yolla bu yerə gəlib çıxıb, bundan sonra öz bildiyi yolla gedəcək...

Azərbaycan xalqına qurama ideologiyalar, qurama, utopik ideyalar, saxta romantik nəzəriyyələr sırımaq mümkün deyil. O, son dərəcə ayıq və realistidir, öz maraq və hüquqlarını çox gözəl bilir. Bəzən kimsə ortaya çıxıb xalqın öz hüquqlarını bilməməsindən dəm vurur. Tamamilə yanlışdır. Bizim xalq nəyə haqqının çatdığını, nəyə çatmadığını çox gözəl bilir və lazım olanda tələb etməyi də bacarır. Haqq-hüquq isə yalnız kağız üzərində yazılanlar və yazılmayanlar deyil. Xalqımız bunu da çox gözəl anlayır...

Müəllifin bütün yazıları - Nadir QOCABƏYLİ

Bütün yazarlar

Ana səhifəyə dön