Vacib söz... » arxiv.reytingaz.info

Etibar CƏBRAYILOĞLU

Dövlət Gənc Tamaşaçılar Teatrının kiçik səhnəsində bir-birindən maraqlı səhnə əsərləri hazırlanır. N. Qoqolun “Dəlinin qeydləri”, P. Züskindin “Kontrabas”, J. Koktonun “Biçarə məşuq”, U. Lyusin “İstədiyim kimi yaşamışam”, T. Vəliyevanın “Cəza”, P. Nurəliyevanın “Mən öləndə ağlama”, M. Vahidzadənin “Bir səbət tənhalıq” və s. tamaşaları uğurla oynanılır.

Kiçik səhnə teatrın gəncləri üçün də böyük fürsət yaradır, onlar burada öz bacarıqlarını fərqli tərəfdən göstərmək imkanı qazanırlar. Teatrın aktyoru Müşfiq Əliyev kiçik səhnədə özünü rejissor kimi sınayıb və nəticədə “35 ildən sonra” adlı maraqlı bir tamaşa alınıb. Şuşa Dövlət Musiqili Dram Teatrında, son illərdə isə Dövlət Gənc Tamaşaçılar Teatrında maraqlı rollar oynayan istedadlı aktyor rejissor kimi dünyaca tanınmış dramaturq Bengt Alforsun yaradıcılığına müraciət edərək “İllüziyaçılar” pyesi əsasında “35 ildən sonra” adlı tamaşaya quruluş verib. 30-dan çox pyesin müəllifi Finlandiya doğumlu İsveç dramaturqu Alforsun bu əsəri ailə ənənələrinin, insani münasibətlərin önəmi barədədir. Pyesi dilimizə aktrisa Zümrüd Quliyeva çevirib və Zümrüd xanım həm də bu tamaşada Şarlotta rolunu ifa edir. Hadisələri qabaqlayaraq qeyd edək ki, əsərdəki dialoqları sadə dildə və lakonik tərcümə edən Zümrüd Quliyevanın aktrisa kimi oyunu da alqışa layiqdir.

Tənha, sağlamlığı ilə əlləşən qoca Kazimir Kant sənətinin vurğunu olan aktyordur. İllərini səhnədə keçirən bu teatr fədaisinə gəncliyində Romeonu, yaşa dolanda isə Kral Liri oynamaq qismət olmayıb. Rejissorlar ona Şekspirin əsərlərində ikinci, üçüncü dərəcəli rollar etibar ediblər. Bir vaxtlar səhnədə uğur, alqışlar, çiçək dəstələri gözləyən Kazimir Kant (aktyor Kərəm Hadızadə) indi tək yaşadığı mənzilində həkimin ümidinə qalıb. Gözlədiyinin əksinə olaraq gələn həkim yox, gənc dramaturq Şarlotta olur. Xanımın qəfil gəlişinin məqsədi var və tamaşaçı bunu yalnız final səhnəsində bilir...

Şarlotta (aktrisa Zümrüd Quliyeva) Kazimirdən israrla yeni yazdığı pyesi oxumağı xahiş edir, çünki əsərdəki Tanrı rolunda bu qoca aktyoru görür. Çağırışa gələn Həkim isə pyesin oxunuşuna mane olur. Üstəlik, Həkimin (Əməkdar artist Elnur Bəhramxan) düşüncələri də gənc dramaturq xanımı əsəbiləşdirir. Həkim belə hesab edir ki, teatr heç bir insana həyatda kömək edə bilməz. Şarlotta onu qovmaq məcburiyyətində qalır. Çünki qoca Kazimirə deyəcək sözü var...

Həkim rolunu ifa edən gənc və istedadlı aktyor Əməkdar artist Elnur Bəhramxan səhnəyə bircə dəfə gəlsə də öz oyunu ilə intriqa yarada, tamaşaya dinamika qata bilir.

Kazimir təzə pyeslə tanış olmaq prosesində həm də öz şəxsi həyatını danışmaq məcburiyyətində qalır. Məlum olur ki, onun bəxti təkcə sənətdə deyil, həyatda da gətirməyib, hər iki evliliyi uğursuz olub. Yeni doğulan körpə qızını atıb gedib və illər ərzində onun sonrakı taleyi barədə heç düşünməyib də.

Və sonda Şarlotta istəyinə nail olur, bir vaxtlar Kazimirin atıb getdiyi körpə qızın indi atasının qarşısında dramaturq kimi dayandığını deyir. Ata-bala bir-birlərinə sarılırlar. Şarlotta əslində elə bu sözü demək üçün Kazimir Kantın evinə gəlmişdi...

Gənc aktrisa Zümrüd Quliyevanın ifasında tamaşaçı 35 ildən sonra doğma ata nəvazişi görməyə can atan və bunun üçün planlar quran Şarlottanı görə bilir.

Kərəm Hadızadə həm keçmiş Kamera Teatrının, həm də Dövlət Gənc Tamaşaçılar Teatrının səhnəsində bir-birindən fərqli obrazlar yaradan istedadlı aktyordur. O, Kazimir Kantın düşüncələrini, yaşantılarını inandırıcı şəkildə tamaşaçılara ötürməyi bacarır və bir daha göstərir ki, mürəkkəb xarakterli rolların öhdəsində gəlməyə qadirdir.

Kiçik səhnədə böyük uğur qazanan “35 ildən sonra” tamaşası inanırıq ki, Müşfiq Əliyevin bir quruluşçu rejissor kimi gələcək yaradıcılıq planlarına yol açacaq və o, sənətsevərləri yeni səhnə əsərləri ilə yaxşı mənada təəccübləndirə biləcək.

Sonda “35 ildən sonra” tamaşası üzərində əməyi keçən quruluşçu rəssam Dmitri Afanasiyevə, musiqi tərtibatçısı Zaur Rəşidova və rejissor assistenti Sona Mikayılovaya təşəkkürlər.