Şəhidlərimizlə bağlı xüsusi xatirə lövhələri hazırlanır

Azərbaycanın ərazi bütövlüyü və işğal altındakı torpaqların azad olunması uğrunda canlarını fəda etmiş qəhrəman oğullarımızın adının əbədiləşdirilməsi üçün həm dövlət səviyyəsində, həm də ayrı-ayrı xeyriyyəçi şəxslər tərəfindən müxtəlif işlər görülür.

Reyting.az-ın əldə etdiyi məlumata görə, Gəncə şəhərində də şəhidlərimizin adının əbədiləşdirilməsi və onların ailə üzvlərinin müxtəlif problemlərinin həllinə dəstək tədbirləri genişləndirilir. Belə tədbirlərin təşkilatçılarından biri də Qafqaz Müsəlmanları İdarəsinin Qazılar Şurasının üzvü, Gəncə İmamzadə ziyarətgahının ruhanisi, şəhid qardaşı Hacı Tahir Abbasovdur.

Hacı Tahir Abbasovun şəxsi təşəbbüsü və maliyyə dəstəyi ilə Gəncədə şəhidlərimizlə bağlı xüsusi xatirə lövhələrinin hazırlanmasına başlanılıb. Bu iş istər şəhid anaları, istərsə də şəhər ictimaiyyəti tərəfindən yüksək qiymətləndirilir. Şəhid anaları bu işə görə din xadiminə minnətdarlıqlarını bildirir, bunu şəhidlərimizin əziz xatirəsinə daha böyük sayğı hesab edir və gələcək nəsillərdə yüksək vətənpərvərlik ruhunun aşılanmasına xidmət göstərdiyini deyirlər.

Bu işdən məmunluqlarını ifadə edən şəhid ailələrinin üzvləri bildirirlər ki, Gəncə şəhərində şəhidlərimizin fotoları pərakəndə halında vurulur. Həmin fotoların bəziləri keyfiyyətsiz hazırlandığından güclü küləyin, yağışın və günəş şüasının təsirinə məruz qalır. Din xadiminin başladığı iş isə bu problemdən çıxış yoludur.

Məlumata görə, Hacı Tahir Abbasov hələ Novruz bayramından əvvəl İmamzadə ziyarətgahında şəhid ailələrinin üzvləri və Qarabağ müharibəsinin iştirakçıları ilə görüş təşkil edib. Həmin görüşdə qərar verilib ki, İmamzadə ziyarətgahının önündəki tağlar Zəfər Şəhidlərinin adını daşısın və şəhidlərimizin fotoları mərmər üzərində döyülmüş formada həmin divarlarda öz əksini tapsın. Həmin lövhələrdə Gəncə şəhidləri haqqında məlumatlar qeyd ediləcək və Fatihə surəsi də yazılacaq.

Adları müqəddəs ziyarətgahda əbədiləşdiriləcək qəhrəman oğullarımızın sayına gəldikdə, Gəncə şəhəri İkinci Qarabağ müharibəsində 114 şəhid verib. Hacı Tahir Abbasovun şəxsi maliyyə vəsaiti hesabına ümumilikdə Gəncənin 600-ə yaxın şəhidinin adının əbədiləşdirilməsi nəzərdə tutulur.

Digər xeyriyyə tədbiri Gəncə İmamzadə ziyarətgah kompleksinin ərazisində “Şəhidlər bulağı”nın inşaasıdır ki, artıq Hacı Tahir Abbasovun vəsaiti hesabına bu işə də start verilib.

Bu günlərdə Gəncə İmamzadə ziyarətgah kompleksində şəhidlərin ailə üzvlərinə iftar süfrəsi açılıb. Şəhid ailələrinin üzvləri, qazilər və şəhər ictimaiyyətinin iştirak etdiyi iftar məclisində şəhidlərimizin ruhuna dualar oxuyub, yaralı qazilərimizə şəfa diləyiblər. Eyni zamanda şəhidlərimizin adının əbədiləşdirilməsi ilə bağlı görülən işlər yenidən müzakirə olunub, müxtəlif təkliflər dinlənilib.

Qeyd edək ki, tədbirlərdə DQİDK-nin Gəncə bölgəsi üzrə şöbə müdiri Həsən Məmmədov da iştirak edib. O, Müzəffər Ali Baş Komandan İlham Əliyevin rəhbərliyi ilə qəhrəman Ordumuzun Vətən müharibəsində tarixi Zəfərindən, torpaqlarımızı cəmi 44 gün ərzində işğaldan azad etməsindən bəhs edib. H. Məmmədov Ali Baş Komandanın və Birinci vitse-prezidentin şəhid ailələri və müharibə iştirakçılarına hərtərəfli diqqət və qayğısından danışıb.

Şəhid ailələrinin üzvləri ilə bağlı digər xeyriyyə işləri də davam etdirilir. Hacı Tahir Abbasovun köməkliyi ilə şəhid anası İradə Qasımova bir neçə gün əvvəl cərrahi əməliyyat olunub və sağlıq durumundakı problemləri həllini tapıb.