300 ailə çıxılmaz vəziyyətlə üzləşib

Bakı şəhəri, Şəfayət Mehtiyev küçəsi, 1054 ünvanında “Tamam” MTK-nın inşa etdiyi 18 mərtəbəli yaşayış kompleksinin sakinləri Prezident İlham Əliyevə, Birinci vitse-prezident Mehriban Əliyevaya, Dövlət Şəhərsalma və Arxitektura Komitəsinin sədri Samir Nuriyevə, Əmlak Məsələləri üzrə Dövlət Komitəsinin sədri Kərəm Həsənova, Bakı Şəhər İcra Hakimiyyəti Başçısının müavini Eldar Əzizova, Baş prokuror yanında Korrupsiyaya qarşı Mübarizə Baş İdarəsinin rəisi Kamran Əliyevə müraciət ediblər.

Surəti Reyting.az-ın redaksiyasına da göndərilən müraciətdə bildirilir ki, 2009-cu ildən başlayaraq Bakı şəhəri, Yasamal rayonu, Şəfayət Mehtiyev küçəsi, 1054 ünvanında, “Tamam” MTK tərəfindən inşa edilmiş 18 mərtəbəli yaşayış kompleksində yaşayış mövcud olsa da, sakinlər mənzilərinə kupça alıb, qeydiyyata düşə bilmirlər:

“Hazırda yaşayış komleksindəki 320 mənzilin təxminən 300-də yaşayış var. Bu dövr ərzində mərhələli formada su, işıq, telefon və qaz xidmətləri müvafiq olaraq kodlaşdırılaraq vətəndaşların istifadəsinə verilib. Lakin 9-cu ildir ki, mənzillərin Dövlət reyestrinə salınaraq özəlləşdirilməsi prosesi aparılmır. Bu isə öz növbəsində artıq ikinci Prezident seçkisi, referendumlar, qeydiyyata alınma, tibbi uçot, ərazi təhsil ocaqlarına qəbul və s. bu qəbldən olan məsələlərdə saknlərə əsaslı əngəllər törədir”.

Müraciətdə qeyd olunur ki, kompleksdə müxtəlif təbəqədən insanlar yaşayır. Onların arasında alimlər, müəllimlər, həkimlər, hüquq muhafizə orqanı əməkdaşları, mühəndislər və s. insanlar var. Bu insanların “Tamam” MTK-nın rəhbərliyinə dəfələrlə müraciət etməsinə baxmayaraq üzləşdikləri problem öz həllini tapmır.

Şikayətçilər yazır ki, hər dəfə müraciət edəndə, qurumlar müxtəlif fikirlər irəli sürürlər: “Bunlar arasında Bakı Şəhər İcra Hakimiyyəti qarşısında Mənzil Fondu öhtəliyinin yerinə yetirilməməsi səbəbi xüsusi vurğulanır. Hər bir halda problemin həll olunmaması səbəbindən 1000 (mindən) çox vətəndaş əziyyət çəkir”.

Müraciət müəllifləri qeyd edirlər ki, yaranmış problemlə bağlı dövlət başçısına, Birinci vitse-prezidentə və Bakı Şəhər İcra Hakimiyyətinə 15 aprel 2018-ci il tarixdə müraciət ediblər: “Bakı Şəhər İcra Hakimiyyəti Başçısının Aparat rəhbərinin 02.05.2018-ci il tarixli 1-304/2-091/2 saylı cavab məktubunda bildiriblər ki, Şəfayət Mehtiyev-1054 ünvanında inşa edilmiş 18 mərtəbəli yaşayış kompleksindəki sözügedən problemin həlli yalnız yaşayış kompleksinin sifarişçisinin (sahibkarının) vəzifə öhdəliklərinə aiddir və bu prosedur AR-nın mövcud Şəhərsalma və Tikinti Məcəlləsinin tələbləri nəzərə alınmaqla yerinə yetirilməlidir. Bununla yanaşı, bu məsələ ilə bağlı tikinti sifarışçisinə (sahibkara) müraciət etməyi, əks təqdirdə isə qarşımızda müqavilə öhdəliklərini yerinə yetirilməməsi üçün tikinti sifarışçisinə (sahibkara) qarşı qanunvericiliyin tələblərinə uyğun məhkəmə iddiasının qaldırılması tövsiyə olunub.

Yazılanlardan müəyyən olunur ki, tikinti sifarışçısi (sahibkar) öhdəliklərini tək Ş. Mehtiyev küç. 1054 ünvanında inşa edilmiş 18 mərtəbəli yaşayış kompleksinin sakinləri qarşısında yox, eyni zamanda BŞİH-i qarşısında da yerinə yetirməyib. Bununla yanaşı hazırki vəziyyətdə sahibkar (sifarışçisi) öhdəlikləri yerinə yetirmək iqtidarında olmadığını ifadə edir. Eyni zamanda xüsusi qeyd etmək istərdik ki, öhdəliklərin yerinə yetirilməməsinin tikinti normativlərinə, tikinti tamamlama işlərinə və yaxud hər hansısa bir texniki-təhlükəsizilik qaydalarının təmin olunmamasına aidiyyəti yoxdur. Problem yalnız BŞİH qarşısında Mənzil Fondu öhdəliklərinin yerinə yetirilməməsindən irəli gəlir”.

Sakinlər yazır ki, yaranmış problemin “qapanmış dairə” prinsipi ilə uzadılması yuxarıda sadalanan sosial və həyat problemlərini getdikcə artırır: “Bununla yanaşı, mənzillərin təkrar alqı-satqısı zamanı vergi ödəyicisi kimi, icbari sığorta, bank və bələdiyyə kimi hüquqi şəxslərlə münasibətləri və s. hərəkətləri iflic vəziyyətində saxlayır”.

Sakinlər qeyd olunanları nəzərə alaraq, müraciət ünvanladıqları şəxslərdən xahiş edirlər ki, problemin aradan qaldırılması üçün məsələni öz nəzarətlərinə götürüb, aidiyyəti üzrə göstəriş versinlər.

Reyting.az

Ana səhifəyə dön