Qulaq hər gün bir söz eşitməsə, kar olar. Bu atalar məsəlinin əsrləri ötüb bu günə qədər gəlməsinin arxasında böyük hikmət var. Hər gün eşitdiklərimiz isə qulaqlarımızın sağlam qalmasına əsas verir.

Bu günlərdə əmək və əhalinin sosial müdafiəsi naziri Səlim Müslümovun jurnalistlərə verdiyi açıqlama diqqətimi çəkdi. Səlim müəllim deyir ki, bu gün əksər fəhlə ixtisasları üzrə kadr çatışmazlığı mövcuddur. Buna səbəb isə SSRİ-nin dağılması ilə əlaqədar ittifaqa üzv olan ölkələrdə peşə təhsili sisteminin dağılmasıdır: "Yəni, o peşələr öz populyarlığını itirdi. Zavod, fabrik, digər istehsal müəssisələri bağlandıqdan sonra bu peşəyə maraq itdi.

Son illər Azərbaycanda kənd təsərrüfatı sahəsi sürətlə inkişaf edir, lakin bu sahədə müəyyən işləri həyata keçirmək üçün kifayət qədər fəhlə yoxdur. İş o yerə çatıb ki, kəndlərdə bir traktorçu tapanda sevinirik. Düzdür, kənd təsərrüfatı sahəsi mövsümidir, lakin tütünçülük, pambıqçılıq kimi sahələr var ki, orada az qala, ilboyu işlər həyata keçirilir və ixtisaslı kadrlara tələbat var".

Nazirin bu açıqlamasını bir neçə istiqamətdə çək-çevir eləmək olar.

Birincisi, niyə bizdə heç kim fəhlə olmaq istəmir? Belə çıxır ki, Azərbaycanda hamı "Ağa Nəzərəm, belə gəzərəm",- deyib əmr vermək istəyir.

Bəlkə də hörmətli Səlim müəlim haqlıdır. Axı niyə əli belində göstəriş vermək dura-dura adam fəhləlik eləməyi seçməlidir? Məncə, burda bizim camaatın günahı yoxdur. O boyda Mirzə Ələkbər Sabir "Fəhlə, sən də özünü insanmı sanırsan?"- deyəndən bəri heç kim fəhlə olmaq istəmir. 70 il sovet imperiyası gecə-gündüz müsbət fəhlə obrazı yaratsa da, bizimkilərin beyninə girmədi. Rəhmətlik Sabir nətəhər "peçat" vurdusa, o gündən bəri kimsə fəhlə olmaq istəmir.

S.Müslümovun açıqlamasının ikinci dəyərləndirməsi də var. Cənab nazir çox doğru buyurur ki, artıq fəhlə, traktorçu, kombaynçı kimi peşələrə sahib olmaq istəyən yoxdur. Görün, iş nə yerdədir ki, o boyda nazirlik traktorçu axtara-axtara birtəhər olub. Amma bunun da günahı bizim qara camaatda deyil. Sovet imperiyası təzə-təzə camaatımıza kombaynçı, traktorçu, pambıqçı olmağı öyrədirdi, lakin ona da imkan vermədilər. SSRİ dağıldı. Traktorçu, kombanyçı, fəhlə kimi formalaşmağımız yarımçıq qaldı. Elə buna görə də indi ölkədə fəhlə qıtlığı yaşanır.

Amma canab nazirin açıqlamasını soyuqqanlı analiz edəndə maraqlı məqamlar ortaya çıxır. Necə olur ki, Azərbaycanda traktorçu, hətta fəhlə tapılmır, amma 1 milyon əhalimiz Rusiyaya iş dalınca gedir? Özü də həmin insanların böyük əksəriyyəti nazirliyin traktorçu, pambıqçı, fəhlə axratdığı regionlardan gediblər. Görəsən, bu camaat niyə öz yurdunda-yuvasında oturub fəhləliyini eləmir? Məgər Rusiyanın bazarlarında itin zülmünü çəkmək dahamı asandır? Təbii ki, yox. İş dalınca Rusiyaya pənah aparanların hansını danışdırsan, dəsmal götürüb ağlayar. O zaman Səlim müəllim hansı kənddə fəhlə axtarışına çıxıb? Çətin sualdı...

Cənab nazir, traktorçu, kombaynçı, hətta fəhlə axtarmaq istəyirsinizsə, əvvəlcə iş yeri yaradın, o zaman iş yerlərinin sahibləri özləri gələcəklər. Jurnalistlər qarşısında gəlişigözəl çıxışlar etməklə işsizliyi aradan qaldıra bilməzsiniz. 1 milyondan çox vətəndaşı iş dalınca Rusiyaya köç edən bir ölkədə fəhlə tapmamağı dilə gətirmək isə gülməlidir.