Paytaxt Şirvana köçür » arxiv.reytingaz.info

Bir neçə aydır yazmıram. Bilirəm ki, mənim nə yazacağımı gözləyənlər var.

Mən indi hamı kimi gözləmə mövqeyindəyəm. Amma bu o demək deyil ki, mən hansı klanın qalib gələcəyini gözləyir və nəticədə onun tərəfinə keçmək istəyirəm. Sadəcə, islahatlar kimi təqdim olunan kadr dəyişikliyinin, parlament seçkisinin nə ilə nəticələnəcəyini gözləyirəm.

Vəziyyəti gündən-günə ağırlaşan əhali də mənim kimi gözləmə mövqeyindədir. Atalar deyib ki, yeməkdənsə, ümid yaxşıdır. Cüzi də olsa, əhalidə ümid var ki, nəsə yaxşılığa doğru dəyişə bilər. Hər ziyanda bir xeyir olduğu kimi, son illərdə yaşadığımız problemlər, haqsızlıqlar bir xalq olaraq bizi düşündürdü, öz səhvlərimizi götür-qoy etdik, ən əsası, kasıb təbəqə hərəkətə gəldi, başa düşdü ki, ələbaxımlılıq insanın mənliyini, ləyaqətini alçaldır və insan halal əməyi ilə yaşamalıdır.

Sərvətlərin bir əldə cəmləşməsi çoxsaylı oğru məmuru qohumlarını “darma” yemləmək imkanından məhrum etdi. Bu bizim qazancımızdır.

Hərdən öz-özümə fikirləşirəm ki, biz bir xalq olaraq xoşbəxt yaşamağa layiqikmi? Bəli, layiqik.

Ətrafımızdakı bəzi insanların vəhşiləşməsinin konkret səbəbləri var. Çünki vəhşi cəmiyyətdə baş çıxarmaq üçün vəhşiləşməlisən. Vəhşiləşməsən yırtıcılar səni məhv edəcək. Normal cəmiyyət olanda insanların yaxşı sifəti üzə çıxacaq.

Yazımın sərlövhəsini “Paytaxt Şirvana köçür” qoymağım yəqin ki, çoxlarını təəccübləndirir. Bu, mənim arzumdur. Belə olarsa, həm Bakı boşalar, həm də Aran zonası dirçələr.

Bu gün ən pis vəziyyətdə yaşayan Aran zonasının sakinləridir. Bircə fakt: Aran zonasında əhalinin əhəmiyyətli hissəsi məmurların mal-qarasına baxmaq üçün ailəliklə fermalarda yaşayır. Düzəngahda yerləşən bu fermalarda su, qaz, işıq yoxdur. İnsanlar yarı ac, yarı tox, kirin, hisin içərisində yaşamağa məcbur olur, uşaqlar məktəbə getmirlər. İnternet televiziyalarından xahiş edirəm ki, bu faktları ictimailəşdirsinlər. Elgizin verilişində belə bir ailəni göstərdilər, amma ekspertlər yalnız ata və ananı söydülər, məmurların adını çəkməyə cəsarət etmədilər.

Bilirəm ki, yataqları gəzmək üçün çoxlu pul lazımdır. Pulum olsa, mən də bunu edərəm, o sürülərin kimin olduğunu araşdıraram.

Ötən həftə Hacıqabulda “möcüzə” baş verib. 10 ildir rayonun deputatı olan Rəfael Hüseynovun qəflətən rayonda peyda olması əhalini sanki şoka salıb. Deputatlığa yenidən Hacıqabul rayonundan namizəd olan Rəfael bəy rayonda vəfat etmiş şəhid atasının yas mərasiminə də qatılıb.

Hacıqabul əhalisinin problemlərini sadalamaq istəmirəm. Hesab edirəm ki, əhalinin vəziyyətini bir qədər yüngülləşdirmək üçün ilk növbədə uşaqpulu verilməlidir.

Hazırda əksər şirkətlərdə ixtisarlar gedir. Gənc valideynlər stres içərisində yaşayırlar, qorxurlar ki, ixtisara düşsələr, uşaqları ac qalacaq. Uşaqpulu yox, işsizlərə müavinət yox, pulsuz müalicə yox. Valideynlər vahimə içərisində qıvrılırlar.

Məncə, hökumət ona görə uşaqpulu vermir ki, onun 6 ayını sosial yardımda olduğu kimi məmurlar oğurlaya bilməyəcəklər. O işdə ki məmurların oğurlamaq, rüşvət almaq imkanı yoxdur, o işi görmürlər.

Kasıblara mal-qara verirlər, ona görə ki orada da məmurlar oğurluq edə bilirlər. Oğrular deyirlər ki, uşaqpulu versələr, qadınlar çox doğacaqlar. Pullu ailələrə baxsaq, əksəriyyətinin bir uşağı var, çox uşaq kasıb ailələrdə doğulur, maddi dayağı olmayan insanlar mənəvi dayaq qazanmaq üçün çox doğurlar.

Pullu adamın vaxtını keçirmək üçün min cür imkanı var, o, özü üçün yaşayır. Kasıb vaxtını uşaqlarına baxmaqla keçirir, yaşamağın başqa yolunu təsəvvür etmir, kasıbın hamiləlikdən qorunma vasitələrindən xəbəri yoxdur, kasıb aborta pul tapmır. Uşaqpulu versələr, bu, qətiyyən doğuşlara təsir etməyəcək, cəmiyyətdə sosial ədaləti bərpa edəcək.

Mən fikirlərimi insanlara çatdırmaq üçün YOUTUBE-da “İmpuls” adlı televiziya kanalı açıb sadə insanların problemlərini işıqlandırmağa başlayacağam. Mənim öz yolum olacaq. Daha doğrusu, həmişəki yolumu davam etdirəcəyəm. “İmpuls” televiziya kanalında fikirlərimin davamını dinləyə bilərsiniz.

Müəllifin bütün yazıları - Mətanət ƏLİYEVA

Bütün yazarlar

Ana səhifəyə dön