Can Laçın » arxiv.reytingaz.info

İsrafil Kərimov
Azərbaycan Jurnalistlər Birliyinin üzvü

Laçın rayonu Azərbaycanın strateji bölgəsidir. Laçının və Kəlbəcərin işğalı ilə Ermənistanla Qarabağ arasında quru əlaqəsi yaranmışdı. Bu da öz növbəsində Azərbaycanın digər rayonlarının işğalına şərait yaratmışdı.

1992-ci il mayın 18-də Laçının işğalı nəticəsində 1 şəhər, 1 qəsəbə, 125 kənd düşmən tapdağı altında qaldı, döyüşlərdə 300-dən artıq hərbi və mülki şəxs həlak oldu və itkin düşdü. Rayonun 79.1 min nəfər əhalisi respublikanın 57 şəhər və rayonunda müvəqqəti məskunlaşdılar.

Lakin 2020-ci il sentyabrın 27-də başlanan 44 günlük Vətən müharibəsi zamanı Laçın və Kəlbəcər rayonlarının da müəyyən hissəsi rəşadətli ordumuz tərəfindən azad olunduqdan sonra prezident İlham Əliyevin diplomatik səyləri ilə bu rayonlar tamamilə düşmən işğalından xilas olundular. Azərbaycan, Rusiya prezidentlərinin və Ermənistan baş nazirinin 2020-ci il noyabrın 10-da imzaladığı üçtərəfli Bəyanata əsasən Azərbaycan Ordusunun bölmələri dekabrın 1-də Laçın rayonuna daxil oldu. Şanlı Qələbəmiz və üçtərəfli Bəyanata əsasən Ağdam, Kəlbəcər və Laçın rayonlarının bir güllə atmadan düşmən işğalından azad edilməsi möhtəşəm zəfərin nişanəsi, ölkə başçısının siyasətinin nəticəsidir.

Azərbaycan Ordusu və Müzəffər Ali Baş Komandan Kəlbəcər və Laçın kimi digər rayonları da işğaldan azad etməklə zəfər, qələbə tarixi yazdılar. Azərbaycan illərdir silahlanan işğalçı Ermənistanı məğlub etdi. İllərdir özləri haqqında mif formalaşdırmış düşmən ordusunu, Köçəryanı, Sarkisyanı, Ohanyanı rəzil vəziyyətinə saldı. Azərbaycan erməni vəhşiliyini, faşizmini də məhv etdi. İllərdir ədalətin təmin olunmasına mane olan Ermənistanın havadarlarının təzyiqlərinə baxmayaraq, BMT TŞ qətnamələrini də həyata keçirdi. Eyni zamanda, təxminən 30 il öncə torpaqlarımızı satmış AXC-Müsavat cütlüyünün vurduğu milli zərər, qeyrət ləkəsi təmizləndi.

Prezident İlham Əliyevin göstərişi ilə bu gün işğaldan azad olunmuş digər rayonlar kimi Laçın da bərpa olunur, cənnətə çevrilir. Dövlətimizin başçısı İlham Əliyevin və birinci xanım Mehriban Əliyevanın 2021-ci il avqust ayının 16-da Kəlbəcər və Laçın rayonlarına səfəri çərçivəsində uzunluğu 72,8 kilometr olan Kəlbəcər-Laçın avtomobil yolunun üzərində tikiləcək 3,4 kilometr uzunluğundakı tunelin, Laçın Beynəlxalq Hava Limanının təməlini qoyması bir daha Qarabağ və Şərqi Zəngəzurun cənnətə çevrilməsi prosesinin sürətlə reallaşdırıldığını isbat edir və Azərbaycan hakimiyyətinin iradəsini nümayiş etdirir.

2022-ci il iyunun 26-da və sentyabrın 21-də Müzəffər Ali Baş Komandan İlham Əliyevin azad olunmuş Laçına növbəti səfərləri zamanı isə ölkə başçısı Kəlbəcər-Laçın avtomobil yolunun inşası prosesi, “Qorçu” elektrik yarımstansiyasında görülən işlər, Laçın Beynəlxalq Hava Limanında aparılan tikinti işləri, uzunluğu 72,8 km olan Kəlbəcər-Laçın avtomobil yolunda yeni inşa edilən tunel və “Həkəriçay” su anbarı layihəsi ilə tanıçlığı olmuş, Laçın şəhərində Azərbaycan Bayrağını ucaltmış və Laçın şəhərində inşa ediləcək “Laçın” qovşaq yarımstansiyasının təməlqoyma mərasimində iştirak etmişdir.

Rayon ərazində aparılan tikinti-bərpa işlərinin güdişatı onu göstərir ki, artıq laçınlıların birinci qrupu öz doğma şəhərinə gələn ilin sonuna qədər qayıda bilərlər. “Böyük Qayıdış” Dövlət Proqramına uyğun olaraq Laçın rayonu və bütün başqa rayonlar bərpa olunacaqdır.

Kənd təsərrüfatı rayonu olan Laçında heyvandarlığın inkişafı üçün böyük imkanlar vardır. Artıq ikinci ildir ki, qoyun sürüləri oraya göndərilir. Laçın rayonunda yüzlərlə arıçı öz təsərrüfatını qurub və bol məhsul götürürlər. Bu istiqamətdə işlər davam etdirilir.

Müəllifin bütün yazıları - İsrafil KƏRİMOV

Bütün yazarlar

Ana səhifəyə dön