“Qisas” əməliyyatı... » arxiv.reytingaz.info

İsrafil KƏRİMOV
Azərbaycan Jurnalistlər Birliyinin üzvü

Ayqustun 12-də prezident İlham Əliyev İsmayıllı rayonunun Basqal qəsəbəsində olarkən Azərbaycan Televiziyasına müsahibəsində Azərbaycan xalqının, dövlətinin və ordusunun qətiyyətini bir daha qeyd edi. Cənab prezident bu müsahibə zamanı bir çox sahəyə öz münasibətini bildirməklə yanaşı Laçın istiqamətində həyata keçirilmiş qısamüddətli, lakin güclü təsirə malik əməliyyatın əhəmiyyətini xüsusi vurğuladı.

Əlbəttə, ölkənin taxıla, buğdaya olan ehtiyacı və ərzaq təhlükəsizliyi ilə bağlı tədbirlər vacib amillərdir. Ölkəmiz bu istiqamətdə lazımi işlər görür. Lakin ərazi bütövlüyümüzün təminatı, sülhün tam mənada bərpası həm də azad olunmuş torpaqlarda əkinçilik və maldarlığın inkişaf etdirilməsi ilə ərzaq təhlükəsizliyinə verilmiş töhfə olacaqdır və ölkə başçısının qeyd etdiyi kimi, bu proses artıq başlanıb.

Bu il avqust ayının əvvəlində Laçın istiqamətində on səkkiz yaşlı əsgərimizin ermənilər tərəfindən şəhid edilməsi və buna verilən ən sərt cavab, növbəti dərs dəmir yumruğun yerində olmasını sübut edən amil idi. Ordumuz “Qisas” əməliyyatı keçirərək şəhidimizin qanını yerdə qoymadı və qarşı tərəf ciddi şəkildə cəzalandırıldı. Ermənistan cəmiyyəti və havadarları ordumuzun gücünü bir daha gördü.

Cənab prezidentin bildirdiyi kimi, Azərbaycanın qarşısında ciddi hədəfləri və bu hədəfləri həyata keçirmək üçün gündəliyi mövcuddur. Ölkəmiz qarşısına qoyduğu bütün hədəflərə çatır və ciddi uğurlar əldə edir. Bizi heç bir siyasi, iqtisadi, hərbi qüvvə saxlaya bilməz. Ölkəmiz öz ərazisində istədiyi qanuni addımı ata bilər. Əlbəttə, üç dövlət arasında imzalanmış 2020-ci il 10 noyabr Bəyanatı həyata keçirilməlidir. Azərbaycan ərazisində Ermənistan silahlı qüvvələrinə və erməni terrorçu ünsürlərə məxsus silahlı dəstələr qalmamalıdır. “Qisas” əməliyyatı təkcə şəhidimizin qisasını almadı, eyni zamanda da çoxlu sayda erməni yaraqlılarının ərazidən çıxarılmasına səbəb oldu. 100 min nəfərdən çox orduya malik Azərbaycanı heç bir qüvvənin, bəyanatın, açıqlamanın durdura bilmədiyini bütün dünya bir daha gördü.

Bu gün Cənubi Qafqaz regionu artıq sülhün və əməkdaşlığın mərkəzinə çevirilməkdədir. Tarix boyu Rusiya imperiyasının cənub sərhədlərində yerləşən bu ərazi indi müstəqil siyasət yürüdən və yeni reallıqların formalaşdığı bölgədir. Azərbaycan yerləşdiyi regionun inkişafında yeri gəldikdə siyasi, iqtisadi, ictimai, yeri gəldikdə isə hərbi təsir gücünə malik olduğunu dəfələrlə sübut edib. Təkcə qonşu Gürcüstanın inkişafında Azərbaycanın həyata keçirdiyi enerji layihələrinin və nəqliyyat yollarının böyük əhəmiyyəti vardır. Əgər rəsmi İrəvan doğru mövqe seçsəydi, analoji inkişaf meyilləri Ermənistanla da həyata keçirilə bilər və regionumuz çox böyük tərəqqi yolu keçmiş olardı. Lakin 30 illik işğal hər üç dövləti geri saldı. Azərbaycan alternativ yollar tapdı və inkişaf etdi. İndi Qarabağ müharibəsinin bitməsi və Ermənistanla normal münasibətlərin yaradılmaq imkanlarının formalaşması möhkəm sülhə ümidləri artırır.

Azərbaycan çoxmillətli, çoxkonfensiyalı, tolerant bir dövlətdir. Azərbaycanın digər vətəndaşları kimi ermənilər də ölkə ərazisində yaşayacaqlar. İndi Qarabağda yaşayan ermənilər gördülər ki, nə rəsmi İrəvan, nə Rusiya sülhməramlıları onların problemlərinin həllinə yardım edə bilmir. Azərbaycan isə onlara yeni və keyfiyyətli yol çəkir, onların qazla təminatını həyata keçirir, təhlükəsizliyini təmin edir. Ermənilər başa düşməyə başlayıblar ki, gələcək inkişafları məhz Azərbaycan cəmiyyətinə inteqrasiyadan keçir.

Ana səhifəyə dön