ABŞ AES-lərin 15 faizini itirə bilər

"Rusiya nüvə yanacağı ilə bağlı sərt qərar verərsə, ABŞ atom elektrik stansiyalarının 15 faizini itirəcək. Buna görə də ABŞ və Avropa İttifaqı Rusiya nüvə yanacağından asılılığı azaltmaq niyyətindədir və tədarüklərini diversifikasiya etməyi planlaşdırırlar. Bu, ABŞ dövlət katibi Entoni Blinken və Avropa diplomatiyasının rəhbəri Cozep Borrelin sədrliyi ilə Avropa İttifaqı-ABŞ Enerji Şurasının birgə bəyanatında da qeyd olunur".

Bu sözləri Reyting.az-a Azərbaycan Kommunist Partiyasının rəhbəri Ədalət Abdinov deyib.

Onun sözlərinə görə, Amerika və Avropanın hakimiyyət orqanları uzun müddətdir ki, Rusiyadan tədarükdən imtina etmək planları qururlar: "Bu barədə Ukrayna münaqişəsi başlamazdan və Krımın Rusiya Federasiyasına birləşdirilməsindən əvvəl də söhbət gedirdi. Lakin indi ABŞ və Avropa İttifaqının Rusiyanın nüvə yanacağından qurtulması mümkün deyil”.

Ə. Abdinov əlavə edib ki, son məlumatlara görə, zənginləşdirilmiş uranın Rusiyadan idxalı ABŞ-da tələbatın təxminən 15, Avropa İttifaqında isə təxminən 20 faizini ödəyir. Amma Qərbin qarşıdakı illərdə bu tədarükləri əvəz edəcək heç nəyi yoxdur.

Partiya rəhbərinin fikrincə, bu “asılılıqdan” xilas olmağın yeganə yolu başqasından alış-veriş etməkdir:

“Hazırda Rusiya Federasiyasından başqa, yalnız iki Avropa - Britaniyanın “URENCO” və Fransanın “Orano” şirkətləri atom elektrik stansiyalarında yanacaq kimi istifadə üçün uranın zənginləşdirilməsi ilə məşğul olur və məhsullarını bazara çıxarırlar. Rusiya payını əvəz etmək üçün onlar istehsal gücünü artırmalı olacaqlar. Amma bunun üçün çox uzun zaman tələb olunur, həm çox baha başa gəlir. Xüsusən də, bu, hər yerdə mümkün deyil.

Beləliklə, “URENCO”-nun Almaniyadakı müəssisələri çətin ki, siyasi səbəblər üzündən istehsalı artıra bilsin, çünki ölkədə çox güclü anti-nüvə əhval-ruhiyyəsi var. Bütün bu amilləri nəzərə alsaq, Qərb istehsal üçün lazımi şərait yarada bilsə belə, 2028-ci ilə qədər Rusiyadan idxalın əvəzlənməsindən ciddi danışa bilməyəcək. Digər tərəfdən, bunun üçün onlara milyardlarla dollar investisiyalar lazım olacaqdır".

Abdinov qeyd edib ki, 2028-ci ilə qədər Avropa İttifaqı və ABŞ Rusiyadan gələn nüvə yanacağından asılı olacaq və tədarükdə istənilən fasilə onların bütün nüvə sənayesinə ciddi zərbə vuracaq:

"Moskva ilə münasibətlərin pisləşdiyini nəzərə alsaq, Amerika və Avropa rəhbərliyini qorxudan da budur. Əgər bu gün qəfildən Rusiyadan tədarükün dayandırılması barədə qərar qəbul edilərsə, ABŞ nüvə yanacağının 15 faizini itirəcək. Onlar bunu anbarlarından götürməli olsalar, birtəhər keçinəcəklər, amma bu, orada nəticə etibarı ilə elektrik enerjisinin 20 faizini istehsal edən AES-lərin 15 faizinin itkisidir. Bu, ABŞ-ın ümumi enerjisinə vurulacaq ağır zərbədir".

Onu da qeyd edək ki, Avropa İttifaqı (Aİ) və ABŞ Rusiyanın nüvə yanacağından, eləcə də AES-lərə texniki xidmətdən asılılığı azaltmaq üçün iki gün öncə razılığa gəliblər. Belə bir qərar ABŞ dövlət katibi Entoni Blinken və Aİ-nin ali nümayəndəsi Cozep Borrelin iştirakı ilə Aİ-ABŞ Enerji Şurasının iclasında verilib.

ELÇİN
Reyting.az

Ana səhifəyə dön