Amerikalı milyarder İlon Maska məxsus olan "SpaceX" öz internet şəbəkəsi "Starlink" üçün nəzərdə tutulan, hər yerdə işləyə biləcək yeni telefon istehsal edəcək.

Reyting.az "Reuters" agentliyinə istinadla xəbər verir ki, "SpaceX" şirkəti artıq yaxın vaxtlarda "Starlink" xidmətini yeni bazarlara çıxarmağı planlaşdırır.

Şirkət öz telefonunu yaratmaq və mobil cihazları birbaşa keyfiyyətli peyk interneti ilə təmin etməklə yanaşı, həm də kosmik obyektlərin izlənməsi üçün xidmətini təqdim edəcəyini bildirib.

"SpaceX" nümayəndələri qeyd ediblər ki, yaxın vaxtlarda şirkət ilkin səhm buraxılışını reallaşdırmaq fikrindədir.

Lakin "Starlink" şəbəkəsinə birbaşa qoşula biləcək mobil cihazın hazırlandığı barədə məlumat olsa da, detalları və buraxılış vaxtı ilə bağlı açıqlama verilməyib. Şirkətin sahibi İlon Mask deyib ki, bu telefon tamamilə adi smartfonlardan fərqli olacaq, üstəlik, cihaz neyron şəbəkələr üçün optimallaşdırılacaq.

"Starlink" məhsulu "SpaceX" şirkətinin əsas gəlir mənbəyi sayılır. Məlumata görə, keçən il Maskın şirkəti 16 milyard dollar gəlirdən 8 milyard dollar təmiz qazanc əldə edib ki, bunun da 50-80 faiz gəliri "Starlink" internet şəbəkəsi vasitəsilə əldə olunub.

"SpaceX" həm də "direct-to-device" texnologiyasını inkişaf etdirməklə kapitalını artırır. Elə buna görə də, 9500 peykdən 650-si birbaşa mobil cihazlarla əlaqə üçün nəzərdə tutulub ki, burada da əsas məqsəd dünya üzrə mobil əhatəni təmin etməklə, qlobal liderə çevrilməkdir.

Oqtay QORÇU