Natiq Cəfərli: “İnflyasiyanın və qiymət artımının səbəbi...”

"Bill Gates bir neçə gün öncə publik çıxışlarının birində elan etdi ki, dünya pandemiya zamanı böyük səhv edib, sən demə, virus təhlükəli deyilmiş, kütləvi vaksinləşmə, sərt “lockdown”lar yanlış olub, çıxış yolu virusla birgə yaşamaq, “kütləvi immunitet” qazanmaq imiş”.

Reyting.az xəbər verir ki, bunu REAL Partiyasının funksioneri, iqtisadçı Natiq Cəfərli deyib.

Onun sözlərinə görə, yeni cərəyan olan “Liberal-faşizm”in əsas simalarından sayılan Bill Gates qapanmaların dünyada iqtisadiyyata, insanların sağlamlığına vurduğu ziyandan danışıb. “Doğrudur, o, çıxışında yenə öz xislətindən və qlobal “agenda”sından da ən çəkməyib – insanlığı yeni, daha dəhşətli pandemiyaların olacağı ilə qorxudub, cinayətkar qurum olan ÜST-ə daha çox dəstək olmaqdan söz açıb. Hətta insan haqq və azadlıqlarına böyük təhdid olan ÜST-ün yeni “Global Health Emergency Corps” layihəsini ağızdolusu tərifləyib, bütün dövlətləri və varlı insanları bu proqrama dəstək olmağa çağırıb. ÜST-ün bu təşəbbüsü ona hesablanıb ki, dövlətlərüstü qurum yaransın, verdiyi qərarlar dövlətlər üçün məcburi xarakter daşısın. Bu, çox təhlükəli təklif və ideyadır",- deyə N. Cəfərli əlavə edib.

Pandemiya məsələsinə toxunan iqtisadçı bildirib ki, 2020-ci ilin mart ayında - pandemiya elan olunduqdan dərhal sonra REAL rəhbərliyi dəfələrlə Bill Gatesin bir neçə gün əvvəl söylədiklərini bəyan edib: "O zaman bizim məmləkətdə bəlli bir qrup - aqressiv “liboş” tayfasının bizə demədikləri qalmadı, təhqir etdilər, aşağıladılar... Amma tarix və gedişat yenə bizi haqlı çıxartdı, bizim 3 il əvvəl dediklərimiz sonradan elmi araşdırmalarla sübuta yetirildi, yetirilməkdə də davam edir. Mən əminəm ki, dünyanın başı Rusiyanın Ukraynaya təcavüzünə qarışmasaydı, dünya siyasi elitası bu cinayətin altından belə rahatlıqla çıxa bilməzdi. Ümid edirəm ki, hələ çıxmayıb, bir müddət sonra pandemiya adı altında insan haqq və azadlıqlarını tapdalayan, iqtisadiyyatı məhv edən yanaşma və siyasət müəllifləri mütləq ədalətli məhkəmə qarşısında cavab verəcəklər.

Bu gün dünyada tüğyan edən inflyasiya, qiymət artımı, bank-maliyyə böhranı təhlükəsi, orta sinfin azalması və s. hallar “pandemiyanın” rəzil idarəçiliyindən doğdu".

N. Cəfərli diqqətə çatdırıb ki, Avropa Şurası ölkələrində fəaliyyət göstərən siyasi partiyalar arasında ilk dəfə məhz REAL Partiyası elmi-siyasi, ictimai araşdırma apararaq bu problemlə bağlı 53 səhifəlik geniş sənəd hazırlayaraq təqdim edib: "Azərbaycan iqtidarı bu sənədə cavab verə bilmədi. Bu gün də mənasız olaraq quru sərhədləri qapalı saxlayır. Ümumiyyətlə, tək bu problemlə bağlı deyil, inflyasiya, yerli özünüidarəetmə, böyük şəhər bələdiyyələri, memarlıq siyasəti, iqtisadi tənzimləmə ilə bağlı mövqe sənədləri yaysaq da, hökumətdən aydın cavab almamışıq".

E. KAMAL

Ana səhifəyə dön