Əli Əsədovdan bahalaşmaya reaksiya: "Dünya fevraldan əvvəlki vəziyyətə qayıtmayacaq"

"Dövlət büdcəs iqtisadiyyatın güzgüsü hesab edilir".

Reyting.az xəbər verir ki, bunu baş nazir Əli Əsədov Milli Məclisin bugünkü keçirilən plenar iclasında deyib.

Baş nazirin sözlərinə görə, gələn ilin büdcəsində hazırki dövrün reallıqları, problemləri və çağırışları əks olunub: "Ölkədə əsas cari təlabatın ödənilməsi, gələcək inkişaf üçün zəmin yaradılması, sosial iqtisadi büdcədə ehtiyac və imkanların düzgün balanslaşdırılması təmin edilməlidir. Dövlət büdcəsinin tərtibi zamanı biz makroiqtisadi maliyyə sabitliyini, strateji valyuta ehtiyatlarının qorunmasını diqqət mərkəzində saxlayırıq. Son vaxtlar müşahidə olunan beynəlxalq səviyyəli gərginlik, qlobal istehsal zəncirindəki qırılma və digər məsələlər dünyada ərzağın bahalaşmasına, ərzaq qıtlığına səbəb olub. Yüksək inflasiya fonunda qlobal artım sürətinin zəifləməsi dünya iqtisadiyyatını tənəzzüllə üz-üzə qoyur. Hər kəsə bəllidir ki, dünya fevraldan əvvəlki vəziyyətə bir də qayıtmayacaq".

Baş nazirin sözlərinə görə, hökumət qiymət artımının qarşısını almaq üçün zəruri tədbirlər görür: "Qiymət artımı ilə əlaqədar hökumət tərəfindən əhalinin real gəlirlərinin və alıcılıq qabiliyyətinin qorunması üçün inflyasiya təzyiqlərinin azaldılması istiqamətində zəruri tədbirlər görülür və görüləcək. Əsas ərzaq məhsulları üzrə ehtiyatların yaradılması istiqamətində ciddi işlər aparılır, o cümlədən əsas məhsullar üzrə ciddi ixrac məhdudiyyətləri tətbiq edilib, 90 günlük mal ehtiyatları yaradılıb. Başlıca məqsədimiz əhalimizi əsas ərzaq məhsulları ilə təmin etməkdir. Növbəti ildə də ərzaq təhlükəsizliyi tədbirləri üçün büdcə xərclərinin həcmi artırılır və cari ilə nisbətən 38,6% çoxdur (625,2 mln. manat). Azərbaycan Respublikası Prezidentinin “Ərzaqlıq buğda ilə özünütəminetmə səviyyəsinin yüksəldilməsinə dair bir sıra tədbirlər haqqında” 2022-ci il 19 iyul tarixli Fərmanından irəli gələn tədbirlər üçün gələn ilin dövlət büdcəsində müvafiq vəsait nəzərdə tutulub (180 milyon manat).

Ümumiyyətlə dünyada və regionda baş verən geosiyasi proseslərə və çətinliklərə baxmayaraq ölkəmizdə ərzaq ehtiyatı ilə bağlı hər hansı problem olmayıb və yoxdur".

Ə.Əsədov onu da bildiirb ki, hazırda Azərbaycanda həyati vacib dərman təminatında hər hansı ciddi çətinlik yoxdur: “Azərbaycanda əhalinin istifadə edə biləcəyi dərman vasitələrinin 95 faizindən çoxu idxal edilir. Dərmanların yarısı Türkiyə, Almaniya, Birləşmiş krallıq, Ukrayna və Belarusiyanın payına düşür. Sadalanan ölkələrdən beynəlxalq səviyyəli səbəblərdən dərman qiyməti və təminatında mənfi təsirlər müşahidə olunur. Azərbaycanda dərmanların qiymətlərinin tənzimlənməsini Tarif Şurası müvafiq qaydalara uyğun həyata keçirir. Şuranın tənzimlədiyi 13 493 adda dərmandan son qiymət artımı səbəbindən 277 adda dərmanın qiyməti dəyişib. Bu da ümumi dərmanların 2 %-ni təşkil edir. Onlardan da 126-sı Rusiya, Ukrayna və Belarus istehsalıdır. Bu ölkələrdən dərman idxalında qiymət artımı qaçılmaz idi. Son zamanlar bir neçə adda dərman çatışmazlığı, təchizatı məsələsində problemlər qaldırılıb və hökumət bunu da ciddi nəzarətə götürüb".

Ana səhifəyə dön