Avropa Birliyi Putinin qaz şantajına cavab verib

Rusiyanın Ukraynaya qarşı müharibəsinin yeddinci ayında Avropa İttifaqı elektrik enerjisi istehsal edən şirkətlərin gəlirlərini məhdudlaşdırmaq üçün plan hazırlayır.

Reyting.az xəbər verir ki, bu barədə Avropa Komissiyasının sədri Ursula fon der Leyen bildirib.

Ursula fon der Leyen qeyd edib ki, bu təklif enerji qiymətlərinin sürətli artımından təsirlənən insanlara kömək etmək üçün 140 milyard dollar cəlb edə bilər.

“Bu şirkətlər heç vaxt ağlına belə gətirmədikləri, hətta xəyal etmədikləri gəlirlər əldə edirlər”, - Avropa Komissiyasının prezidenti əlavə edib.

Von der Leyen deyib ki, təbii qazın qiymətlərin təyin olunmasına təsirini azaltmaq üçün “elektrik enerjisi bazarında dərin və hərtərəfli islahat” lazımdır.

Komissiya rəhbəri əlavə edib: “Bizim sosial bazar iqtisadiyyatımızda qazancla hər şey qaydasındadır, yaxşıdır. Amma bizim dövrümüzdə müharibə və istehlakçıların hesabına son dərəcə yüksək rekord gəlir və mənfəət əldə etmək düzgün deyil. İndiki dövrdə mənfəət bölünməli və ən çox ehtiyacı olanlara yönəldilməlidir”.

Leyenin fikrincə, təklifləri üzv dövlətlər üçün 140 milyard avrodan çox vəsait cəlb edəcək ki, onlar zərbəni birbaşa yumşa bilsinlər.

Xatırladaq ki, 7 sentyabr 2022-ci ildə Avropa Komissiyasının elektrik enerjisinin qiymətinin məhdudlaşdırılması üzərində işlədiyi barədə məlumatlar yayılıb.

Avropa Komissiyası Aİ-yə üzv dövlətlərə qazdan istifadə olunmadan istehsal edilən elektrik enerjisinin qiymətini MVt üçün 200 avro səviyyəsində məhdudlaşdırmağı və bazar qiymətləri bu həddi keçərsə, gəlir vergisi tutmağı tövsiyə edəcək. Həddindən artıq gəlir şirkətlərə və ev təsərrüfatlarına kömək etmək üçün yenidən bölüşdürüləcək.

Onu da qeyd edək ki, avqustun 31-də “Qazprom” “Şimal axını-1” vasitəsilə Avropaya qaz nəqlini dayandırıb. Şirkət bəyan edib ki, boru kəməri kompressorunun hissələrində neft sızması aşkar edilib və sızma aradan qaldırılana qədər avadanlıqlar dayandırılmalıdır.

Öz növbəsində adətən “Şimal axını-1” turbinlərinə texniki xidmət göstərən “Siemens Energy” bildirib ki, belə sızma kəmərin fəaliyyətini dayandırmamalıdır.

Sentyabrın 2-də Rusiyanın “Qazprom” qaz şirkəti “Şimal axını-1” boru kəməri ilə qaz nəqlini qeyri-müəyyən müddətə tamamilə dayandırdığını elan edib. Sentyabrın 3-də Ağ Ev “Şimal axını”nın tamamilə bağlanmasına reaksiya verib.

Rusiyanın “Şimal axını” qaz kəmərinin dayandırılması fonunda Avropada qazın spot qiyməti sentyabrın 5-də səhər saatlarında 30 faiz artaraq min kubmetr üçün təxminən 2900 dollar təşkil edib. Sentyabrın 6-da Fransa prezidenti Emmanuel Makron Rusiya qazının qiymətinin məhdudlaşdırılması ilə bağlı Avropa Komissiyasının təklif etdiyi variantları dəstəkləyib.

Ana səhifəyə dön