İqtisadi islahatlar müzakirəyə çıxarılıb

İqtisadi İslahatların Təhlili və Kommunikasiya Mərkəzi (İİTKM) regionlarda “Azərbaycanda iqtisadi islahatlar: Nailiyyətlər və perspektivlər” mövzusunda regional ictimai müzakirələri davam etdirir.

İİTKM-dən Reyting.az-a verilən məlumata gərə, növbəti görüş Azərbaycanın şimal qərb bölgəsində keçirilib. Şəki, Balakən, Qax, Qəbələ, Oğuz və Zaqatala ictimaiyyəti ilə regional müzakirə zamanı ölkədə aparılan iqtisadi islahatlar müzakirə edilib, islahatın nəticələrindən necə faydalanmağın yolları araşdırılıb.

Tədbirdə əvvəlcə Şəki Şəhər İcra Hakimiyyəti başçısının birinci müavini Həsən Həsənov qonaqları salamlayıb. Müzakirənin mahiyyətinin qısa təqdimatından sonra Azərbaycan Respublikası Prezidentinin İqtisadi siyasət və sənaye məsələləri üzrə köməkçisi xidmətinin sektor müdiri Elxan Mikayılov çıxış edib. O bildirib ki, son illər iqtisadi islahatların nəticəsi olaraq, respublikanın bölgələrində, eləcə də böyük şəhərlərdə mühüm inkişaf prosesi nəzərə çarpır. Aparılan siyasət nəticəsində sənaye istehsalı, kənd təsərrüfatının inkişafı artır, yeni sənaye zonaları yaradılır.

Sektor müdiri bildirib ki, Prezident İlham Əliyevin də qeyd etdiyi kimi bu gün şimal-qərb zonası öz sürətli inkişaf dövrünü yaşayır, perspektivləri də çox müsbətdir. Onun qənaətinə görə, indi mövcud olan problemlərin həlli ilə bu inkişaf prosesi daha da sürətlənəcək.

İİTKM-in icraçı direktoru Vüsal Qasımlı isə Dünya İqtisadi Forumunun "2017-2018 Qlobal Rəqabətlilik Hesabatı"nda Azərbaycanın iki pillə irəliləməsini ölkədə həyata keçirilən davamlı islahatların məntiqi nəticəsi olduğunu vurğulayıb. O əlavə edib ki, bu inkişaf prosesində bölgələrin iqtisadiyyata verdiyi töhvə çox böyükdür: “Azərbaycanda pambıqçılıq, tütünçülük, fındıqçılıq, baramaçılıq, çayçılıq, sitrus bitkilərinin inkişafına kompleks dövlət dəstəyi, turizmin inkişafı, sənaye, aqro və texnoparkların qurulması, müxtəlif təşviq mexanizmləri bölgələrin inkişafını sürətləndirir. Azərbaycanda aparılan iqtisadi islahatlar bölgələrin qeyri-neft sektorunda və qeyri-neft ixracında payını artırır. Şimal qərb bölgəsinin bu inkişafda payı xüsusidir”.

Qeyd edək ki, İİTKM-in Strateji Planlaşdırma və İnkişaf Departamentinin rəhbəri Ramil Hüseyn "Azərbaycan Respublikasında iqtisadi islahatlar: Şəki-Zaqatala iqtisadi rayonunun inkişaf perspektivləri" mövzusunda prezentasiya təqdim edib. O, həmçinin, Strateji Yol xəritələrinin bu bölgənin inkişafına verəcəyi töhfədən danışıb.

Daha sonra İqtisadiyyat nazirliyinin sektor müdiri Fariz Əhmədov da tədbir iştirakçılarına təmsil etdiyi qurumun gördüyü işləri əhatə edən “Sahibkarlığın inkişafının dəstəklənməsi, biznes mühitinin yaxşılaşdırılması istiqamətində həyata keçirilən islahatlar və əldə edilmiş nəticələr” mövzusunda təqdimat edib.

Tədbirdə Vergilər nazirliyinin və Kənd Təsərrüfatı nazirliyinin nümayəndələri də iştirak ediblər.

Çıxışlar yekunlaşdıqdan sonra sahibkarları, bələdiyyə və ictimaiyyət nümayəndələrini maraqlandıran suallara cavablar verilib.

Qeyd edək ki, belə bir görüş ötən həftə cəbhə bölgəsində keçirilib.

Quba, İsmayıllı, Gəncə, Şirvan, Lənkəran və Mingəçevirdə də bu mövzuda müzakirələr aparılacaq.

İİTKM-in icraçı direktoru V.Qasımlı müzakirələrə yekun vuraraq bildirib ki, bu tip görüşlər ölkədə aparılan islahat prosesinin daha geniş ictimaiyyətə çatdırılması, birbaşa dialoqların təşkil olunması, məlumatlılığın və maariflənmənin təmin edilməsi, dövlət-özəl dialoqun güclənməsinə töhfə vermək məqsədi ilə keçirilir.

Ana səhifəyə dön