Beynəlxalq agentlik SOCAR-ın reytinqini təsdiqləyib

“Fitch Ratings” beynəlxalq reytinq agentliyi SOCAR-ın uzunmüddətli defolt reytinqini “BB+” səviyyəsində təsdiqləyib.

Reyting.az xəbərinə görə, agentliyin press-relizində deyilir ki, reytinq üzrə proqnoz “Mənfi”dir.

SOCAR-ın emitentin qısamüddətli defolt reytinqi “B” səviyyəsində, təmin olunmamış prioritet reytinqi isə “BВ+” səviyyəsində təsdiqlənib.

“SOCAR tamamilə dövlətə məxsusdur və onun reytinqi Azərbaycanın reytinqinə (BB +/mənfi) bərabərdir. Bu, şirkətə maliyyə təminatları, vəsait qoyuluşları və səhmdar kapitalına inyeksiyalar şəklində dövlət dəstəyi, həmçinin SOCAR-ın sosial funksiyaları və onun neft-qaz layihələrinin inkişafı üçün dövlət aləti kimi əhəmiyyəti ilə dəstəklənir”, - deyə məlumatda bildirilir.

“Fitch” qeyd edir ki, 2020-ci ilin birinci yarısında SOCAR-ın nəticələri agentliyin proqnozlarına əsasən gözləniləndən daha yaxşı olub.

Agentliyin qiymətləndirmələrinə görə, 2020-ci ildə SOCAR-ın EBITDA üzrə gəlirləri 2019-cu illə müqayisədə orta səviyyədə azalacaq və 2021-ci ildə neftin qiymətinin daha yüksək olması və cari ilin yanvar ayından yanacağın tənzimlənən qiymətinin bahalaşması fonunda bərpa olunmalıdır.

Agentlik SOCAR üzrə hasilatın yüksək səviyyəsini (gündəlik 267 min barel neft ekvivalenti) qeyd edir.

SOCAR üçün neftin bir barelinin 20 dollar olması mənfəətli hesab olunur. Kəşfiyyat və hasilat seqmenti SOCAR-ın mənfəətinin əsas drayveridir.

“Fitch Ratings”in məlumatına görə, SOCAR-ın ödədiyi vergilər 2019-cu ildə dövlət gəlirlərinin təxminən 10 faizini təşkil edib.

“Şirkətin fəaliyyətinə dövlət tərəfindən nəzarət olunur: o, yanacağın daxili qiymətlərinin tənzimlənməsi, pul inyeksiyası və digər tədbirlər vasitəsilə SOCAR-ın mənfəətliliyinə və balansına nəzarət edir. Hesab edirik ki, hökumətin SOCAR-ı kifayət qədər dəstəkləmək üçün stimulları var”, - deyə press-relizdə vurğulanır.

Agentliyin qiymətləndirmələrinə görə, qısamüddətli perspektivdə reytinqə yenidən baxılması (“Mənfi”), həmçinin reytinqin yüksəldilməsi ehtimalı azdır. Lakin Azərbaycan üzrə kredit reytinqi üzrə proqnoz “Mənfi”dən “Sabit”ə dəyişdirilərsə, SOCAR-ın reytinq proqnozu üzrə də analoji addım atılacaq.

Reytinqin aşağı salınmasına səbəb ola biləcək əsas amillər bunlardır:

iqtisadi siyasət çərçivəsində makroiqtisadi sabitliyə (dövlətin xarici balansının pisləşməsi və ya manatın mübadilə məzənnəsinin devalvasiyası) mənfi təsir göstərəcək dəyişikliklər;

neftin ucuz qiyməti və ya ölkənin xarici mövqeyinə son dərəcə mənfi təsir göstərməyə kifayət edəcək davamlı xarici şok (bu isə iqtisadiyyat, bank sektoru və dövlət maliyyəsi üçün mənfi nəticələrə gətirib çıxaracaq).

Reytinqin yüksəldilməsinə səbəb ola biləcək əsas amillər bunlardır:

Azərbaycan hökumətinin konsolidasiya edilmiş büdcə kəsrini azaltmaq və dövlət borcunu aşağı səviyyədə saxlamaq qabiliyyətinə əminlik;

xarici şoklara qarşı müqavimət göstərmək qabiliyyətini gücləndirən və makrovolatilliyi azaldan məzənnə siyasətinin şəffaflığı da daxil olmaqla makroiqtisadi siyasətin baza prinsiplərinin təkmilləşdirilməsi.

2021-2023-cü illər üçün SOCAR-ın kapital qoyuluşları 9 milyard manat (cari məzənnə ilə 5,3 milyard dollar) məbləğində qiymətləndirilir.

“2021-2023-cü illərdə şirkətin kapital qoyuluşları bu dövrdə manatın sabit məzənnəsi 1,7 manat/1USD olmaqla 9 milyard manat təşkil edəcək”, - deyə agentliyin press-relizində bildirilir.

Agentlikdə hesab edirlər ki, ortamüddətli dövrdə SOCAR-ın kapital qoyuluşları orta səviyyədə olacaq. Belə ki, əsas layihələr - Cənub Qaz Dəhlizi (CQD), Türkiyədəki STAR neft emalı zavodu artıq işə salınıb və böyük həcmdə əlavə kapital axını tələb etməyəcək. Bununla yanaşı, SOCAR digər layihələrə - karbohidrogen kəşfiyyatı və hasilatı, H. Əliyev adına neft emalı zavodunun modernləşdirilməsi layihələrinə kapital qoymağı planlaşdırır.

“Fitch”in proqnozlarına görə, 2021-ci ildə 1 barel neftin orta qiyməti 58 dollar, 2022-ci ildə 53 dollar təşkil edəcək.

Agentliyin qiymətləndirmələrinə görə, qarşıdakı üç il ərzində SOCAR karbohidrogen hasilatını sabit səviyyədə saxlaya biləcək. Bundan başqa, Dövlət Neft Şirkəti hökumətin daimi və hərtərəfli dəstəyinə arxalana bilər.

“Fitch”in analitikləri qeyd edirlər ki, 31 dekabr 2020-ci ilə vəziyyətə görə, SOCAR-ın likvidliyi təxminən 8 milyard manata yaxın olub ki, bu da şirkətin qısamüddətli borcunun həcmi ilə müqayisə edilə bilər.(Marja)

Ana səhifəyə dön