Natiq Cəfərli Milli Bankın sədri ilə görüşüb

Natiq Cəfərli

"Dünən günün ikinci yarısında Mərkəzi Bankın rəhbəri hörmətli Taleh Kazımovun bir neçə iqtisadçı ilə növbəti görüşü oldu. Belə müzakirələrin ənənəyə çevrilməsi sevindiricidir, bunun üçün Mərkəzi Bankın komandasına təşəkkür edirəm".

Reyting.az xəbər verir ki, bunu Respublikaçı Alternativ Partiyasının sədri Natiq Cəfərli deyib.

N. Cəfərli bildirib ki, görüşdə çox açıq fikir mübadiləsi olub, Mərkəzi Bankın bir çox məsələlərlə bağlı mövqeyini birbaşa qurumun rəhbəri səsləndirib:

"Suallarımızı verdik, razı olmadığımız məqamları bildirdik. Taleh müəllimin söhbət zamanı bir neçə dəfə, “Mərkəzi Bank inzibati alətlərdən istifadə etmək istəmir, salahyyətləri çərçivəsində iqtisadi alətlərə üstünlük verir”, - fikrini bəyəndim. Dövlət qurumu olan Mərkəzi Bankın belə yanaşmasını hökumət qurumları da mənimsəsə, yaxşı olar.

Mərkəzi Bank iqtisadi alətlərlə bazara müdaxilə edib gözlədiyi reaksiyanı ala bilmir, çünki hökumət orqanları bazar iqtisadiyyatı məntiqi ilə davranmağı unudublar, onların əsas aləti inzibati müdaxilələr, sərt tənzimləmə mexanizmlərinin tədbiqidir. Bu gün Avropa Birliyi ölkələrində iqtisadi geriləmənin əsas səbəblərindən biri “over regulation”, aşırı tənzimləmədir. ABŞ-a və Çinə həm də buna görə uduzurlar".

N. Cəfərli deyib ki, görüş zamanı bir neçə məsələni qaldırıb:

"Mərkəzi Bankın həftəlik valyuta hərracları nəticələrinin 1 aydan çoxdur ki, açıqlamamasını doğru saymıram. Taleh müəllim kifayət qədər arqumentli izah etsə də, düşünürəm ki, bu qərar bazarda ajiotajı azaltmır, əksinə, artırır. Bəli, dolayı rəqəmlərlə zatən hər ay nə qədər valyuta satıldığı, bir il ərzində Neft Fondunun nə qədər dollar satacağı da öncədən bilinir, bu həcm dəyişmir, amma, düşünürəm ki, həftədə 2 hərrac haqqında hər yeni həftənin 1-ci günü ümumi məlumat dərc olunsa, yaxşı olar.

İkincisi, Maliyyə Nazirliyinin ehtiyat büdcə vəsaitini banklara 3 aylıq depozitə qoyması məsələsini də qaldırdım, yeni, doğru yanaşmadır, amma, problem odur ki, bu vəsait 3-4 iri, sistemyaradan banklara yerləşdirilir, kiçik banklar rəqabətdə daha da geri düşür.

Üçüncüsü, ölkədə vətəndaşlar arasında xarici birjalarda qiymətli kağızların alqı-satqısı getdikcə populyarlaşır, amma bu fəaliyyətin vergi ayağı doğru tənzimlənmir, vergi insanlara problem yaradır, buna görə də, bizim treyderlər xarici banklara üz tutub onların online bankçılığı platformalarından istifadəyə üstünlük verirlər.

Taleh müəllim ölkədə cəmi 150 min vətəndaşın əmanət hesabının olduğunu dedi. Bu, ölkəmiz üçün çox kiçik rəqəmdir, amma nəticədir, səbəblər bank sektoruna güvənin hələ tam təsis olunmaması, gizli iqtisadiyyatın miqyasının böyük olması və insanların rəsmi rəqəmlərin yaxşı göstərilməsinə rəğmən daha kasıb olmasıdır”.

N. Cəfərli bank kredit faizlərinin yüksək olmasının və manatın gələcəyinin də müzakirə olunduğunu qeyd edib: “Aldığımız siqnal belədir ki, nə Mərkəzi Bank, nə də hökumət yaxın-orta vadədə manatın məzənnəsinin dəyişməsini istəmir, inzibati-sabit məzənnə rejimini saxlamağı düşünürlər".

V. QULİYEV

Ana səhifəyə dön