Avtomobil sənayesində inqilabi dəyişiklik olacaq

Yaponiyanın avtomobil şirkəti "Toyota" daxili yanma mühərrikləri ilə bağlı böyük dəyişikliyə hazırlaşır.

Reyting.az "Automotive News" nəşrinə istinadla bildirir ki, "Toyota"-nın gördüyü bu işi daxili yanma mühərrikləri sahəsində inqilab adlandırmaq olar.

"Toyota" şirkətinin baş texnologu Hiroki Nakajima yeni 1,5, həmçinin 2,0 litrlik tutumlu mühərrikləri "potensial olaraq inqilabi həll yolu" kimi təqdim edib. Baş texnoloq onların hazırkı daxili yanma mühərrikləri ilə müqayisədə "tamamilə fərqli" olacağını deyib.

Onun sözlərinə görə, hidrogen avtomobilləri əsas istiqamətə çevrilməsə belə, "Mirai" üzərində aparılmış uğurlu iş "Toyota" mühəndislərinə avtomobillərin mühərriklərinin istilik səmərəliliyi barədə daha səmərəli məlumatlar əldə etməyə köməklik göstərib.

Nakajima söhbətin nədən getdiyini, yəni istilik səmərəliliyi barədə ətraflı məlumat verməsə də, məlum olduğu kimi, "Toyota" əvvəllər də üstünlük qazanaraq bu sahədə təxminən 40 faiz səviyyəsinə qədər çata bilmişdi. Müqayisə üçün qeyd olunur ki, "Nissan e-Power" texnologiyası sayəsində onlar hətta 50 faizə belə nail olduqlarını iddia edirlər. Lakin burada bir fərq də var, yəni daxili yanma mühərriki təkərləri idarə etməkdənsə, batareyanı doldurmaq üçün generator kimi istifadə olunur. "Mazda" avtomobillərində, həmçinin də "MX-30" model avtomobillərdə fırlanan mühərriklə və geniş diapazonlu elektrik krossoveri ilə bir-birinə oxşayan texnoloji yanaşma tətbiq edilib.

"Toyota"-nın yeni mühərrikləri daha qısa porşen vuruşuna sahibdir, bu isə brendin mühəndisləri üçün çox çətin iş olduğunu sübut edib. Bu yeni maşının dörd silindrli mühərrikləri daha kiçik olacaq, həmçinin təkmilləşdirilmiş aerodinamika üçün ön hissə aşağı salınacaq. Beləliklə, "Toyata" yenilik edərək avtomobil qablaşdırmasında böyük inqilab edəcək.

Mütəxəssislərin dediyinə görə, elektrik mühərrikinin ani reaksiyası ilə kompensasiya ediləcək yeni daxili yanma mühərrikləri əsasən "Toyota"-nın hibrid sistemləri üçün nəzərdə nəzərdə tutulub.

Yeni istehsal ediləcək belə mühərrikli ilk avtomobillərin 2027-ci ilə qədər yollarda görünəcəyi gözlənilir. "Toyota" şirkəti tək qalıq yanacaqla deyil, həmçinin hidrogen və eləcə də sintetik yanacaqla, həmçinin bioyanacaqla işləyə bilən güc aqreqatları hazırlayır. Nakajima iddia edir ki, bu yeni yoldur və müasir mühərrikləri "təkmilləşdirmək üçün çox imkanlar var".

Nakajimanın açıqlamasından sonra məlum olub ki, "Toyota" şirkətinin hələlik danışmaq istəmədiyi yeni mühərriklərlə bağlı fəaliyyətində çoxsaylı mühəndislik nailiyyətləri də var.

Beləliklə də "Toyota" yeni texnologiyaları inkişaf etdirmək və istilik səmərəliliyini artırmaqla daxili yanma mühərrikləri sahəsində avtomobil dünyasında inqilabi addım atmağa hazırlaşır.

Oqtay QORÇU

Ana səhifəyə dön