Keçmiş nazir: “Qərbin sanksiyaları Rusiya iqtisadiyyatını məhv edə bilməz”

Qiymət tavanının azaldılması Rusiya neftinin ixracına təsir etməyəcək.

Reyting.az xəbər verir ki, bunu Rusiya maliyyə nazirinin sabiq müavini, ölkənin Mərkəzi Bank sədrinin keçmiş birinci müavini Sergey Aleksaşenko bildirib.

S. Aleksaşenko deyib ki, Avropa İttifaqının (Aİ) yeni 12-ci sanksiyalar paketində, xüsusən də Rusiyadan Avropa İttifaqına almaz ixracına məhdudiyyətlər, habelə Rusiya neftinin ixracı üçün qiymət tavanının azaldılması (hazırda barreli 60 dollardır) kimi cəza tədbirləri yer almalıdır.

Onun fikrincə, Qərb tərəfindən rus almazlarının alınmasına qoyulan məhdudiyyətlərin təsiri Rusiya büdcəsinə həssas ola bilər. Lakin qiymət tavanının azaldılması Rusiyanın neft ixracına heç bir şəkildə təsir etməyəcək.

Ekspert əlavə edib ki, Rusiya hökumətinin neftin qiymətinin dəyişməsi ilə bağlı xarici şokları kompensasiya etmək üçün effektiv rıçağı var və bu, rublun məzənnəsidir: “Neftin qiyməti 10 faiz, rublun məzənnəsi isə 10 faiz ucuzlaşarsa və ya 15 faiz, o zaman büdcəyə planlaşdırıldığı kimi eyni rubl daxil olacaq”.

Aleksaşenko etiraf edib ki, Qərb sanksiyalarının effektivliyinə dair gözləntilər reallıqdan daha yüksək olub. Lakin keçmiş nazir müavini qeyd edib ki, cəza tədbirlərinin təsirini əvvəlcədən proqnozlaşdırmaq çətin idi, çünki onların bir çoxu tarixdə ilk dəfə Rusiya kimi böyük iqtisadiyyata qarşı tətbiq edilib. “Məsələn, Mərkəzi Bankın valyuta ehtiyatlarının dondurulmasını bir çox ekspertlər, o cümlədən mən də dağıdıcı (təsir baxımından-red.) qiymətləndirib. Lakin çox az vaxt keçdi və məlum oldu ki, müsbət xarici ticarət balansı olan ölkə üçün rublun məzənnəsi üzəndirsə, əslində valyuta ehtiyatlarına ehtiyac yoxdur”, - deyə Aleksaşenko izah edib.

Rusiya hakimiyyəti, onun dediyi kimi, “qeyri-adi tədbirlər kompleksindən” istifadə etməklə iqtisadiyyatı xarici şoklara uyğunlaşdıra bilib. İlk növbədə rublun konvertasiyası ilə bağlı məhdudiyyətlər var: “Rubl konvertasiya olunmayan valyutaya çevrilib. Bəziləri üçün valyutanın konvertasiyası mümkün oldu, bəziləri üçün isə mümkün olmadı”.

Aleksaşenkonun sözlərinə görə, Hindistan və Çin kimi böyük ölkələrin Qərbin məhdudiyyətlərinə qoşulmaması da Rusiya hakimiyyətinin əlində fürsətdir.

Eyni zamanda, iqtisadçı əmindir ki, Rusiya və onun iqtisadiyyatındakı vəziyyətə “sanksiyaların heç bir təsiri olmadığını söyləmək doğru olmaz”. Bütün ÜDM artımı, onun hesablamalarına görə, yalnız hərbi istehsal hesabına qeydə alınır. Bununla belə, sanksiyalar, prinsipcə, iqtisadiyyatı, xüsusən də Rusiya iqtisadiyyatını məhv edə bilməz, çünki Rusiya xammal ixracatçısıdır.

“Üstəlik, sanksiyalar ilk növbədə maliyyə məhdudiyyətləridir və müharibəni dayandıra bilməz. Heç bir maliyyə məhdudiyyəti çox güman ki, Putinin iradəsinə və şüuruna təsir etməyəcək”, - ekspert etiraf edib.

E. KAMAL

Ana səhifəyə dön