13.7 milyon manat necə xərclənəcək, hansı texnologiyalara üstünlük veriləcək?

Ötən gün prezident İlham Əliyevin Sərəncamı ilə Azərbaycan ərazisində radioyayım şəbəkəsinin genişləndirilməsinə 13.7 milyon manat ayrılıb.

Reyting.az-ın məlumatına görə, Multimedia Mərkəzinin rəhbəri Osman Gündüz deyib ki, ayrılan vəsait çərçivəsində bütün Azərbaycan ərazisində 120 yeni FM radioyayım stansiyasının quraşdırılması, milli radio proqramlarının əhatə dairəsinin və keyfiyyətinin artırılması nəzərdə tutulur.

Onun sözlərinə görə, gözləmək olar ki, yalnız Bakıda əlçatan olan radiolar artıq bütün ölkə üzrə yayımlanacaq.

Mərkəz rəhbəri güman edir ki, layihəni hələlik yayım infrastrukturu sahəsində inhisarçı qurum olan Teleradio İstehsalart Birliyi icra edəcək və Dövlət Radiotezliklər İdarəsi yeni tezlik resursları ayıracaq:

“Düşünürəm ki, bu layihə, indiki şəraitdə vətəndaşlarımıza bütün ölkə ərazisində daha çox və keyfiyyətli radio yayımı qəbul etmə imkanının yaradılması baxımından əhəmiyyətlidir. Xüsusən də, sərhəd bölgələrində yaşayanlar üçün yerli radio kanallarına da əlçatanlıq təmin ediləcək. Eyni zamanda bununla da yerli radioyayım şirkətlərinin rəqabətliliyi və dayanıqlılığı güclənəcək".

O. Gündüz ötən il Rəqəmsal İnkişaf və Nəqliyyat Nazirliyinin (RİNN) bununla bağlı hökumətə təkliflər verdiyini də xatırladıb: “Audiovizual Şuranın da bu istiqamətdə təşəbbüsləri var idi. Qeyd edim ki, RİNN tərəfindən ölkənin informasiya fəzasının qorunması istiqamətində səyləri, təkliflərin dəstəklənməsinə nail olması və ona müvafiq resurslar əldə etməsi təqdirəlayiqdir".

O. Gündüz ayrılan vəsaitlə bağlı incə bir məqamın olduğunu da bildirib:

"Ayrılan dövlət resursu ölkədə FM şəbəkəsinin genişləndirilməsini nəzərdə tutub. 100 yaşı olan bu texnologiya isə getdikcə köhnəlir. Müşahidələr göstərir ki, dünyada FM radio üzərindən informasiya ötürülməsi getdikcə səngiyir. İnsanlar da getdikcə bu texnologiyadan uzaqlaşır, multimediaya, sosial mediaya, interaktivliyə, internet kanallara meyl edirlər. Odur ki, yalnız avtomobillərdə olan FM-in də yerini DAB (Digital Audio Broadcasting) texnologiyası, rəqəmsal radioyayım tutur.

Xatırlayıram ki, Azərbaycanda da rəqəmsal radioyayımın test edilməsi işləri aparılırdı. Burada ciddi problem son istifadəçi üçün bu tip texnologiya ilə işləyəcək qəbuledici avadanlığın əldə edilməsidir. Bildiyim qədər RİNN rəqəmsal radioyayıma, DAB texnologiyasına keçidlə bağlı Tədbirlər Planını da hökumətə təqdim edib. 5-6 ildən sonra DAB-a tələbat xeyli yüksələcək. Bu texnoligiya ilə bir tezlik resursunda bir neçə radiokanalın daha keyfiyyətli yayımı mümkün olduğundan tezliklərdən daha effektiv istifadəyə də imkan verəcək. Odur ki, qarşıdakı illərdə investisiyaların məhz bu istiqamətdə yatırımı doğru olardı".

E. KAMAL

Ana səhifəyə dön