Borrellə Bayramov birgə mətbuat konfransında: "Avropa postmünaqişə dövründə mühüm rol oynayır”

Belçikanın paytaxtı Brüsseldə Azərbaycan-Avropa İttifaqı Əməkdaşlıq Şurasının 18-ci iclası keçirilir.

Reyting.az xəbər verir ki, Azərbaycan nümayəndə heyətinə xarici işlər naziri Ceyhun Bayramov, Aİ nümayəndə heyətinə isə xarici işlər və təhlükəsizlik siyasəti üzrə ali nümayəndə Josep Borrel rəhbərlik edir.

Bildirilib ki, Əməkdaşlıq Şurası Aİ-Azərbaycan Tərəfdaşlıq Prioritetləri və Sektor əməkdaşlığını, Şərq Tərəfdaşlığı, İqtisadi və İnvestisiya Planının icrası ilə bağlı Aİ-Azərbaycan ikitərəfli münasibətlərinin durumunu, həmçinin növbəti addımları müzakirə edəcək.

Eyni zamanda Əməkdaşlıq Şurası daha sonra siyasi məsələlər, o cümlədən regional problemlər, demokratiya, qanunun aliliyi və insan haqları üzrə fikir mübadiləsi aparacaq.

***

"Əməkdaşlıq Şurasının 18-ci iclası Azərbaycanla Avropa İttifaqı (Aİ) arasında münasibətlərin vəziyyətini nəzərdən keçirmək üçün yaxşı bir imkan oldu".

Reyting.az xəbər verir ki, bunu Aİ-nin Xarici siyasət və Təhlükəsizlik məsələləri üzrə Ali Nümayəndəsi Cozep Borrell Azərbaycanın xarici işlər naziri Ceyhun Bayramovla birgə mətbuata açıqlamasında bildirib.

“Biz Aİ-Azərbaycan münasibətlərini müzakirə etdik. Hazırkı vəziyyəti nəzərə alsaq, tərəfdaşlar arasında sıx təmas və siyasi dialoq çox vacibdir. Azərbaycan bizim üçün vacib tərəfdaşdır. Bizim əməkdaşlığımız daha da intensivləşib. Mən dünən Bakıda Aİ ilə Azərbaycan arasında enerji sahəsində strateji əməkdaşlıq barədə Anlaşma Memorandumunu xatırlatmaq istəyirəm. Bu bizə imkan verəcək ki, Azərbaycandan qaz idxalının həcmini iki dəfə artıraq. Bu, həmçinin gələcəkdə Aİ ilə Azərbaycan arasında bərpaolunan enerji sahəsində əməkdaşlığa yol açacaq”, - Borrell qeyd edib.

O, əlavə edib ki, Azərbaycanla Aİ arasında imzalanan sənəd enerji səmərəliliyi sahəsində əməkdaşlığı gücləndirəcək: "Anlaşma memorandumu ilə 2027-ci ilə qədər Azərbaycanın Avropaya təbii qaz tədarükü iki dəfə artırılacaq. Biz eyni zamanda, Azərbaycanın iqtisadiyyatın şaxələndirilməsi üzrə səylərini də dəstəkləyirik".

Borrel qeyd edib ki, Avropa İttifaqı Cənubi Qafqazın təhlükəsiz, sabit və firavan məkana çevrilməsi ilə bağlı səyləri də dəstəkləyir: “Biz Azərbaycanın xarici işlər naziri ilə qonşularla, xüsusən də Ermənistanla münasibətləri müzakirə etdik. Bu baxımdan mən Azərbaycan və Ermənistan xarici işlər nazirləri arasında ötən şənbə günü Tbilisidə keçirilən görüşü alqışlayıram. Aİ bu səyləri dəstəkləməyə hazırdır və fikir ayrılıqlarını aradan qaldırmaq, həll yollarını tapmaq üzərində fəal işləyir”.

Ceyhun Bayramov isə bildirib ki, Azərbaycan və Avropa İttifaqı (Aİ) əlaqələri güclü, hərtərəfli tərəfdaşlıq istiqamətində inkişafını davam etmək niyyətindədir: “Biz Aİ ilə Azərbaycan arasında münasibətləri güclü və hərtərəfli tərəfdaşlığa çevirmək üçün ümumi məqsədlərə əsaslanan müzakirələr apardıq. Biz iqtisadi əməkdaşlığın inkişaf etdirilməsi yollarını araşdırdıq. COVID-19 pandemiyasının iqtisadi təsirlərinə baxmayaraq, Avropa İttifaqı Azərbaycanın ən böyük ticarət tərəfdaşı olaraq qalır. Aİ həm də ölkəmizdə ən böyük investordur. Enerji sahəsi Azərbaycanın Avropa İttifaqı ilə tərəfdaşlığının əsas elementi olaraq qalır. Ötən gün Azərbaycan Prezidenti İlham Əliyev və Avropa Komissiyasının rəhbəri Ursula fon der Lyayenin imzaladığı yeni anlaşma memorandumu ilə enerji tərəfdaşlığımız daha da möhkəmlənib. Biz alternativ mənbələrdən təbii qaz həcmlərini Aİ bazarına çıxarmaq məqsədi ilə Avropanın ən böyük infrastruktur və enerji layihəsi olan Cənub Qaz Dəhlizi vasitəsilə strateji tərəfdaşlığımızı inkişaf etdiririk. Yunanıstan-Bolqarıstan İnterkonnektorunun həyata keçirilməsi Cənub Qaz Dəhlizinin şaxələndirilməsini göstərir".

Ceyhun Bayramovun sözlərinə görə, Azərbaycan və Ermənistan arasında beynəlxalq səviyyədə tanınmış sərhədlər daxilində bir-birinin suverenliyinə və ərazi bütövlüyünə qarşılıqlı tanınma və hörmət əsasında münasibətlərin normallaşdırılmasının alternativi yoxdur: " Avropa İttifaqı postmünaqişə dövründə mühüm rol oynayır. İttifaq üç görüş vasitəsilə Bakı ilə İrəvan arasında münasibətlərin normallaşmasına vasitəçilik edib. Bu görüşlər faydalı idi, Cənubi Qafqazda sülh, təhlükəsizlik və rifah üçün mühüm əhəmiyyət kəsb edən məsələlər üzrə dialoqa töhfə verib.

Azərbaycan Avropa İttifaqının postmünaqişə dövründə bərpaetmə işlərinə kömək etmək səylərini yüksək qiymətləndirir. Bu gün Avropa şirkətləri işğaldan azad edilmiş ərazilərdə müxtəlif layihələrdə iştirak edir. Biz, həmçinin humanitar minatəmizləmə sahəsində köməyə, o cümlədən son 4 milyon avroluq yardım paketinə görə Aİ-yə minnətdarıq. Minatəmizləmə səylərini dəstəkləmək üçün bütün müvafiq vasitələri səfərbər edəcəyik”.