Xocalı soyqırımı ilə bağlı çağırış edilib

30 il bundan əvvəl, 1992-ci il fevralın 25-dən 26-na keçən gecə Ermənistanın nizami hərbi qüvvələri və Qarabağdakı azğın terror birlikləri Rusiyanın 366-cı motoatıcı alayının iştirakı ilə Xocalı şəhərində yalnız azərbaycanlı olmaları səbəbindən tarixdə misli görünməmiş vəhşlik və qəddarlıqla mülki insanlara qarşı dəhşətli soyqırım törədiblər. Bu soyqırım nəticəsində 63-ü uşaq, 106-sı qadın, 70-i isə qoca olmaqla 613 nəfər ağlagəlməz vəhşiliklə qətlə yetirilib, 487 nəfər ağır yaralanıb, 1 275 nəfər girov götürülüb. Girov götürülənlərdən 150 nəfərin – aralarında 68 qadın və 26 uşaq var. Onların aqibətləri haqqInda bu günə kimi heç bir məlumat yoxdur.

Reyting.az xəbər verir ki, bu xatırlatma Böyük Quruluş Partiyasının (BQP) Xocalı faciəsinin 30-cu ildönümü ilə bağlı bəyanatında yer alıb.

BQP bəyan edir ki, Xocalı soyqırımı tarixi Azərbaycan torpaqlarına soxularaq, terroru özlərinə ideologiya seçmiş ermənilərin Azərbaycan xalqına qarşı bəslədikləri insanlıqdan kənar tarixi düşmənciliyin sübutudur: “Bəşəriyyətə qarşı cinayət aktı kimi tanınan Holokost, Xatın, Oradur, Ruanda kimi genosid aktlarına bərabər olan bu amansız soyqırım hadisəsi yüz il bundan öncə ermənilərin Bakı, Qarabağ, Naxçıvan, Şamaxı, Quba, Xaçmaz, Lənkəran, Salyan, Zəngəzur və Azərbaycanın digər ərzilərində törətdikləri faciələrin davamıdır”.

Partiyanın bəyanatında qeyd olunur ki, Azərbaycan dövlətinin son illər həyata keçirdiyi ardıcıl və məqsədyönlü fəaliyyət nəticəsində Xocalı soyqırımının dünya miqyasında tanınması istiqamətində müəyyən nəticələr əldə olunub: “Xüsusilə, 2008-ci ildə “Xocalıya ədalət” Beynəlxalq İnformasiya və Təşviqat Kampaniyasının təsis edilməsi atılan mühüm addımlardandır. Bu çərçivədə bir sıra ölkələrin parlamentlərində, o cümlədən, bəzi beynəlxalq təşkilatlarda və ABŞ-ın bir neçə ştatının qanunvericilik orqanında Xocalı soyqırımını rəsmən tanıyan qətnamələr qəbul olunub.

Dünyada qəbul olunmuş beynəlxalq konvensiyalar və qanunlarla Xocalı faciəsi kimi soyqırımların pislənilməsinə, yolverilməz olduğunun qəbul edilməsinə, eləcə də aparılan uğurlu və məqsədyönlü fəaliyyətə baxmayaraq, insanlıq əleyhinə törədilən bu vəhşilik aktı hələ də Beynəlxalq səviyyədə soyqırım kimi tanınmır. Hesab edirik ki, bu istiqamətdə səylər daha da artırılmalı və Xocalı soyqırımının törədilməsində hər hansı formada iştirakı olan bütün cinayətkarların öz layiqli cəzalarını almaları yönündə təsirli addımlar atılmalıdır.

Silahlı Qüvvələrimizin 44 günlük Qarabağ Zəfəri ilə məlhəm olduğu, lakin Azərbaycan xalqının heç vaxt sağalmayacaq yarası -Xocalı soyqırımının qurbanlarının xatirəsini Böyük Quruluş Partiyası (BQP) olaraq dərin hüzn və sayğı ilə anır, onlara Allahdan rəhmət, yaxınlarına səbrlər diləyir, xalqımızın bir daha belə faciələr yaşamaması üçün daxili milli birliyin qorunmasına, beynəlxalq təşkilatları və dövlətləri isə üzərlərinə götürdükləri öhdəliklərə sadiq qalaraq Xocalıda törədilmiş soyqırımı rəsmən tanımağa, bu bəşəri cinayətdə əli olanların beynəlxalq məhkəmələrdə cəzalandırılmasına yardımcı olmağa çağırırıq”.

Ana səhifəyə dön