Ərdoğan: "Türkiyə nə Ukraynadan, nə də Rusiyadan imtina edə bilər"

Türkiyə prezidenti Rəcəb Tayyib Ərdoğan Ukrayna böhranı ilə bağlı Afrika turnesindən dönərkən açıqlamalar verib.

Reyting.az xəbər verir ki, o, Rusiyanın keçmş SSRİ-ni bərpa etməsi barədə deyilənlərə belə reaksiya verib:

“Mən burada türk dövlətlərinin nəzərdə tutulduğuna dair bir ifadə görmürəm. Sözsüz, türk respublikaları da SSRİ-dəki respublikalar sırasında olub. Bu, tarixi gerçəklikdir. SSRİ dağılanda digər respublikalar kimi onlar da müstəqilliklərini elan ediblər. Buradan 15 müstəqil dövlət meydana gəlib. Bu da tarixi reallıqdır və hüquqi cəhətdən də qəbul edilib. Rusiya sovet respublikası olaraq yox, Rusiya Federasiyası olaraq yoluna davam edib. Beləliklə, burada türk respublikalarının və ya digər ölkələrin nəzərdə tutulduğunu düşünmək istəmirik”.

Ukrayna ilə bağıı vəziyyətə toxunan Ərdoğanın sözlərinə görə, Türkiyə nə Ukrayna, nə də Rusiyadan imtina edə bilər: "İkisindən də imtina etmək mümkün deyil. Rusiya ilə həm siyasi, həm hərbi, həm də iqtisadi əlaqələrmiz var. Ukraynadan imtina et desəniz, edə bilmərik, Rusiyadan imtina et desəniz, onu da edə bilmərik. Çünki onunla da indiki vəziyyətdə inkişafda olan əlaqələrimiz var. Biz heç birindən imtina etmədən bu işin həll olunmasını istəyirik. Ona görə də komandamız və heyətimizlə görüşlər keçirəcəyik. Onun üçün də NATO liderlərinin zirvə toplantısına çox böyük əhəmiyyət veririk. Bu tədbirdə bütün liderlərin nə düşündüklərini görəcəyik. Bundan sonra özümüz fəaliyyət göstərəcəyik".

Türkiyə lideri bildirib ki, hazırda Putinlə görüşmək üçün lazımi işlər görülür:

"Putinlə telefon danışıqlarımız davam edir. Əlbəttə, müzakirələr olmalıdır. Tələsik, həyəcanla qərar vermək olmaz. Biz çox həssas davranmalıyıq, çox diqqətli addım atmalıyıq. Çünki bəziləri qəribə danışır. Biz isə dövlət idarə edirik, həssaslığımızı qorumalıyıq. Bütün dostlarımızla müzakirələr edəcəyik, bundan sonra da nələr etmək lazım olduğu barədə qərar verəcəyik. Hər şeydən əvvəl zamanın düzgün müəyyənləşdirilməsi çox mühümdür. Yaxşı nəticələr olacağına ümid edirəm”.

Ərdoğan Ermənistanla aparılan danışıqlardan da bəhs edib: "Ermənistan xüsusi nümayəndələrin təyin edilməsi ilə başlayan prosesi davam etdirməkdə qətiyyətli olarsa, biz sərhədləri qapalı saxlamarıq. Almaniya Prezident Frank-Valter Ştaynmayerlə Seneqalda keçirdiyi görüşdə də bu mövzu gündəmdə olub. Bilirsiniz, mən onsuz da Ermənistanın atacağı müsbət addımlara eyni şəkildə qarşılıq verəcəyimizi söyləmişdim. Bu bölgənin sülh, sabitlik və rifaha ehtiyacı var. Bu anlayışla ölkəmiz ilə Ermənistan arasında da normallaşma prosesi başlatmaq üçün səmimi cəhdlər edirik.

Azərbaycan Prezidenti İlham Əliyev qardaşım da bunu faydalı hesab edir. Ermənistanın bizimlə normallaşma prosesində nümayiş etdiyi iradədən məmnunuq. Bu prosesi davam etmək üçün qarşılıqlı olaraq xüsusi nümayəndələr təyin etdik və yanvarın 14-də Moskvada ilk görüş keçirildi. Fevralın 24-də də Vyanada görüşəcəklər. Ermənistanın sərhədlərin açılması və diplomatik münasibətlərin qurulması məsələsində konkret gözləntiləri olduğunu bilirik.

Bəşəri münasibətlərin güclənməsi üçün aramızdakı birbaşa uçuşların yenidən başlaması qərarını verdik. Ermənistandan da müsbət yanaşmanın davamını gözləyirik. 3+3 platforması təklifini irəli sürməkdə məqsədimiz həm də Türkiyə-Ermənistan arasındakı bu problemləri aradan qaldırmaqdır. Biz bu platformanı yaratmaqdan yanayıq. Təbii ki, bütün bunlar boşluqda olmur. Bu mənada Azərbaycan-Ermənistan münasibətləri ilə Türkiyə-Ermənistan normallaşma prosesi bir-birini dəstəkləyərək inkişaf edə bilər. Çünki regional əməkdaşlıq bu ikitərəfli prosesləri dəstəkləyəcək və bu ikitərəfli proseslərdən faydalanacaq”.

Ana səhifəyə dön