Generalların Bakı görüşü Azərbaycanın geosiyasi üstünlüyünə işarədir

Sentyabrın 7-də Rusiya Silahlı Qüvvələrinin Baş Qərargah rəisi Valeri Gerasimov və NATO Hərbi Komitəsinin rəhbəri Petr Pavel arasında Bakıda görüş keçirilib.

Görüşü şərh edən siyasi icmalçı Nəsimi Məmmədli Reyting.az-a deyib ki, bu gürüşün Bakıda keçirilməsi Azərbaycanın geosiyasi üstünlüyünə və əhəmiyyətinə işarədir.

Onun sözlərinə görə, qlobal münasibətlərin indiki ziddiyyətli dönəmində super güclərin ölkəmizə xoşməramlı münasibəti müsbət haldır:

”Ancaq bu amildən diplomatik gedişlərdə üstünlük kimi istifadə etmək üçün daxili siyasətdə ciddi dəyişikliklər olmalıdır. Təəssüf ki, iqtidar bu istiqamətdə əməli addımlar atmır”.

N.Məmmədli bildirib ki, görüşün Qarabağla bağlı sülh danışıqlarına və münaqişənin həll prosesinə hər hansı müsbət təsiri gözlənilmir. Çünki Qarabağ problemi ilə bağlı müzakirələr heç vaxt NATO çərçivəsində aparılmayıb. Belə müzakirələr NATO-nun məqsəd və məramlarına uyğun deyil.

Münaqişənin hansı həll variantının səmərəli olmasına gəlincə, müsahibimiz deyib ki, Dağlıq Qarabağ münaqişəsinin həlli üçün tərəfləri tam qane edəcək variant yoxdur:

«ATƏT-in Minsk qrupu atəşkəs dövründə tərəfləri razı salacaq plan ortaya qoya bilməyib və bundan sonra da çətin ki qoya bilsinlər. İstər beynəlxalq hüquq, istəsə də Azərbaycanın maraqları baxımından mərhələli həll variantı daha məqbuldur. Azərbaycanın işğal edilmiş əraziləri azad edilməli, köçkünlər öz evlərinə qayıtmalı, təhlükəsizlik təmin edildikdən sonra orada yaşayan ermənilərin statusundan danışmaq olar.

İndiki beynəlxalq siyasət daha çevik və fərqli siyasət yürütməyi tələb edir. Təəssüf ki, Azərbaycan hökuməti çox ləng və sistemsiz siyasət yürüdür. Hərbi hazırlıq istiqamətində görülən işlərlə yanaşı, konseptual siyasi gedişlər də yeni dövrün şərtlərinə uyğunlaşdırılmalıdır. Problemin həllini inhisarında saxlamaq siyasətindən imtina edilməlidir. Cəmiyyət problemin həllində fəal iştirak etməlidir. Xüsusilə də köçkün düşmüş qarabağlıların həll prosesində ictimai iştirakından diplomatik gedişlərdə yararlanmaq lazımdır. Əks halda problemin həllində üstünlük əldə edə bilməyəcəyik. Hakimiyyətin beynəlxalq imicinin getdikcə korlanması isə ölkəmizə üstün diplomatiya imkanı vermir».

Qeyd edək ki, Milli Məclisin Beynəlxalq münasibətlər və parlamentlərarası əlaqələr komitəsinin üzvü, politoloq Rasim Musabəyov da məsələyə münasibət bildirərkən deyib ki, belə bir görüşə Azərbaycan artıq ikinci dəfədir ev sahibliyi edir:

“Bu görüş Türkiyə və Azərbaycanda baş tuta bilərdi. Ona görə ki, Rusiya Gürcüstana nümayəndə göndərəsi deyil, NATO-da Ermənistana. Ona görə də bu görüşün keçirilməsi üçün ən əlverişli yer Bakı idi. Həm təhlükəsizlik, həm də kommunikasiyaların olması baxımından. Bu görüşün keçirilməsi ilə diqqətlər Bakıya yönəldi. Azərbaycanın beynəlxalq meydan kimi əhəmiyyəti atır”.

R.Musabəyov qeyd edib ki, görüşdə Avropa və Yaxın Şərqdə beynəlxalq təhlükəsizlik məsələləri müzakirə olunub: “Həmçinin, onlar ölkə başçısı və Azərbaycanın hərbi rəhbərlikləri ilə görüşdə Dağlıq Qarabağla bağlı məsələləri müzakirə ediblər. Onlar Azərbaycanı maraqlandıran məsələlərə diqqətlərini cəlb ediblər”.

Reyting.az

Ana səhifəyə dön