Milli Strateji Düşüncə Mərkəzinin rəhbəri İsa Qəmbər və Müsavat Partiyasının başqanı Arif Hacılı bu gün Baş prokurorluğun Ağır Cinayətlərə dair işlər üzrə İstintaq İdarəsində ifadə veriblər.

İsa Qəmbər dindirilməsi ilə bağlı jurnalistlərə deyib ki, əgər, prokurorluqda dedikləri kimi, saxta sənədləri hazırlayanları ifşa edəcəklərsə, çox gözəl: "Amma bəzi sualların qoyuluşundan, bəzi yanaşmalardan hiss olunur ki, məsələnin mahiyyətini qoyub Müsavat Partiyasına müəyyən təzyiqlər etmək istəyirlər. Görünür, hakimiyyət Müsavat Partiyasının ölkədə və dünyada fəallaşmasından narahat olub».

İ.Qəmbər bildirib ki, hər şeyi zaman göstərəcək: «Suallar elədir ki, onun ardınca saxta sənədləri verənlərin ifşası da mümkündür, Müsavata təzyiqlər də. Hansı olacaq, bunu zaman göstərəcək».

İ.Qəmbərin dediyinə görə, dindirilmə protokolunda tərcümeyi-halına aid qeyd edilib ki, o, 1988-ci ildən siyasətlə məşğuldur: «Mən müstəntiqə də dedim. 88-ci ildən ifadə verirəm. Yəni, heç bir problemi yoxdur».

Xatırladaq ki, fevralın 25-də isə Müsavat Partiyası Mərkəzi İcra Aparatının rəhbəri Gülağa Aslanlı da prokurorluqda ifadə verib.

G.Aslanlının sözlərinə görə, prokurorluq iddia edir ki, kimlərsə saxta sənədlərlə mühacir statusu alır və buna görə Müsavat Partiyasını da təqsirləndirmək istəyirlər.