NATO-nun iclasında Ermənistanın regiona yaratdığı təhlükədən danışılıb

Sentyabrın 16-da NATO Parlament Assambleyasının (PA) İqtisadiyyat və təhlükəsizlik Komitəsinin videokonfrans formatında iclası keçirilib.

Milli Məclisin məlumatına görə, iclasda parlamentin NATO PA-dakı nümayəndə heyətinin üzvü Məlahət İbrahimqızı iştirak edib.

NATO PA-ya üzv və assosiativ ölkə nümayəndələrinin də qatıldığı iclasın gündəliyinə “Körfəz böhranı və qlobal enerji bazarları”, “Qara dəniz regionu: iqtisadi və geosiyasi gərginliklər” barədə hesabat layihələri və təşkilati məsələlər daxil edilib.

Tədbirdə çıxış edən üzv ölkələrin nümayəndələri müzakirə olunan məsələlərə münasibətlərini bildirib, qeyd və təkliflərini veriblər.

İkinci hesabat layihəsinin müzakirəsi zamanı çıxış edən Milli Məclisin deputatı Məlahət İbrahimqızı bildirib ki, Azərbaycan Avropanın enerji təhlükəsizliyinə öz müsbət töhfələrini verməkdə davam edir: “Lakin bu yaxınlarda Azərbaycan-Ermənistan sərhəddindəki hərbi təxribatlar bir daha regionun barıt çəlləyi olduğunu nümayiş etdirdi. Xüsusilə vurğulamaq istərdim ki, Tovuz ətrafında baş vermiş hərbi təxribat enerji xətlərimizdən cəmi 15 km məsafədə idi”.

M. İbrahimqızı diqqətə çatdırıb ki, bütün dünyanın COVID-19 ilə mübarizə apardığı bir dönəmdə Ermənistanın belə bir təxribata əl atması daha da üzücüdür:

“Ermənistanın baş naziri Nikol Paşinyanın arvadı Anna Akopyanın Azərbaycanın işğal altındakı torpaqlarına gələrək qadınlar ilə hərbi təlimlərə qatılması mövcud qığılcımı daha da alovlandırır.

Mən buradan NATO PA-ya səslənərək belə addımların qarşısının alınması üçün ciddi tədbirlərin görülməsini təklif edirəm. Bu, Qara dəniz regionunun enerji təhlükəsizliyinin təmin olunması üçün çox vacibdir.

Verilmiş imkanlardan istifadə edərək, qardaş Türkiyədən olan həmkarlarımı Qara dənizin dibində aşkar etdikləri zəngin qaz ehtiyatlarına görə təbrik edirəm. Ümidvarıq ki, aşkar olunmuş qaz yataqları gələcəkdə Avropanın enerji təhlükəsizliyinin təminatına öz müsbət töhfəsini verəcəkdir”.

Milli Məclis üzvü Türkiyə ilə Yunanıstan arasında son vaxtlar artan gərginlikdən də danışıb:

“Azərbaycanın rəsmi mövqeyi cənab İlham Əliyev tərəfindən aydın şəkildə bəyan olunub. İnanırıq ki, Aralıq dənizinin Şərq hissəsində Türkiyənin beynəlxalq hüququn prinsipləri çərçivəsindəki fəaliyyəti bütövlükdə bu bölgədə sülhə və inkişafa xidmət edəcəkdir.

Bildirmək istərdim ki, Azərbaycan cəmiyyəti NATO-nun Türkiyə-Yunanıstan arasında artan gərginliyin azaldılmasındakı rolunu və səylərini çox yüksək qiymətləndirir. Çünki hər iki ölkə NATO-nun üzvüdür. Buradan NATO PA-nın bu məsələ ilə bağlı daha aktiv olmasını təklif edirəm”.

M. İbrahimqızının çıxışına münasibət bildirən komitənin latviyalı sədri İvan Klementyev çıxışa görə təşəkkür edib. Diqqətə çatdırıb ki, o, iki il öncə Azərbaycanda olmuş və ölkənin enerji məsələləri ilə yaxından tanışdır. Komitə sədri Avropanın enerji təhlükəsizliyinin təminatına Azərbaycanın verdiyi töhfəni yüksək qiymətləndirdiyini bildirib.

Reyting.az

Ana səhifəyə dön