İş adamı Fizuli Məmmədov ittihamlarla razılaşmır

"Azərbaycandan və dünyanın müxtəlif bölgələrindən yüzlərlə mesaj alıram. Məni sevən, hörmət edən dostlar, tanışlar, diaspor təmsilçiləri Azərbaycan KİV-lərində “Ramiz Mehdiyev və Əli Həsənovun Qurban Məmmədova bəxş etdiyi mülklər” başlıqlı məqalədə “Alkaponi” isminin hallanmasının mənimlə nə qədər əlaqəsi olduğunu və belə bir çirkabın içərisində olub-olmadığımı öyrənmək istəyirlər”.

Reyting.az xəbər verir ki, bunu Rusiya Azərbaycanlıları İttifaqı və Dünya Azərbaycanlıları Mədəniyyət Fondunun prezidenti, iş adamı Fizuli Məmmədov (Frenk Elkaponi) deyib.

Həmin məqalədə iddia olunur ki, Azərbaycan Prezidentinin sabiq köməkçisi Əli Həsənovla Bakının Nərimanov rayonunun icra başçısı Abdin Fərzəliyev dəfələrlə Rusiyaya - Moskvaya və Həştərxana gizli səfərlər ediblər və orada məxfi danışıqlar aparıblar. Onlar Rusiyanın müvafiq orqanları ilə sövdələşmə nəticəsində kriminal keçmişi olan və “Elkapone” kimi tanınan şəxsin Azərbaycanlıların diaspor təşkilatının rəhbəri təyin edilməsini razılaşdırıblar.

Fizuli Məmmədov qətiyyətlə bildirir ki, həyatı boyu nə Prezident Administrasiyasının sabiq rəhbəri Ramiz Mehdiyevlə, nə də Abdin Fərzəliyevlə (ismini ilk dəfə duyur-F.M.) heç bir görüşü olmayıb: “Əli Həsənovla bağlı məsələyə gəldikdə, onunla cəmi iki dəfə Avropa Azərbaycanlıları Konqresinin toplantısında (Amsterdam, Brussel şəhərində) Azərbaycandan toplantıya gələn qonaqlarla birlikdə olduğu üçün digər diaspor nümayəndələri ilə qısa salam və sağolumuz olub. Bundan sonra Bakıda olduğum müddətdə cəmi bir dəfə Əli Həsənovun istəyi ilə görüşümüz olub. Görüşün məqsədi ölkə Prezidenti cənab İlham Əliyevin mənə olan yüksək hörmətini, mənimlə yaxın dost olduğunu, mənə güvəndiyini və diaspor fəliyyətimizə yüksək qiymət verdiyini çatdırmaq olub".

F. Məmmədov bildirib ki, 80-ci illərin axırlarından başlayaraq 30 ildən artıqdır diaspor fəaliyyətində yaxından iştirak edir:

"İş adamı kimi qazancımın müəyyən hissəsini Rusiya və Azərbaycan başda olmaqla bütün dünyada yaşayan soydaşlarımın kiçik problemlərinin həllinə ayırıram. Azərbaycanda rüşvətə, korrupsiyaya bulaşmış, uzun illər dövlətimizə xəyanət etmiş şəxslərlə adımın bir yerdə hallanması əsla yolverilməzdir. Mənim isə dövlətim və xalqım üçün xidmətlərimin ən böyük şahidi öncə hörmətli Prezidentimiz cənab İlham Əliyevdir. Mən xalqıma, dövlətimə bağlı bir vətənpərvər şəxs kimi Azərbaycanı bütün varlığımla sevirəm. Uzun illər yarımçıq və cahil zehniyyətə malik ünsürlər tərəfindən dostluğumuzu pozmaq cəhdləri olsa da, şükür Allaha ki, dostluğumuzu qoruyub saxladıq. Cənab İlham Əliyevi özümə ən yaxın dost bilirəm".

F. Məmmədov qeyd edib ki, son illər ölkəmizdə aparılan ardıcıl islahatlar xaricdə yaşayan, qəlbi Vətən üçün döyünən azərbaycanlı kimi onu da sevindirir:

"Kimliyindən asılı olmayaraq, Vətənini sevən hər bir şəxs ölkəmizdə aparılan islahatlara dəstək verməlidir. Uzun illər dövlət qurumlarında yüksək vəzifələri ələ keçirərək, xalqımızı əzən, dövlətimizin inkişafını əngəlləyən, onun imicinə xələl gətirən korrupsioner məmurlar ədalət məhkəməsi qarşısına çıxarılmalı və layiqli cəzalarını almalıdırlar. Doğrudur, hazırda onların müəyyən bir qismi cəzalandırılsa da, təəssüf ki, bu gün də dövlət qurumlarında Azərbaycanın inkişafına mane olan, onun beynəlxalq imicinə böyük zərbələr vuran antimilli ünsürlər təmsil olunurlar. Bilməliyik ki, Azərbaycan adlı Vətənimiz naminə bir yumuruq kimi birləşməsək, xalqımızla və Prezidentimizlə birlikdə olmasaq, bizi xoş günlər gözləmir. Uca Allah bu yolda xalqımızın və dövlətimizin yardımçısı olsun!".

Ana səhifəyə dön