Erməni nazir İsraildən tələb edir: “Azərbaycana silah satışı dayandırılmalıdır”

“Azərbaycana satılan İsrail silahları Ermənistanın mülki infrastrukturunu hədəfə almaq üçün istifadə olunur və ölkələr arasında silah satışları dərhal dayandırılmalıdır”.

Reyting.az “The Jerusalem Post”-a istinadla xəbər verir ki, bunu Ermənistanın Xarici işlər naziri Zoxrab Mnatsakanyan bildirib.

O, Ermənistan prezidentinin yanvarda İsrailə səfər etdiyini xatırladaraq, son illərdə İsrail-Ermənistan münasibətlərinin yaxşılaşdığı bir vaxtda İsrailin Azərbaycana qabaqcıl silahlarını davamlı olaraq verməsini problem hesab edib.

“Jerusalem Post” yazır: “Azərbaycan İsrailin yaxın müttəfiqidir, İsrailin neft ehtiyacının 40% -ni təmin edir və pilotsuz uçuş aparatları, raketlər və digər inkişaf etmiş silah sistemləri satın alan İsrail müdafiə şirkətlərinin çeşidinin uzunmüddətli müştərisidir. 2016-cı ildə Azərbaycan Prezidenti İlham Əliyev ölkəsinin İsraildən silah və təhlükəsizlik texnikası alması üçün illər ərzində 5 milyard dollar dəyərində uzunmüddətli müqavilələr bağladığını bildirib”.

Mnatsakanyan İsrail nəşrinə müsahibəsində deyib: "Azərbaycana silah ticarəti ölümcüldür, çünki Azərbaycan bu silahları mülki infrastrukturlara və mülki əhaliyə qarşı istifadə etməkdən çəkinmir. Biz bu məsələni ardıcıl surətdə aparacağıq: həm ikitərəfli, həm də çoxtərəfli platformalarda gündəliyimizin ayrılmaz hissəsi olacaqdır. İsrail Azərbaycanla bu ölümcül işi dayandırmalıdır”.

Qonşu ölkələr və keçmiş sovet respublikaları olan Azərbaycan və Ermənistan uzun müddətdir əsasən də Dağlıq Qarabağa görə münaqişə vəziyətindədir. Ermənistanda hərbi bazası olan Rusiya tərəfləri atəşi dayandırmağa və təmkinli olmağa çağırdı. Son döyüşlər Ermənistanın şimal-şərqindəki Tavuş bölgəsi və Azərbaycanın Tovuz rayonunda baş verib. Hər iki tərəfdən itki var.

Mnatsakanyanın sözlərinə görə, son vaxtlar baş verən zorakılıq "boşluqda baş verməyib". O, Bazar ertəsi günü Ermənistan əsgərlərindən birinin Ermənistan-Azərbaycan sərhədinin şimal-şərq hissəsində azərbaycanlı snayper atəşi ilə öldürüldüyünü bildirib. "Gərginlik ərəfəsində, Azərbaycan - ən yüksək siyasi-hərbi rəhbərlik səviyyəsində - ardıcıl olaraq müharibə təhdidlərini və Ermənistana qarşı ərazi və tarixi iddialarını səsləndirib, eyni zamanda, beynəlxalq vasitəçilərin işindən ATƏT-in Minsk Qrupu həmsədrlərindən narazılıq bildirib".

Ermənistanlı nazir son döyüşləri rəsmi Bakının Dağlıq Qarabağ münaqişəsini guya "yalnız öz şərtləri ilə" həll etmək üçün ikinci cəhdi adlandırıb, guya "Azərbaycanın göstərdiyi güc nümayişi və onun hərbi üstünlüyü kəskin şəkildə uğursuz olub".

Erməni ordusunun İsrail istehsalı olan bir sıra pilotsuz təyyarələri uğurla endirməsi barədə məlumatlara gəlincə, Xarici işlər naziri bu silahların haradan gəldiyindən asılı olmayaraq, Azərbaycana qarşı hərəkət etdiyini bildirib.

İsrailin qondarma erməni soyqırımını tanımaqdan qəti şəkildə imtina etməsinə toxunan Mnatsakanyan deyib: “Erməni soyqırımını Holokost dəhşətindən sağ çıxan bir xalqın tanıması mənəvi məsələdir. Bilirəm ki, bir çox yəhudilər - ictimai şəxsiyyətlər, ziyalılar və sadə insanlar - bu fikiri qətiyyətlə bölüşürlər. Ancaq İsrailin soyqırımını tanımaq və ya tanımaqdan çəkinməsi İsrailin səlahiyyətlərinə aiddir. Bu, təkcə Ermənistana deyil, İsrailə də aiddir”.

Ana səhifəyə dön