Deputat: “Elmar Məmmədyarovu işdən çıxarmaqla kifayətlənmək olmaz”

“Azərbaycan vətəndaşları olaraq, ölkə prezidentinin dünən müşavirədə söylədiyi bütün fikirlərlə həmrəyik və onu dəstəkləyirik”.

Bunu APA-ya açıqlamasında Azərbaycan Prezidenti İlham Əliyevin Nazirlər Kabinetinin 2020-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında çıxışına münasibət bildirən deputat Fəzail Ağamalı deyib. O bildirib ki, Prezident İlham Əliyevin də dediyi kimi, iyul ayının 12-dən Ermənistanın Azərbaycana qarşı təcavüzünün ölkəmizin Silahlı Qüvvələri tərəfindən yüksək peşəkarlıqla qarşısı alınıb: “Azərbaycan Ordusu, igid əsgər və zabitlərimiz Ermənistana çox ağır, sarsıdıcı zərbələr endirdi. Ermənistan belə güman edirdi ki, bu qəfil və xain hücumla Azərbaycanın mövqelərini dağıdacaq, Azərbaycanın ərazisinə doğru irəliləyəcək. Digər tərəfdən isə Rusiyanı və müttəfiq olduğu KTMT-nin digər üzvlərini bu münaqişəyə cəlb edə biləcək. Lakin bunların heç biri olmadı. Ölkə Prezidentinin rəhbərliyi ilə Azərbaycan Ordusunun həyata keçirdiyi tədbirlərlə düşmənə layiqli cavab verildi, dövlət başçısı bundan sonra da Ermənistana qətiyyətli cavab veriləcəyini bir daha diqqətə çatdırdı”.

F. Ağamalı vurğulayıb ki, ölkə Prezidenti Ermənistanın təcavüzünə son qoymaq və torpaqlarımızı işğaldan azad etməyə xidmət edən digər məqamlarla bağlı da fikirlərini bildirdi: “Azərbaycanın haqq işinin, ədalətli mövqeyinin və beynəlxalq hüquqa söykənən çağırışlarının dünya miqyasında reallaşması və beynəlxalq aləmdə Ermənistanın daha ciddi şəkildə ittiham olunması və təcavüzkar siyasətinin ifşa edilməsi baxımından diplomatik mübarizə ciddi önəm kəsb edir. Ölkə prezidentinin fəaliyyətinin bütün tərəflərində hücum diplomatiyası birmənalı şəkildə özünü göstərir. Lakin XİN-in fəaliyyətində hücum diplomatiyasının təzahürlərini görə bilmirik. Xüsusi olaraq, Xarici İşlər naziri Elmar Məmmədyarovun uzun illərdən bəri fəaliyyətində ciddi nöqsanlara yol verməsi və hücum diplomatiyasında yer almaması, ölkə başçısının da qeyd etdiyi kimi kiminsə, xoşuna gəlmək üçün hətta düşmənə jestlər etməsi, Azərbaycanın milli maraqlarına uyğun addımlar atmaması çox böyük təəssüf doğurur. Təsadüfi deyil ki, ölkə başçısı bu məqamın üzərində xüsusi olaraq dayandı. Ən bağışlanmaz məqam bundan ibarətdir ki, ölkədə müharibə gedən vaxt Xarici İşlər nazirini tapmaq mümkün olmayıb. Prezidentin tapşırığı ilə Baş Nazir onu axtaranda isə məlum olur ki, o, evindən işləyir. Onun evində hansı ciddi kommunikasiyalar var ki, XİN rəhbəri belə həssas məqamda işə gəlməyə ehtiyac görməyib. Hər halda onun rəhbərlik etdiyi nazirlikdən işləri idarə etməsi daha rahat olar, nəinki evindən?! Bu, əslində məsuliyyətsizlik deyil. Onu təkcə işdən çıxarmaqla kifayətlənmək olmaz. Elmar Məmmədyarov Azərbaycan qanunları qarşısında cavab verməlidir. Bu baxımdan ölkə prezidentinin bu çağırışları Azərbaycan xalqının dövlət maraqlarına tamamilə xidmət edir”.

Deputat qeyd edib ki, Türkiyə və Pakistan rəsmilərinə Prezident İlham Əliyevin təşəkkürü bütövlükdə Azərbaycan xalqının düşüncələrinin ifadəsi idi: “Digər tərəfdən, Ermənistanın üzv olduğu KTMT də bu məsələdə fərqli münasibətini ortaya qoydu və rəsmi İrəvan burada da uzun müddətdən bəri nəzərdə tutduğu, hazırladığı məkrli planı həyata keçirə bilmədi. Ölkə başçısı dünənki çıxışında həm də xalqımızın ordu ilə bərabər olduğunu konkret faktlarla göstərdi. İyulun 14-də çoxsaylı vətənpərvər gəncimizin Azadlıq meydanından keçərək Şəhidlər Xiyabanına yürüş etməsi və bu yürüşdə Ordumuza dəstək şüarları səsləndirməsi də ölkə başçısı tərəfindən yüksək qiymətləndirildi. Eyni zamanda vətəndaşların bu nəcib təşəbbüsünün içərisinə soxulan antimilli qüvvələrin yaratmış olduğu xoşagəlməz vəziyyət də prezident tərəfindən ciddi şəkildə tənqid olundu. Bunun qarşısını almaq üçün ölkə başçısı müvafiq tapşırıqlarını da verib. Bu gün görünən odur ki, prezidentin də dediyi kimi, Azərbaycanda hələ də “5-ci kolon”un nümayəndələri aktivdir, onlara verilən tapşırıqları yerinə yetirməkdədir. Biz cəmiyyət olaraq, onlara qarşı daha ardıcıl, daha güclü mübarizə aparmalıyıq”.

Deputat ölkə prezidentinin iqtisadiyyatımızın ayrı-ayrı sahələri ilə bağlı səsləndirdiyi fikirlərin də mühüm əhəmiyyət kəsb etdiyini də bildirib: “Su ilə bağlı son aylarda ortaya çıxan çətinliklərin aradan qaldırılması üçün xüsusi proqramın işlənib hazırlanmasının zəruriliyi ilə bağlı tapşırıqlar müvafiq qurumların diqqətinə çatdırdı. Bir sözlə, ölkə Prezidentinin dünən Nazirlər Kabinetində keçirmiş olduğu müşavirə olduqca qətiyyətli iradənin ifadəsi idi”.

Ana səhifəyə dön