Məhdudlaşdırıcı tədbirlərdən sui-istifadə olunur

“Koronavirusun geniş yayılmasının qarşısını almaq məqsədilə dövlət səviyyəsində tətbiq edilən məcburi məhdudlaşdırıcı tədbirlər, təəssüf ki, bəzi insanlar, xüsusilə də özünü millətsevər kimi təqdim etmək istəyən üzdəniraq "siyasətçilər" tərəfindən birmənalı qarşılanmır. Həm xaricdə, həm də ölkəmizdə bəziləri belə tədbirləri insan haqlarının pozulması, demokratiyaya zidd hərəkətlər kimi qələmə verməyə çalışırlar”.

Reyting.az xəbər verir ki, bunu Azərbaycan Təkamül Partiyasının sədri, iqtisadçı-alim Teyyub Qənioğlu deyib.

Onun sözlərinə görə, pandemiya ilə bağlı məhdudlaşdırıcı tədbirlər ölkə iqtisadiyyatına mənfi təsir göstərir. Məhdudlaşdırıcı tədbirlər xüsusilə daimi işi olmayanlara, gündəlik çörəkpulu qazananlara daha çox ziyan vurur və bu da, öz növbəsində, psixoloji gərginliyə, narazılığa səbəb olur.

Partiya sədri bildirib ki, bəzi dairələr yaranmış gərgin vəziyyətdən az itkilərlə çıxmağa yardım etmək, heç olmasa, insanlarımıza təsəlli vermək, onları çətinliyin keçici olduğuna inandırmaq əvəzinə, fürsətdən yararlanıb ölkədəki mövcud problemləri qabardır və bu problemlərin həllinə istiqamətlənmiş tədbirləri aşağılamaqla, vətəndaş qarşıdurmasına rəvac verə biləcək hərəkətlər edirlər: “Dəfələrlə qeyd etmişik ki, heç kəs Azərbaycanda hər şeyin qaydasında olduğunu deməyib və demir. Təəssüf ki, ölkəmizdə korrupsiya, rüşvətxorluq, məmur özbaşınalığı, qanun pozuntuları, dərəbəylik geniş yayılıb. Və bu o həddə çatıb ki, artıq iqtidar da bunun fərqindədir və belə hallara qarşı mübarizəyə start verilib. Bəzilərinə qeyd edilən mənfi təzahürlərin aradan qaldırılması asan gələ bilər. Belələri unudur ki, aşağıdan yuxarı, demək olar ki, bütün dövlət idarə və müəssisələrində, orqanlarında təmsil olunanların mütləq əksəriyyətinin qohumluq əlaqələri var və onlar daim bir-birini himayə edirlər. Ona görə də, bu cür mənfi halların aradan qaldırılmasının, ölkəmizdə qanunların hamı üçün eyni olan aliliyinin təmin edilməsinin, azad, ədalətli, demokratik cəmiyyətin qurulmasının zamana və ardıcıl mübarizəyə ehtiyacı var. Və əsas məsələ bu mübarizənin mahiyyətində, onun necə qəbul edilib tətbiq olunmasındadır”.

T. Qənioğlu qeyd edib ki, bəziləri bu mübarizədə daha çox xarici dəstəyə, xüsusilə Qərbə bel bağlayır: “Amma unudurlar ki, məhz Qərbin dəstəyinin nəticəsidir ki, torpaqlarımız uzun müddətdədir işğaldadır. Məhz onlar deyirlər ki, torpaqlarımızın işğaldan azadlığının hərbi yolu yoxdur və bununla Azərbaycana hədə-qorxu gəlib, Ermənistanı işğalı davam etdirməyə sövq edirlər. Məgər Qərb, xüsusilə də AŞPA, Azərbaycanda demokratiyanın inkişafında, insan hüquqlarının qorunmasında maraqlıdır? Əgər AŞPA doğrudan da Azərbaycanda insan haqlarının qorunmasında maraqlıdırsa, niyə işğal nəticəsində yurd-yuvasından didərgin düşən, sayı milyonu ötən vətəndaşlarımızın hüquqlarının qorunması, işğala son qoyulması üçün Ermənistana sanksiyalar tətbiqi istiqamətində real addımlar atmır?”.

Partiya sədri bildirib ki, Azərbaycanda məhkəmələrin bir çox hallarda qanunsuz qərarlar çıxardığı hər kəsə məlumdur və buna görə də məhkəmə-hüquq sistemində də real islahatların aparılmasına, qanunun aliliyinin təmin edilməsinə ehtiyac var: “Ancaq hesab edirik ki, bunlar xaricdən təzyiqlə həll ediləcək məsələlər deyil və zamana ehtiyacı var. Məhz buna görə də, Təkamül Partiyası siyasi mübarizədə təkamül yolunun qəti tərəfdarıdır. Təkamülçülük - qanunlar çərçivəsində ardıcıl, dönməz mübarizəni özündə ehtiva edir, hər çür qarşıdurmanı, ixtişaşları, zorakılığı, siyasi mübarizənin küçə və meydanlarda aparılmasını rədd edir, hər bir sahədə islahatların "yuxarıdan" aparılmasının daha düzgün olmasını qəbul edir! Bu yol bəzilərinə uzun, əlçatmaz görünə bilər. Ancaq bu, ölkəmizdə əmin-əmanlığın, sosial-siyasi sabitliyin qorunmasının, vətəndaş qarşıdurmasına yol verilməməsinin yeganə yoludur”.

Ana səhifəyə dön