Natiq Cəfərli: "Cəmil Həsənlinin bu qədər səviyyəsiz vəziyyətə düşəcəyini gözləmirdim"

“Ömrü boyu seçkiləri boykot edən, 25 ildir eyni ritorika ilə danışan, inqilab arzusu ilə yaşayan və hər hansı formada xaotik vəziyyətdən özünə divident qazanacağını düşünən marginal təşkilatın çıxışlarına, fikirlərinə bundan sonra fikir bildirməyi də özümüzə sığışdırmıram. Onlara qiyməti xalq çoxdan verib”.

Bunu APA-ya açıqlamasnda “Respublikaçı Alternativ” (ReAL) Partiyasının icra katibi Natiq Cəfərli dünən Milli Şuranın iclasında ReAL-a qarşı səsləndirilən fikirlərə cavab olaraq deyib.

O bildirib ki, əslində, qısa videodan da bu insanların dünya və siyasətlə bağlı təsəvvürlərinin mağara səviyyəsində olması görünür: “Onlar o qədər primitiv, fikirləri o qədər zaydır ki, siyasətlə bağlı düşüncələri kiminsə videosuna nə qədər “like” qoyulmasından ibarətdir. Bu insanların dünya görüşü budur. Buna görə də belə bir abı-hava yaratmaq üçün böyük trol ordusu saxlayırlar. 100-150 üzün hərəsinin 10-15 profili var. Hətta orada çıxış edən Gültəkin Hacıbəylinin özünün elə “Facebook”da ayrıca “fake” profili var. Ölkədə hamı bunu bilir. Onlar bu qədər bədbəxtdir və siyasət anlayışları bu qədər bəsitdir. Bu video bir daha sübut etdi ki, onların saxladığı 100-150 nəfərlik başıboş trol ordusu onların səsləndirdiyi arqumentləri dəstəkləməyə xidmət edib. Deməli, internetdə söyüş yazanlar da, “like”, “dislike” qoyanlar da mərkəzləşdirilmiş qaydada bunlar tərəfindən idarə olunur”.

N. Cəfərli qeyd edib ki, Cəmil Həsənlinin bu qədər səviyyəsiz vəziyyətə düşməsini gözləməyib: “Cəmil Həsənliyə hər zaman böyük hörmətimiz olub. Hətta onun prezidentliyə namizədliyi dövründə Erkin Qədirli işini itirmək naminə onun rəsmi vəkili olub. Bu adamın bu qədər səviyyəsiz vəziyyətə düşəcəyini açığı gözləmirdim. Ötən il də bizə qarşı hücumlar etmişdi, sonda yalan danışdığı üzə çıxdı. Biz ondan üzr istəməyi tələb etmişdik. Qabiliyyəti çatıb onu belə etmədi. İndi o alçaqcasına və axmaqcasına sözlərdən istifadə edərək, yenə də ReAL-ı aşağılamağa cəhd edir. Azərbaycanda siyasi partiyalara, siyasi liderlərə qiyməti xalq verir. Xalq seçkilərdə, yaxud seçkilərdən sonrakı proseslərdə mövqeyini ortaya qoyur. Siyasi partiyaların da əsas qayəsi xalqı seçkiyə inandırmaq və seçkiyə gətirməkdir. Milli Şuranın son videoları, verdiyi açıqlamalar onların nə qədər faşist təfəkkürlü olduqlarını, siyasətə nə qədər bəsit baxdıqlarını və trol ordularını ifşa etdi. Bununla da bu təşkilat özünü bitirdi”.

N. Cəfərli vurğulayıb ki, ümumiyyətlə, Milli Şura adlı təşkilat yoxdur: “AXCP özünə başqa bir qurum yaradıb və adını Milli Şura qoyub. Milli Şuranın sədri olan kəs özünü AXCP sədrinin müavini kimi aparırsa, onun sözündən çıxmırsa, deməli, bu təşkilat yoxdur. Bu təşkilatı yaratmaqda məqsəd AXCP-nin müxtəlif beynəlxalq görüşlərdə və yerli siyasi danışıqlarda iki təmsilçi ilə təmsil olunması idi. Milli Şüranın özünü buraxıb-buraxmamasının siyasətdə elə ciddi fərq yaradacağını düşünmürəm”.

Qeyd edək ki, Milli Şuranın videokonfrans formatında keçirilən iclasında Milli Şuranın üzvü Gültəkin Hacıyeva REAL partiyasının sədri İlqar Məmmədovun lağlağı obyektinə çevrildiyini, Müsavat Partiyasını da REAL kimi rüsvayçı aqibət gözlədiyini, Müsavatın Əli Kərimlini müdafiə etməkdən yayınaraq guya Müsavat Partiyasının və Milli Şuranın üzvü Tofiq Yaqublunu müdafiə etdiyini bəyan edərək riyakarlığa yol verdiyini bildirib. O cümlədən Müsavatı siyasi mühacir alverində günahlandırıb.

Milli Şuranın sədri Cəmil Həsənli isə İlqar Məmmədovun həm siyasətçi, həm də REAL sədri olaraq bitdiyini, REAL-dan fərqli olaraq heç nə əldə etməmiş Müsavat Partiyasının isə rüsvayçı duruma düşdüyünü vurğulayaraq, partiyanı bədbəxt adlandırıb.

Ana səhifəyə dön