Diplomat Çinə qarşı koronavirus ittihamlarına cavab verib

“İndiyə qədər Avropa və ABŞ hər mövzuda lider mövqedə idi. Onlar hər sınaqdan 80-90 alarkən Çin 60 alırdı. Koronavirus sınağından Çin 90 aldığı üçün bizim virusla mübarizəmizə inanmırlar”.

Reyting.az xəbər verir ki, bunu Çin diplomatı, hazırda Türkiyədə diplomatik xidmətdə olan Ceng Veihua deyib.

Diplomat Çində virusu ilk dəfə açıqlayan və buna görə həbs edilən, sonradan isə koronavirus səbəbindən vəfat edən doktor Li Venlianq haqqında Qərbin iddialarına da cavab verib: “Koronavirusla mübarizədə həyatını itirən doktor Li və digər tibbi personal Çin dövləti tərəfindən şəhid elan edilib. Doktor Li həbs edilməyib. Sadəcə, virusla bağlı paylaşımlarından sonra polisə dəvət edilərək sorğulanıb və xəbərdarlıq edilib. Əlbəttə, bunun özü də yanlış olub. Amma heç bir halda həkim Li həbs edilməyib. Sadəcə, Qərb bu mövzudan istifadə edir”.

Çinin avtoritar rejimə sahib olması haqqında iddialarla razılaşmayan diplomat qeyd edib ki, Qərb ölkələrinin onlara inanmadığının səbəblərini bilmir: “Kimsə bizi bizdən daha yaxşı tanıya bilməz. Qərb ölkələri Çinin nə qədər böyük fədakarlıq etdiyini bilmirlər, bu səbəbdən də Çinin açıqladığı informasiyalara inanmırlar. Məsələn, hazırda Çində 2500 nəfərdə yoluxma var. Buna bir çoxları inanmır.

Deyirik ki, Vuhanda karantin bitdi. Amma bəzi “Çin iqtisadiyyatını xilas etmək üçün bunu edir, əslində çox yoluxma var”,- deyirlər.

Niyə belə zehniyyət var? Bunu sizə anladım. Son illər Avropa və ABŞ hər mövzuda lider mövqedə idi. Onlar hər sınaqdan 80-90 alarkən Çin 60 alırdı. Koronavirus sınağından Çin 90 aldığı üçün bizim virusla mübarizəmizə inanmırlar.

Demirəm ki, Çini tam olaraq qısqanırlar. Onlar Çinin gördüyü qədər tədbirlər görmədi, buna Çin qədər əhəmiyyət vermədilər. İndi öz işləri pisə gedəndə Çini müqəssir tutmaq istəyirlər. Öz məsuliyyətlərini gizlətmək üçün Çini “təqsirkar” edirlər”.

Ceng Veihua əlavə edib ki, obyektiv olmaq lazımdır:

“Dekabrın 27-də Vuhandakı həkimin yanına gələn 3 nəfərə səbəbi bilinməyən virus xəstəsi olduğunu bildirdik. İki gün sonra Hubei əyalətində Vuhan şəhərinin Səhiyyə Komissiyası qrupları araşdırmağa başladı. 2019-cu il, dekabrın 31-də Çinin Milli Səhiyyə Komissiyasının ekspertəri Vuhana gələrək araşdırmalara başladılar. Eyni gündə Çin Ümumdünya Səhiyyə Təşkilatı ilə informasiya paylaşımlarına qərar verdi. Yanvarın 3-dən başlayaraq Çin əlindəki informasiyaları ÜST və bəzi ölkələrə təqdim etdi. Daha sonra biz virusun mahiyyətini rekord sürətlə kəşf etdik və bunu da ÜST-lə paylaşdıq. Yanvarın 23 isə 11 milyonluq şəhər olan Vuhanda karantin elan etdik.

Bəs ABŞ-dakı durum nə zaman ciddiyə alındı? Bir ay əvvələ qədər. Yəni martın əvvəlində. 23 yanvarla mart ayının əvvəli arasında ay yarım müddət var. Niyə qabaqlayıcı tədbirlər görmədilər? Çinin 11 milyonluq şəhərdə karantin rejimi elan etməsi əslində, bu işə nə dərəcədə ciddi yanaşdığının göstəricisidir”.

Diplomat bildirib ki, söhbəti gedən virus dünyada yenidir, Çin vurusla bağlı əlində olan informasiyaları dünya ilə paylaşıb, ancaq bu informasiyalar yetərli deyil.

“Çin koronavirusla müharibədə qalib gəlibmi” sualına cavabında diplomat deyib ki, sözsüz ki, indi “Çin qələbə qazandı”,- deyə bilmirik: “Çünki bütün dünya ilə birlikdəyik. Bu virus dünyada bitmədisə, “Çində bitdi”,- deyə bilmərik. Çünki eyni gəminin sərnişinləriyik, bir talehi bölüşürük.

Bu, yeni virusdur və onun haqqında yetərincə informasiya yoxdur. Bu epidemiyanın nə qədər sürəcəyini kimsə bilmir. Eyni zamanda dünyada virusa bulaşma sayının çoxalmasına görə də üzülürük. Virus insanlığın ortaq düşmənidir və bu virus üzərində birlikdə qələbə qazanmağımız lazımdır”.

Reyting.az

Ana səhifəyə dön