Milli Şuranın rəhbərliyi ilə iqtidar təmsilçilərinin gizli əlaqələri üzə çıxır

Milli Şura ilə iqtidar daxilindəki hansısa qüvvələrin gizli iş birliyi mövcuddur.

Reyting.az xəbər verir ki, belə bir iddia ilə Bütöv Azərbaycan Xalq Cəbhəsi Partiyasının (BAXCP) sədri, deputat Qüdrət Həsənquliyev çıxış edib.

Qüdrət Həsənquliyev belə bir işbirliyinin artıq mövcud olduğunu təsdiqləyib: “Bu gün Azərbaycanda klassik mənada iqtidar-müxalifət münasibətləri mövcud deyil. Hər iki düşərgədə islahatları dəstəkləyənlər və ona qarşı bütün gücü ilə müqavimət göstərmək istəyənlər var. Bəzi hadisələri bildiyimdən deyirəm ki, son illər xaricə qaçıb, hazırda özlərini çox ədəbsiz aparan insanların bəzilərinə onların, ailə üzvülərinin xahişi ilə, insanlara ikinci bir şans verilməsinin tərəfdarı kimi kömək etmişəm. Onların bəziləri nələrinsə qarşılığında nəinki radikallıqdan imtina etməyə, hətta Prezidentin iti olmağa razı idilər. Amma onlar sonradan iqtidar daxilindəki bəzi əxlaqsız mafiozlar tərəfindən ələ alınaraq məsədyönlü şəkildə narazı salındılar, Prezidentə təzyiq edib, islahatları dayandırmaq məqsədilə onu, ailə üzvülərini və islahatları müdafiə edən şəxsləri söydürmək üçün xaricə göndərildilər. İndi həmin adamlar hərdən mənə də hürməklə keçmişlərini unutdura biləcəklərini düşünürlər. Amma onlara sifariş verən namussuzlar anlamırlar ki, üzdə Prezidentin ayağını öpüb arxada belə şərəfsiz işlərlə məşğul olmağın axırı yoxdur, gec-tez ifşa olunaraq layiqli cəzalarını alacaqlar”.

Milli Şuranın rəhbərliyi ilə iqtidar təmsilçilərinin gizli əlaqələri üzə çıxır

Q. Həsənquliyev

BAXCP sədri partiyanın mətbuat xidmətinə müsahibəsində bildirib ki, Milli Şura 19 oktyabrda razılaşdırılmamış aksiyanı tapşırıqla keçirib: “Çünki orta səviyyədən aşağı siyasətçi də seçkilərə 10 aydan az qalmış bir dövrdə polislə toqquşmaya getməzdi. Aranı qarışdırmaq istəyən daxili və xarici qüvvələr Milli Şuranın “liderindən” istifadə etmək istədi, amma iqtidar sifarişçilərdən daha qabiliyyətli olduğundan Əli Kərimlidən daha çox faydalandı. Artıq hər kəs kluarlarda danışır ki, o, saxlanılarkən sonradan təsvir etdiyi "polisin vanna otağında", seçkilərə qatılmayacağı barədə öhdəlik götürüb. Ona görə də hətta seçkiləri müşahidə də etmədi”.

Q. Həsənquliyev Milli Şuranın başında duranlara dəfələrlə etdiyi müraciətdən də söz açıb: “Onlara dəfələrlə müraciət etmişəm ki, öz gədələrinizi təhqirdən çəkindirin. Bunu etmirsinizsə, deməli, həmin təhqirlərin 10 qat artığını eşitmək istəyirsiniz. Milli Şuranın təbliğatı ilə məşğul olan, xaricə qaçmış Əli Kərimlinin şöbə müdiri, vaxtilə Əli Kərimlini təhqir etmiş, özü kimi korlanmış bir şizofrenniklə öz kanalında həvəslə başqalarını təhqir edirsə, deməli, bu ləyaqətsizlər əmin olsalar ki, Əli Kərimlini alçatmaqla Parlamentdən didərgin salan adam da bu iqtidar əleyhinə nəsə deyə bilər, onu da hər gün efirə çağırıb eyni qaydada söhbət edərlər. Həm də Əli Kərimlinin xeyir-duası ilə. Budur, bu adamların əxlaqı, mənəviyyatı”.

Q. Həsənquliyev “İqtidar siyasi mühacirlərə müraciət etsə ki, vətənə qayıdın və təqib olunmayacaqsınız. Bu halda onların geri qayıtma ehtimalı nə qədərdir”,- sualına da cavab verib.

BAXCP sədri qeyd edib ki, siyasi motivlərlə mühacirətə getdiyini bəyan edənlərin geri qayıtmasının təminatı kimi Milli Məclis Aministiya haqqında qərar qəbul edə bilər. Amma böyük pullar qarşılığında söyüş üçün mühacirətə göndərilənlər geri dönməz. Çünki başa düşürlər ki, dövlət onları bağışlasa da, çoxları ağır təhqirləri onlara bağışlamayacaq:

“Siyasi məhbusların azad olunmasına gəldikdə, biz bilirik ki, beynəlxalq insan hüquqlarını müdafiə təşkilatlarına onları maliyyələşdirən dövlətlər tərəfindən tapşırıq verildikdə bu və ya digər ölkəyə "xüsusi diqqət" göstərirlər. Biz bu acı reallığı öz siyasətimizdə və fəalyyətimizdə mütləq nəzərə alıb, şəxsiyyət əleyhinə ağır cinayətlər törətmiş səxslər istisna olmaqla, beynəlxalq insan hüquqlarını müdafiə təşkilatları tərəfindən siyasi məhbus hesab olunan şəxsləri azad etməliyik. Çünki ölkələrin insan haqları ilə bağlı beynəlxalq imicini həmin təşkilatlar öz rəyləri ilə formalaşdırır. Həm də onların çoxu təyin olunmuş cəzalarının əhəmiyyətli hissəsini çəkib və düşünüb nəticə çıxarmaları üçün də kifayət qədər vaxtları olub”.

Ana səhifəyə dön