İqbal Ağazadə ilə Rauf Arifoğlunun şikayəti araşdırılır

35 saylı Xətai üçüncü Seçki Dairəsindən deputatlığa namizəd, Ümid Partiyasının sədri İqbal Ağazadə fevralın 9-da keçirilən növbədənkənar parlament seçkilərinin nəticlərinə münasibət bildirib.

Reyting.az xəbər verir ki, İqbal Ağazadə seçki prosesində ciddi qanun pozuntularının olduğunu bəyan edib. “1 saylı məntəqə istisna olmaqla 29 məntəqənin heç birində protokollar verilmədi. Səslər sayılarkən nümayəndlərimiz tərəfindən videolentə alınıb. İstisnasız olaraq bütün məntəqələrdə böyük səs çoxluğu ilə qalib gəldik. Bununla bağlı videofaktlar var”, - deyə partiya sədri vurğulayıb.

İqbal Ağazadə qeyd edib ki, beynəlxalq müşahidəçilərin gözü qarşısında nümayəndələrinə basqılar olub. “Müşahidəçilərimiz, nümayəndlərimiz məntəqələrdən çıxarıldı. Bəzi məntəqə sədrləri qapıdan yox, pəncərədən qaçdı. Bütün bunlar ATƏT Müşahidə Missiyasının gözü qarşısında baş verdi. Bununla da ölkənin imicinə ziyan vuruldu”, - deyə o, bildirib.

İ. Ağazdə əlavə edib ki, problemin hüquqi müstəvidə həllinə çalışır: “Artıq şikayətlərimiz təqdim etmişik. Əlimizdən nə gəlirsə edəcəyik ki, məsələ hüquqi müstəvidə həll olunsun”.

35 saylı dairədə İqbal Ağazadənin əsas rəqibi “Yeni Müsavat” Media Qrupunun rəhbəri Rauf Arifoğludur. “Exit-poll”un nəticələrinə görə Rauf Arifoğlu qalib gəlib. Lakin Mərkəzi Seçki Komissiyası hələ ki, bu dairə ilə bağlı nəticələri açıqlamayıb. MSK sədri Məzahir Pənahov bildirib ki, sözügedən dairədən şikayətlər var.

35 saylı dairədən deputatlığa digər namizəd Rauf Arifoğlu isə bildirib ki, namizəd olduğu dairənin nəticələrinin açıqlanmaması şikayətlərin olması ilə bağlıdır.

R. Arifoğlu qeyd edib ki, MSK sədri M. Pənahov mətbuat konfransında bu şikayətlərə həssaslıqla baxılacağını deyib: “Bəlkə də heç bir əsası yoxdur, bəlkə də hansısa addım atılmalıdır. Bizim dairədən başqa, daha bir neçə seçki dairəsində də analoji vəziyyət haqqında məlumat yayılıb”.

R. Arifoğlu daha sonra əlavə edib ki, seçki on minlərlə insanın seçici olaraq rol aldığı, tərəflərə bölündüyü nəhəng siyasi hadisə olduğundan gərginlik, çəkişmə, mübahisə gözləniləndir.

“O cümlədən də şikayətlər. Biz də seçkinin gedişatına dair rəqibimizin qanunsuz əməlləri və saxtakarlıqları barədə şikayətlər vermişik. Lakin biz özümüzə və qələbə əldə etdiyimizə inanırıq. Seçki qərargahımızdakı məlumatlar göstərir ki, mən ən yaxın rəqibimi bir neçə min səs fərqi ilə üstələmişəm. Biz bu nəticə üçün gecə-gündüz, soyuq-qar demədən, çalışdıq! Dürüstlüyümüzə, əvvəldən sona qədər, bütün prosesi şəffaf və halal apardığımıza əminik. Buna görə də hər hansı araşdırma bizim maraqlarımıza uyğundur.

Belə bir addım qələbəmizin legitimliyini daha da möhkəmləndirəcək. Ona da əminəm ki, ən qısa zamanda hər şey aydınlaşacaq, haqq etdiyim qələbə rəsmiləşəcək, daha da legitimləşəcək və həm minlərlə narahat seçicim, həm dostlar sevinəcək”, - deyə R. Arifoğlu vurğulayıb.(Yeni Sabah)

Ana səhifəyə dön