Əli Məsimli təbliğat kampaniyasını uğurla başa vurdu

114 saylı Şəki kənd birinci seçki dairəsindən deputatlığa namizəd Əli Məsimli seçkiqabağı təşviqat dönəmində uğurlu seçki kampaniyası aparıb.

Reyting.az xəbər verir ki, Əli Məsimlinin seçki qərargahı onun namizədliyi qeydə alındığı –2019-cu il dekabrın 31-dən fəaliyyətə başlayıb.

Seçki qərargahının tərkibinə rayonda böyük nüfuza malik olan şəxslər, ağsaqqallar, elm adamları – namizədin vəkilləri - professor F. İbrahimov, dosent Q. Bəkirov və Azərbaycanın müxtəlif Elmi -Tədqiqat İnstitutu və universitetlərində doktorantura hazırlığı keçən şəxslər, gənc könüllülər və digər sosial qrupların nümayəndələri qatılıb.

Seçki qərargahı seçkiqabağı təbliğatın başlandığı yanvarın 17-dən etibarən daha intensiv və çoxşaxəli fəaliyyət göstərib. Belə ki, seçki qərargahının fəaliyyətinin qurulması zamanı qanunla qadağan olunmayan ən müasir seçki texnologiyalarından, seçkiqabağı təbliğatın bütün növlərindən istifadə edilib. Seçkiqabağı təbliğat həm virtual, yəni sosial şəbəkələr, elektron kütləvi informasiya vasitələri üzərindən, həm müxtəlif təşviqat materiallarının paylanması yolu ilə, həm seçicilərlə kütləvi görüşlərin keçirilməsi vasitəsilə, həm də qapı-qapı prinsipi ilə həyata keçirilib.

Əli Məsimlinin seçki qərargahının “Facebook” sosial şəbəkəsindəki səhifəsi təbliğata start verilən gündən aktiv şəkildə fəaliyyət göstərib. Əli Məsimlinin Şəki kəndlərdə keçirdiyi bütün görüşlərindən fotolar, videolar daim həmin səhifədə paylaşılıb. Həmçinin, Əli Məsimlinin seçki kampaniyası dövründə onun görüşləri KİV-lərdə geniş işıqlandırılıb. Seçki qərargahının könüllüləri vasitəsilə təbliğat dövrü ərzində deputatlığa namizədin nəfis şəkildə hazırlanaraq çap edilən 5 min ədəd platforması seçicilərə çatdırılıb.

Əli Məsimli təbliğat-təşviqat kampaniyası zamanı seçicilərlə daha çox görüşlər keçirə bilib və əksər görüşlər daha çox seçicinin iştirakı ilə keçib. Belə ki, təbliğat dövrü ərzində seçicilərlə 24 kütləvi görüş keçirilib. Bundan əlavə, deputatlığa namizəd təbliğat dövrü ərzində çoxsaylı ayaqüstü görüşlər də keçirib. Seçicilərlə kütləvi dörüşlərdə deputatlığa namizədin parlamentdəki fəaliyyətinin son 4 illiyini əks etdirən qısa fraqmentlərdən ibarət videoçarx nümayiş etdirilib ki, bu da seçicilərdə deputatlığa namizədin parlamentdəki fəaliyyəti barədə aydın təsəvvürlərin formalaşmasına müsbət mənada yardım göstərib. Təşviqat prosesi çərçivəsində namizədin fəaliyyətinə dair hesabat həm yazılı şəkildə seçicilərə çatdırılıb, həm də Əli Məsimli bütün görüşlərdə özü də geniş hesabat verib. Görüşlər zamanı Əli Məsimli seçicilər tərəfindən qaldırılan bütün məsələləri qeyd edib və seçiləcəyi təqdirdə qaldırılan problemlər sırasında gücü çatanları özü həll edəcəyini, imkanı xaricində olanları isə aidiyyəti orqanlara göndərib həll olunmasına səy göstərəcəyini bildirib.

Seçkiqabağı təbliğatın sonuncu günündə - fevral ayının 7-də Əli Məsimli 114 saylı Şəki kənd birinci seçki dairəsi ərazisində yerləşən müxtəlif kəndlərdə çoxsaylı ayaqüstü görüşlər keçirərək, seçkiqabağı təbliğat kampaniyasını başa çatdırıb.

Əli Məsimli təbliğat kampaniyasını uğurla başa vurdu