Əli Məsimli Şəkinin problemlərini parlamentdə qaldıracaq

Fevralın 5-də 114 saylı Şəki kənd birinci seçki dairəsindən deputatlığa namizəd Əli Məsimli növbəti görüşünü əhalinin sayına görə Şəki rayonunun ən böyük kəndi olan Kiçik Dəhnədə keçirib.

Reyting.az xəbər verir ki, görüşdə seçicilərlə yanaşı, deputatlığa namizədin vəkilləri - pedaqogika elmləri doktoru, professor F. İbrahimov, dosent Q. Bəkirov, seçki qərargahının üzvləri, könüllülər də iştirak ediblər.

Deputatlığa namizəd Əli Məsimli əvvəlcə 4 illik deputat fəaliyyəti haqqında hesabat verib. Sonra platformasında söz açıb.

Əli Məsimli bildirib ki, platforması müasir dövrün çağırışlarına, ölkədə həyata keçirilən islahatlar kursuna adekvat fəaliyyət göstərmək prinsipi üzərində qurulub:

Əli Məsimli Şəkinin problemlərini parlamentdə qaldıracaq

“Ölkəmizin sosial-iqtisadi inkişafının sürətləndirilməsi və əhalinin güzəranının yaxşılaşdırılmasının hüquqi bazasının təkmilləşdirilməsinə xidmət edən qanunların hazırlanması və qəbulunda, eləcə də hazırda qüvvədə olan qanunların, normativ-hüquqi aktların səmərəli icra mexanizmlərinin işlənib hazırlanmasında fəal iştirak edəcəyik. Bu sırada aztəminatlı ailələrdən olan tələbələrin vəziyyətini yaxşılaşdırmaqdan ötrü əlverişli şərtlərləri özündə əks etdirən “Təhsil kreditləri”, eləcə də əhali üçün əlverişli şərtləri özündə əks etdirən “İstehak kreditləri haqqında” qanun layihələrinin Milli Məclisə təqdim olunmasını həyata keçirməyi nəzərdə tutduğumuz ilkin məsələlərdəndir”.

Ə. Məsimli diqqətə çatdırıb ki, ölkəmizdə aparılan islahatların yeni mərhələsinə töhfəmizi artırmaqdan ötrü Milli Məclisdə və cəmiyyətdə ictimai fəaliyyəti daha da aktivləşdirəcək, həmişə olduğu kimi, bundan sonra da cəmiyyətin üzləşdiyi problemləri Milli Məclisdə qaldıracaq və həllinə səy göstərəcək:

“Peşəkar iqtisadçı kimi Şəkimizi yüksək professionallıq və layiqincə təmsil edəcək, parlament kürsüsündən ümummilli məsələlərlə yanaşı Şəkimizin problemlərini də səsləndirməkdə davam edəcəyik. Seçicilərin problemlərini gücümüz çatan, səlahiyyətimizin imkan verdiyi qədər həll edəcəyik, həll edə bilmədiklərimizi aidiyyatı dövlət strukturları qarşısında qaldıracaq və həllinə səy göstərəcəyik.

Apardığımız tədqiqatlar və bizə olan müraciətlərin təhlili nəticəsində Sizin kənddə mövcud olan və Sizi ən çox narahat edən problemləri müəyyənləşdirmişik. Kəndin mavi yanacaqla təmin olunmasına baxmayaraq, hələ də təqribən 150-yə yaxın evə qaz çəkilməməsi, Böyük Dəhnə kəndi ilə sərhəddə olan 2 km-ə yaxın yüksək gərginlikli xətlərin dəyişdirilməməsi, 1 saylı tam orta məktəbin, uşaq bağçasının və kənd xəstəxanasının təmiri və sair kimi problemmlərin qısa zaman kəsiyində həlli zəruridir”.

Çoxsaylı sual-cavab şəraitində keçən görüş faydalı çıxışlarla yaddaqalan olub.

Əvvəlki görüşlərdəki çıxışlarında olduğu kimi, Əli Məsimli bu dəfə də seçiciləri islahat prosesində və deməli, öz həyat şəraitlərinin yaxşılaşdırılması prosesində fəal iştirak etməyə çağırıb.

Çıxış edənlər Ə. Məsimlinin parlamentdəki fəaliyyətini, Şəki rayonunun problemlərinin həlli istiqamətində gördüyü işləri yüksək qiymətləndirməklə yanaşı, həm də kəndin problemlərinin həllinin sürətləndirilməsinə öz imkanları daxilində təsir göstərməsini istəyiblər.

Görüş iştirakçıları namizədə uğurlar arzulayıb və onu yenidən Milli Məclisdə görmək istədiklərini, ona səs verəcəklərini deyiblər.

Əli Məsimli Şəkinin problemlərini parlamentdə qaldıracaq